2030ರ ವೇಳೆಗೆ 5 ಹೊಸ ಎಲೆಕ್ಟ್ರಿಕ್ ಕಾರುಗಳ ಬಿಡುಗಡೆ... ಟಾಟಾ ವೇಗ ನೋಡಿ ಪ್ರತಿಸ್ಪರ್ಧಿಗಳಲ್ಲಿ ನಡುಕ

ಭಾರತದ ಎಲೆಕ್ಟ್ರಿಕ್ ವಾಹನ ವಿಭಾಗದಲ್ಲಿ ತನ್ನ ಪ್ರವರ್ತಕ ಪಾತ್ರವನ್ನು ನಿರ್ಮಿಸುತ್ತಾ, ಟಾಟಾ ಮೋಟಾರ್ಸ್ ಈಗ ಮುಂದಿನ ಹಂತದ ಬೆಳವಣಿಗೆಯತ್ತ ಸಾಗುತ್ತಿದೆ. ಇತ್ತೀಚೆಗೆ ಭಾರತದಲ್ಲಿ 2,50,000 ಕ್ಕೂ ಹೆಚ್ಚು ಟಾಟಾ ಎಲೆಕ್ಟ್ರಿಕ್ ವಾಹನಗಳನ್ನು ಮಾರಾಟ ಮಾಡುವ ಮೂಲಕ ಮಾರುಕಟ್ಟೆ ನಾಯಕನಾಗಿ ತನ್ನ ಸ್ಥಾನವನ್ನು ದೃಢಪಡಿಸಿಕೊಂಡಿದ್ದು, ತನ್ನ ಭವಿಷ್ಯದ ಎಲೆಕ್ಟ್ರಿಕ್ ವಾಹನ ವಿಭಾಗದಲ್ಲಿ ಯಾವೆಲ್ಲಾ ಬದಲಾವಣೆಗಳನ್ನು ತರಲಿದೆ ಎಂಬುದರ ಬಗ್ಗೆ ಪ್ರಕಟಣೆಯಲ್ಲಿ ತಿಳಿಸಿದೆ. 2030ರ ವೇಳೆಗೆ 5 ಹೊಸ ಎಲೆಕ್ಟ್ರಿಕ್ ಕಾರುಗಳನ್ನು ಬಿಡುಗಡೆ ಮಾಡಲಿದ್ದು, ಹತ್ತು ಲಕ್ಷ ಚಾರ್ಜಿಂಗ್ ಪಾಯಿಂಟ್‌ಗಳನ್ನು ಸ್ಥಾಪಿಸುವುದಾಗಿ ಹೇಳಿದೆ.

ಮುಂಬರುವ EV ಬಿಡುಗಡೆಗಳು: 2026 ರಲ್ಲಿ ಸಿಯೆರಾ ಇವಿ ಮತ್ತು ಹೊಸ ಪಂಚ್ ಇವಿ ಬಿಡುಗಡೆಯಾಗಲಿವೆ. 2026ರ ವರ್ಷಾಂತ್ಯದಲ್ಲಿ ಪ್ರೀಮಿಯಂ ಐಷಾರಾಮಿ EV ಗಳ ಅವಿನ್ಯಾ ಸಿರೀಸ್ ಅನ್ನು ಪರಿಚಯಿಸಲಿದೆ. 2030 ರ ಹೊತ್ತಿಗೆ ಸಿಯೆರಾ ಮತ್ತು ಅವಿನ್ಯಾ ಸೇರಿದಂತೆ ಐದು ಹೊಸ ಎಲೆಕ್ಟ್ರಿಕ್ ಕಾರುಗಳು ಹಾಗೂ ಪೋರ್ಟ್‌ಫೋಲಿಯೊದಾದ್ಯಂತ ಬಹು ನವೀಕರಣಗಳು ಇರಲಿವೆ ಎಂದು ಟಾಟಾ ತಿಳಿಸಿದೆ.

ಟಾಟಾ ಈಗಾಗಲೇ ತನ್ನ ನೆಟ್‌ವರ್ಕ್‌ನಲ್ಲಿ 2 ಲಕ್ಷಕ್ಕೂ ಹೆಚ್ಚು ಚಾರ್ಜಿಂಗ್ ಪಾಯಿಂಟ್‌ಗಳನ್ನು ಪಾಲುದಾರ CPO ಗಳ ಮೂಲಕ ಹೋಮ್ ಚಾರ್ಜಿಂಗ್, ಕಮ್ಯೂನಿಟಿ ಚಾರ್ಜಿಂಗ್ ಮತ್ತು ಸಾರ್ವಜನಿಕ ಚಾರ್ಜಿಂಗ್‌ಗಳ ಸಂಯೋಜನೆಯ ಮೂಲಕ ಹೊಂದಿದೆ. ಟಾಟಾ ಇವಿನ ಚಾರ್ಜಿಂಗ್ ಅಗ್ರಿಗೇಟರ್ 20,000 ಕ್ಕೂ ಹೆಚ್ಚು ನೋಂದಾಯಿತ ಚಾರ್ಜಿಂಗ್ ಪಾಯಿಂಟ್‌ಗಳೊಂದಿಗೆ ಸಾರ್ವಜನಿಕ ಚಾರ್ಜರ್‌ಗಳ ಅತ್ಯಂತ ಸಮಗ್ರ ವ್ಯಾಪ್ತಿಯನ್ನು ಒದಗಿಸುತ್ತದೆ.

ಇದು ಸೂಪರ್‌ಫಾಸ್ಟ್ ಚಾರ್ಜರ್‌ಗಳ ಅತಿದೊಡ್ಡ ನೆಟ್‌ವರ್ಕ್ ಅನ್ನು ಸಹ ಹೊಂದಿದೆ. 100 ಮೆಗಾಚಾರ್ಜಿಂಗ್ ಹಬ್ ‌ಗಳು ಈಗಾಗಲೇ ದೇಶದ ಪ್ರಮುಖ ಕಾರಿಡಾರ್‌ಗಳಲ್ಲಿ 16 ಚಾರ್ಜಿಂಗ್ ಪಾಯಿಂಟ್‌ಗಳು ಮತ್ತು 120kW+ ಚಾರ್ಜಿಂಗ್ ವೇಗದೊಂದಿಗೆ ಕಾರ್ಯನಿರ್ವಹಿಸುತ್ತಿವೆ ಎಂದು ಟಾಟಾ ತಿಳಿಸಿದೆ. ಇದು ಹೀಗಿದ್ದರೆ ಮುಂಬರುವ ಯೋಜನೆಗಳು ಇನ್ನೂ ದೊಡ್ಡದಾಗಿವೆ ಎಂದು ಹೇಳಿದೆ.

ಚಾರ್ಜಿಂಗ್ ಮೂಲಸೌಕರ್ಯ ಹೆಚ್ಚಿಸುವುದು: ಮುಂದಿನ ಪೀಳಿಗೆಯ ಚಾರ್ಜಿಂಗ್ ನೆಟ್‌ವರ್ಕ್ ವಿಸ್ತರಣೆಗೆ ಯೋಜಿಸಿದ್ದು, 2027 ರಿಂದ ಟಾಟಾ ಇವಿ ಮುಕ್ತ ಸಹಯೋಗ ಚೌಕಟ್ಟಿನ ಮೂಲಕ 30,000 ಕ್ಕೂ ಹೆಚ್ಚು ಸಾರ್ವಜನಿಕ ಫಾಸ್ಟ್ ಚಾರ್ಜರ್‌ಗಳನ್ನು ಒಳಗೊಂಡಂತೆ 4,00,000 ಚಾರ್ಜ್ ಪಾಯಿಂಟ್‌ ಗಳನ್ನು ನಿರ್ಮಿಸುವುದು. 2030ರ ವೇಳೆಗೆ ಹತ್ತು ಲಕ್ಷ ಚಾರ್ಜ್ ಪಾಯಿಂಟ್‌ಗಳು ಮತ್ತು 1,00,000 ಸಾರ್ವಜನಿಕ ಚಾರ್ಜ್ ಪಾಯಿಂಟ್‌ಗಳನ್ನು ನಿರ್ಮಿಸುವುದಾಗಿ ತಿಳಿಸಿದೆ.

ನೆಕ್ಸಾನ್ ನೊಂದಿಗೆ ಭಾರತದ ಎಲೆಕ್ಟ್ರಿಕ್ ಪ್ಯಾಸೆಂಜರ್ ವಾಹನ ಕ್ಷೇತ್ರದಲ್ಲಿ ಆರಂಭಿಕ ಹೆಜ್ಜೆ ಇಟ್ಟ ಟಾಟಾ ಮೋಟಾರ್ಸ್, ತನ್ನ ಒಟ್ಟು EV ಮಾರಾಟದಲ್ಲಿ ಒಂದು ಲಕ್ಷಕ್ಕೂ ಹೆಚ್ಚು Nexon ನಿಂದಲೇ ಬಂದಿದೆ ಎಂದು ಹೇಳಿದೆ. ಈ ಬಲವಾದ ಬೇಡಿಕೆಯ ಮೇರೆಗೆ, ಕಂಪನಿಯು 2025 ಮತ್ತು 2030 ರ ನಡುವೆ 16,000 ಕೋಟಿ ರೂ.ಗಳಿಂದ 18,000 ಕೋಟಿ ರೂ.ಗಳವರೆಗೆ ಹೂಡಿಕೆ ಮಾಡಲು ಯೋಜಿಸಿದೆ.

ಪ್ರಸ್ತುತ, ಟಾಟಾ ಮೋಟಾರ್ಸ್ ಭಾರತದಲ್ಲಿ ಆರು ಎಲೆಕ್ಟ್ರಿಕ್ ಕಾರುಗಳನ್ನು ಮಾರಾಟ ಮಾಡುತ್ತಿದೆ. ಇವುಗಳಲ್ಲಿ ಟಿಯಾಗೊ ಇವಿ, ಟಿಗೋರ್ ಇವಿ, ಪಂಚ್ ಇವಿ, ನೆಕ್ಸಾನ್ ಇವಿ, ಕರ್ವ್ವ್ ಇವಿ ಮತ್ತು ಫ್ಲ್ಯಾಗ್‌ಶಿಪ್ ಹ್ಯಾರಿಯರ್ ಇವಿ ಸೇರಿವೆ. ಇವುಗಳ ಜೊತೆಗೆ ಈಗ ಘೋಷಿಸಿರುವಂತೆ ಟಾಟಾ ಕಾರು ತಯಾರಕರು 2030 ರ ವೇಳೆಗೆ ಐದು ಹೊಸ ಇವಿ ಬಿಡುಗಡೆಗಳನ್ನು ಖಚಿತಪಡಿಸಿದ್ದಾರೆ.

ಈ ಕಾರುಗಳ ಪ್ರಚಾರವು ಮುಂದಿನ ವರ್ಷ ಆಗಮಿಸಲಿರುವ ಸಿಯೆರಾದ ಎಲೆಕ್ಟ್ರಿಕ್ ಆವೃತ್ತಿಯೊಂದಿಗೆ ಪ್ರಾರಂಭವಾಗುತ್ತದೆ. ಅವಿನ್ಯಾ ಎಲೆಕ್ಟ್ರಿಕ್ ಮಾದರಿಯು 2026 ರಲ್ಲಿ ಬರಲಿದೆ, ಹಾಗೆಯೇ 2027 ಮತ್ತು 2030 ರ ನಡುವೆ ಇನ್ನೂ ಮೂರು ಹೊಸ ಎಲೆಕ್ಟ್ರಿಕ್ ಕಾರುಗಳನ್ನು ಪರಿಚಯಿಸಲು ಯೋಜಿಸಲಾಗಿದೆ. ಒಟ್ಟಾರೆ ಭಾರತೀಯ ಎಲೆಕ್ಟ್ರಿಕ್ ಕಾರು ವಿಭಾಗದಲ್ಲಿ ನಂ.1 ಸ್ಥಾನದಲ್ಲಿ ಮುಂದುವರಿಯಲು ಟಾಟಾ ಪಕ್ಕಾ ಪ್ಲಾನ್ ಮಾಡಿಕೊಂಡಿದೆ ಎಂದು ಹೇಳಬಹುದು.