ದೇಶಾದ್ಯಂತ ಏಕ ರೂಪದ ಮಾಲಿನ್ಯ ನಿಯಂತ್ರಣ ಪ್ರಮಾಣ ಪತ್ರ ಬಳಸಲು ಅನುಮೋದನೆ ನೀಡಿದ ಸಾರಿಗೆ ಇಲಾಖೆ

ಕೇಂದ್ರ ರಸ್ತೆ ಸಾರಿಗೆ ಹಾಗೂ ಹೆದ್ದಾರಿ ಇಲಾಖೆಯು ಹೊರಡಿಸಿರುವ ಅಧಿಸೂಚನೆಯಲ್ಲಿ ಅಸ್ತಿತ್ವದಲ್ಲಿರುವ ವಾಹನಗಳ ಅವಧಿ ಮುಗಿದಿಲ್ಲದಿದ್ದರೆ ಒಂದೇ ವಾಹನಕ್ಕಾಗಿ ದೇಶದ ವಿವಿಧ ಸ್ಥಳಗಳಲ್ಲಿ ಹೊಸ ಪಿಯುಸಿಯನ್ನು ಪಡೆಯುವ ಅಗತ್ಯವಿಲ್ಲವೆಂದು ಹೇಳಲಾಗಿದೆ.

ಮಾಲಿನ್ಯ ನಿಯಂತ್ರಣ ಪ್ರಮಾಣಪತ್ರವನ್ನು ಪಿಯುಸಿ ಡೇಟಾಬೇಸ್‌ಗೆ ರಾಷ್ಟ್ರೀಯ ರಿಜಿಸ್ಟರ್‌ನೊಂದಿಗೆ ಲಿಂಕ್ ಮಾಡಲಾಗುವುದು ಎಂದು ಕೇಂದ್ರ ರಸ್ತೆ ಸಾರಿಗೆ ಹಾಗೂ ಹೆದ್ದಾರಿ ಇಲಾಖೆಯು ಹೇಳಿದೆ.

ಇನ್ನು ಮುಂದೆ ಪಿಯುಸಿ ಪ್ರಮಾಣ ಪತ್ರಗಳಲ್ಲಿ ಕ್ಯೂಆರ್ ಕೋಡ್ ಅನ್ನು ಮುದ್ರಿಸಲಾಗುತ್ತದೆ. ಈ ಕೋಡ್ ವಾಹನದ ವಿವರ, ವಾಹನ ಮಾಲೀಕರ ವಿವರ ಹಾಗೂ ಮಾಲಿನ್ಯ ಹೊರಸೂಸುವಿಕೆಯ ಸ್ಥಿತಿಯ ವಿವರಗಳನ್ನು ಹೊಂದಿರುತ್ತದೆ.

ಹೊಸ ಪಿಯುಸಿ ಪ್ರಮಾಣ ಪತ್ರಗಳಲ್ಲಿ ವಾಹನ ಮಾಲೀಕರ ಮೊಬೈಲ್ ಸಂಖ್ಯೆ, ಹೆಸರು, ವಿಳಾಸ, ಎಂಜಿನ್ ಸಂಖ್ಯೆ, ಚಾಸಿಸ್ ಸಂಖ್ಯೆಗಳು ಸಹ ಇರುತ್ತವೆ. ಡೇಟಾಬೇಸ್‌ನಿಂದ ನಿರ್ದಿಷ್ಟ ವಾಹನದ ಬಗೆಗಿನ ವಿವರಗಳನ್ನು ಪಡೆಯಲು ಇದರಿಂದ ಸಾಧ್ಯವಾಗಲಿದೆ.

ಕೇಂದ್ರ ಮೋಟಾರು ವಾಹನ ಕಾಯ್ದೆ 1989ರ ಅಡಿಯಲ್ಲಿ ದೇಶಾದ್ಯಂತ ಪಿಯುಸಿ ಪ್ರಮಾಣ ಪತ್ರಕ್ಕೆ ಏಕ ರೂಪವನ್ನು ನೀಡಲು ರಸ್ತೆ ಸಾರಿಗೆ ಹಾಗೂ ಹೆದ್ದಾರಿ ಇಲಾಖೆಯು 2021ರ ಜೂನ್ 14ರಂದು ಅಧಿಸೂಚನೆ ಹೊರಡಿಸಿದೆ ಎಂದು ಇಲಾಖೆಯ ಅಧಿಕೃತ ಪ್ರಕಟಣೆ ತಿಳಿಸಿದೆ.

ಈ ಪ್ರಮಾಣ ಪಾತ್ರದಲ್ಲಿ ಮಾಲೀಕರ ಮೊಬೈಲ್ ಸಂಖ್ಯೆಯನ್ನು ಕಡ್ಡಾಯಗೊಳಿಸಲಾಗಿದೆ. ಈ ಮೊಬೈಲ್ ಸಂಖ್ಯೆಗೆ ಮಾನ್ಯತೆ ಬಗ್ಗೆ ಹಾಗೂ ಶುಲ್ಕದ ಬಗ್ಗೆ ಎಸ್‌ಎಂಎಸ್ ಕಳುಹಿಸಲಾಗುತ್ತದೆ ಎಂದು ಸಾರಿಗೆ ಇಲಾಖೆ ಹೇಳಿದೆ.

ಪಿಯುಸಿ ಪ್ರಮಾಣ ಪತ್ರದ ನಿಯಮಗಳಲ್ಲಿ ಹೊಸ ಬದಲಾವಣೆ ತರುವುದರ ಜೊತೆಗೆ, ಸರ್ಕಾರವು ಮೊದಲ ಬಾರಿಗೆ ರಿಜೆಕ್ಷನ್ ಸ್ಲಿಪ್ ಪರಿಕಲ್ಪನೆಯನ್ನು ಪರಿಚಯಿಸಿದೆ. ಪರೀಕ್ಷಾ ಫಲಿತಾಂಶದ ಮೌಲ್ಯವು ಗರಿಷ್ಠ ಅನುಮತಿ ಮೌಲ್ಯಕ್ಕಿಂತ ಹೆಚ್ಚಿದ್ದರೆ ವಾಹನ ಮಾಲೀಕರಿಗೆ ಏಕ ರೂಪದ ರಿಜೆಕ್ಷನ್ ಸ್ಲಿಪ್ ನೀಡಲಾಗುತ್ತದೆ.

ಯಾವುದೇ ಕೇಂದ್ರಗಳಲ್ಲಿ ಮಾಲಿನ್ಯ ತಪಾಸಣೆ ಸಾಧನವು ಕಾರ್ಯನಿರ್ವಹಿಸದಿದ್ದಲ್ಲಿ ಈ ದಾಖಲೆಯನ್ನು ಸೇವಾ ಕೇಂದ್ರಗಳಲ್ಲಿ ವಾಹನಗಳನ್ನು ಪಡೆಯಲು ಅಥವಾ ಪಿಯುಸಿ ಕೇಂದ್ರಗಳಲ್ಲಿ ಬಳಸಬಹುದಾಗಿದೆ.

ವಾಹನವು ಅತಿಯಾಗಿ ಮಾಲಿನ್ಯವನ್ನು ಹೊರಸೂಸುವ ಸಂದರ್ಭದಲ್ಲಿ ವಾಹನ ಸವಾರ ಅಥವಾ ಆ ವಾಹನದ ಉಸ್ತುವಾರಿ ಹೊತ್ತಿರುವ ವ್ಯಕ್ತಿಯು ಆ ವಾಹನದ ಪಿಯುಸಿ ಪ್ರಮಾಣ ಪತ್ರವನ್ನು ಸಲ್ಲಿಸಲು ವಿಫಲವಾದರೆ ವಾಹನ ಮಾಲೀಕರು ದಂಡವನ್ನು ಪಾವತಿಸ ಬೇಕಾಗುತ್ತದೆ ಎಂದು ಹೇಳಲಾಗಿದೆ.

ಚಾಲಕನು ನಿಗದಿತ ಸಮಯದೊಳಗೆ ಮಾನ್ಯ ಮಾಲಿನ್ಯ ಪ್ರಮಾಣಪತ್ರವನ್ನು ತೆಗೆದುಕೊಳ್ಳಲು ವಿಫಲವಾದರೆ ನೋಂದಣಿ ಪ್ರಾಧಿಕಾರವು ವಾಹನದ ನೋಂದಣಿಪ್ರಮಾಣಪತ್ರವನ್ನು ಅಥವಾ ಪರವಾನಗಿಯನ್ನು ಅಮಾನತುಗೊಳಿಸುತ್ತದೆ ಎಂದು ಸಾರಿಗೆ ಇಲಾಖೆ ತಿಳಿಸಿದೆ.