BYD: ಭಾರತದಲ್ಲಿ ಹೊಸ ಚೀನಾ ಕಾರು ಬಿಡುಗಡೆ: ಫುಲ್ ಡಿಮ್ಯಾಂಡ್... ದಾಖಲೆಯ ಬುಕಿಂಗ್ಸ್!

ವಿಶ್ವದ ಪ್ರಮುಖ ಎಲೆಕ್ಟ್ರಿಕ್ ಕಾರು ತಯಾರಕ ಕಂಪನಿಯಾದ ಬಿವೈಡಿ (Build your Dreams) ಕಂಪನಿಯು ತನ್ನ ಹೊಸ ಬಿವೈಡಿ ಸೀಲಯನ್ 7 (BYD SEALION 7) ಕಾರಿನ್ನು ಬಿಡುಗಡೆ ಮಾಡಿದೆ. ಕಂಪನಿಯು ಜನವರಿ 18, 2025 ರಂದು ಭಾರತ್ ಮೊಬಿಲಿಟಿ ಗ್ಲೋಬಲ್ ಎಕ್ಸ್‌ಪೋದಲ್ಲಿ ಈ ಕಾರನ್ನು ಅನಾವರಣಗೊಳಿಸಿ, ಬುಕಿಂಗ್‌ಗಳನ್ನು ಸಹ ಪ್ರಾರಂಭಿಸಿತ್ತು. ಒಂದು ತಿಂಗಳೊಳಗೆ ಬರೋಬ್ಬರಿ 1000 ಕ್ಕೂ ಹೆಚ್ಚು ಬುಕಿಂಗ್‌ಗಳನ್ನು ಈ ಎಲೆಕ್ಟ್ರಿಕ್ ಎಸ್‌ಯುವಿ ಗಳಿಸಿದೆ. ಇದು ಪ್ರೀಮಿಯಂ ಹಾಗೂ ಪರ್ಫಾಮೆನ್ಸ್ ಎಂಬ ಎರಡು ವೇರಿಯೆಂಟ್‌ಗಳನ್ನು ಒಳಗೊಂಡಿದ್ದು, ಬಲವಾದ ಜಾಗತಿಕ ಪರಂಪರೆಯನ್ನು ಹೊಂದಿರುವ ಯಶಸ್ವಿ ಕಾರಾಗಿದೆ ಎಂದು ಕಂಪನಿ ಹೇಳಿದೆ.

ಹೊಸ ಬಿವೈಡಿ ಸೀಲೈಯನ್ 7 ಪ್ರೀಮಿಯಂ ವೇರಿಯೆಂಟ್ 82.56 kWh ಬ್ಯಾಟರಿ ಪ್ಯಾಕ್ ಹೊಂದಿದ್ದು, ಇದು 48,90,000 ರೂ. ಎಕ್ಸ್‌ ಶೊರೂಂ ಬೆಲೆಯನ್ನು ಹೊಂದಿದೆ. ಬಿವೈಡಿ ಸೀಲೈಯನ್ 7 ಪರ್ಫಾಮೆನ್ಸ್ ವೇರಿಯೆಂಟ್ 82.56 kWh ಬ್ಯಾಟರಿ ಪ್ಯಾಕ್‌ನೊಂದಿಗೆ ಬರಲಿದ್ದು, ಇದು 54,90,000 ರೂ. ಎಕ್ಸ್‌ ಶೋರೂಂ ಬೆಲೆಯನ್ನು ಹೊಂದಿದೆ.

ಕಂಪನಿಯ ಅತ್ಯಾಧುನಿಕ ಇಂಟೆಲಿಜೆನ್ಸ್ ಟಾರ್ಕ್ ಅಡಾಪ್ಷನ್ ಕಂಟ್ರೋಲ್ (iTAC) ಮತ್ತು ಮೆಚ್ಚುಗೆ ಪಡೆದ CTB (ಸೆಲ್ ಟು ಬಾಡಿ) ತಂತ್ರಜ್ಞಾನವನ್ನು ಒಳಗೊಂಡಿದೆ. ಹೆಚ್ಚಿನ ಕ್ಯಾಬಿನ್ ಸ್ಥಳ, ಉತ್ತಮ ನಿರ್ವಹಣೆ ಮತ್ತು ವಿಸ್ತೃತ ಶ್ರೇಣಿಯನ್ನು ನೀಡುತ್ತದೆ. 82.56 kWh ಬ್ಯಾಟರಿ ಪ್ಯಾಕ್ ಒಳಗೊಂಡಿದ್ದು, ಪ್ರೀಮಿಯಂ ಮತ್ತು ಪರ್ಫಾಮೆನ್ಸ್ ಎಂಬ ಎರಡು ವೇರಿಯೆಂಟ್‌ಗಳ ಆಯ್ಕೆಯೊಂದಿಗೆ ಲಭ್ಯವಿದೆ.

ಪರ್ಫಾರ್ಮೆನ್ಸ್ ವೇರಿಯೆಂಟ್ 4.5 ಸೆಕೆಂಡುಗಳಲ್ಲಿ 100 ಕಿ.ಮೀ ವೇಗ ತಲುಪುವ ಸಾಮರ್ಥ್ಯವನ್ನು ಹೊಂದಿದೆ. ಪ್ರೀಮಿಯಂ ವೇರಿಯೆಂಟ್ 6.7 ಸೆಕೆಂಡುಗಳಲ್ಲಿ 100 ಕಿ.ಮೀ ವೇಗ ತಲುಪುವ ಸಾಮರ್ಥ್ಯವನ್ನು ಹೊಂದಿದೆ. ಪರ್ಫಾರ್ಮೆನ್ಸ್ ವೇರಿಯೆಂಟ್ ಪ್ರತಿ ಚಾರ್ಜ್‌ನಲ್ಲಿ 542 ಕಿ.ಮೀ ರೇಂಜ್ ನೀಡಿದರೆ, ಪ್ರೀಮಿಯಂ ವೇರಿಯೆಂಟ್ ಪೂರ್ಣ ಚಾರ್ಜ್‌ನಲ್ಲಿ 567 ಕಿ.ಮೀ ರೇಂಜ್ ನೀಡುವುದಾಗಿ ಕಂಪನಿ ಹೇಳಿದೆ.

ಪರ್ಫಾಮೆನ್ಸ್ ವೇರಿಯೆಂಟ್ 390 kW ಪವರ್ ಮತ್ತು 690 Nm ಟಾರ್ಕ್ ಹೊರಹಾಕುತ್ತದೆ. ಹಾಗೆಯೇ ಪ್ರೀಮಿಯಂ ವೇರಿಯೆಂಟ್ 230 kW ಪವರ್ ಮತ್ತು 380 Nm ಟಾರ್ಕ್ ಅನ್ನು ಉತ್ಪಾದಿಸುತ್ತದೆ. ಫೀಚರ್ಸ್ ವಿಷಯಕ್ಕೆ ಬಂದರೆ, 15.6-ಇಂಚಿನ (39.62 cms) ತಿರುಗುವ ಟಚ್‌ಸ್ಕ್ರೀನ್, ಪ್ರೀಮಿಯಂ ಕ್ವಿಲ್ಟೆಡ್ ನಪ್ಪಾ ಲೆದರ್ ಸೀಟ್‌ಗಳು ಮತ್ತು 128-ಬಣ್ಣದ ಆಂಬಿಯೆಂಟ್ ಲೈಟಿಂಗ್ ಆಯ್ಕೆಗಳೊಂದಿಗೆ ಇಂಟೀರಿಯರ್ ಅನ್ನು ಡಿಸೈನ್ ಮಾಡಲಾಗಿದೆ.

ಹೆಚ್ಚುವರಿ ಮುಖ್ಯಾಂಶಗಳಲ್ಲಿ ಎಲೆಕ್ಟ್ರಿಕ್ ಸನ್‌ಶೇಡ್‌ನೊಂದಿಗೆ ಪನೋರಮಿಕ್ ಗ್ಲಾಸ್‌ರೂಫ್, ಹೆಡ್ಸ್-ಅಪ್ ಡಿಸ್ಪ್ಲೇ ಸೇರಿವೆ. ಹಾಗೆಯೇ 12 ಡೈನಾಡಿಯೊ ಸ್ಪೀಕರ್‌ಗಳೊಂದಿಗೆ ಆಡಿಯೋ ಸಿಸ್ಟಮ್, ವೆಂಟಿಲೇಟೆಡ್ ಸೀಟ್‌ಗಳು, 50 W ವೈರ್‌ಲೆಸ್ ಫೋನ್ ಚಾರ್ಜರ್, ಫ್ಯೂಚರಿಸ್ಟಿಕ್ ಡೈನಾಮಿಕ್ ವಾಟರ್ ಡ್ರಾಪ್ ಟೈಲ್ ಲ್ಯಾಂಪ್‌ಗಳು, ಸ್ಟ್ಯಾಂಡರ್ಡ್ ಆಗಿ 11 ಏರ್‌ಬ್ಯಾಗ್‌ಗಳು, ಡ್ರೈವರ್ ಫೈಟ್‌ನೆಸ್ ಮಾನಿಟರಿಂಗ್ ಸೇರಿದಂತೆ ಇತರ ವೈಶಿಷ್ಟ್ಯಗಳನ್ನು ಹೊಂದಿದೆ.

ಭಾರತೀಯ ಗ್ರಾಹಕರಿಗೆ, BYD SEALION 7 ನೊಂದಿಗೆ ಅವರು ಆಯ್ಕೆ ಮಾಡಿದ ಸ್ಥಳದಲ್ಲಿ 7kW ಚಾರ್ಜರ್ ಅನ್ನು ಉಚಿತವಾಗಿ ಒದಗಿಸುತ್ತದೆ. ಈ ವಾಹನವು ಮೊದಲ ಉಚಿತ ತಪಾಸಣೆ ಸೇವೆಯೊಂದಿಗೆ 6 ವರ್ಷಗಳ ರಸ್ತೆ-ಬದಿಯ ಸಹಾಯದೊಂದಿಗೆ ಬರುತ್ತದೆ. ಗ್ರಾಹಕರು BYD ಯ ಕಡಿಮೆ ವೋಲ್ಟೇಜ್ ಬ್ಯಾಟರಿಯ ಮೇಲೆ 6-ವರ್ಷ/1,50,000 ಕಿಮೀ, ಯಾವುದು ಮೊದಲೋ ಅದು ಖಾತರಿಯ ಪ್ರಯೋಜನವನ್ನು ಪಡೆಯಬಹುದು.

ಈ ಬ್ಯಾಟರಿ LFP (ಲಿಥಿಯಂ ಐರನ್ ಫಾಸ್ಫೇಟ್) ತಂತ್ರಜ್ಞಾನವನ್ನು ಹೊಂದಿದೆ. BYD ಯ ಕಡಿಮೆ ವೋಲ್ಟೇಜ್ ಬ್ಯಾಟರಿಯು ಇತರ ಕಡಿಮೆ ವೋಲ್ಟೇಜ್ ಬ್ಯಾಟರಿಗಿಂತ ಆರು ಪಟ್ಟು ಹಗುರವಾಗಿದೆ. ಆಟೋ-ಡಿಸ್ಚಾರ್ಜ್ ಬಳಕೆಯಲ್ಲಿ ಐದು ಪಟ್ಟು ಉತ್ತಮವಾಗಿದೆ. 15 ವರ್ಷಗಳ ಜೀವಿತಾವಧಿಯನ್ನು ಹೊಂದಿದೆ. ಇದು 82.56 kWh ಬ್ಲೇಡ್ ಬ್ಯಾಟರಿಯ ಜೊತೆಗೆ ಭಾರತದಲ್ಲಿ BYD ಶ್ರೇಣಿಯಾದ್ಯಂತ 8-ವರ್ಷಗಳ ಖಾತರಿ ಮತ್ತು ಇತರ ಪ್ರಯೋಜನಗಳನ್ನು ನೀಡುವುದಾಗಿ ಕಂಪನಿ ಹೇಳಿದೆ.