ಕಳೆಪೆ ಗುಣಮಟ್ಟದ ಕಾರುಗಳ ತಂಟೆಗೆ ಹೋಗಬೇಡಿ ಎಂದವರಿಗೆ ಶಾಕ್ ಕೊಟ್ಟ ಜನಪ್ರಿಯ ಬ್ರ್ಯಾಂಡ್!

ಎಲ್ಲಾ ಕಾರುಗಳಲ್ಲಿ ಆರು ಏರ್‌ ಬ್ಯಾಗ್‌ಗಳನ್ನು ಸ್ಟ್ಯಾಂಡರ್ಡ್ ಆಗಿ ನೀಡುವ ಮೂಲಕ ಪ್ರಯಾಣಿಕರ ಸುರಕ್ಷತೆಯನ್ನು ಹೆಚ್ಚಿಸುವುದು ಮಾರುತಿಯ ಇತ್ತೀಚಿನ ದೊಡ್ಡ ಪ್ರಯತ್ನವಾಗಿದೆ. ಸದ್ಯ ಮಾರುತಿ ಸುಜುಕಿ (Maruti Suzuki) ತನ್ನ 14 ಮಾಡಲ್‌ಗಳಲ್ಲಿ 6 ಏರ್‌ಬ್ಯಾಗ್‌ಗಳನ್ನು ಪ್ರಮಾಣಿತವಾಗಿ ನೀಡುತ್ತಿದೆ. ಈ ಮೂಲಕ ವಾಹನ ಸುರಕ್ಷತೆಯಲ್ಲಿ ಗಮನಾರ್ಹ ಜಿಗಿತವನ್ನು ಕಂಡಿದೆ. ಜೊತೆಗೆ ಈ ಕ್ರಮವು ಕಂಪನಿಯ ಬಹುಪಾಲು ಕಾರುಗಳಿಗೆ ಸಮಗ್ರ ಪ್ರಯಾಣಿಕರ ರಕ್ಷಣೆಯನ್ನು ತರುತ್ತದೆ, ಸುರಕ್ಷತೆಗೆ ಬ್ರ್ಯಾಂಡ್‌ನ ಬದ್ಧತೆಯನ್ನು ಬಲಪಡಿಸುತ್ತದೆ ಎಂದು ತಜ್ಞರು ಅಭಿಪ್ರಾಯ ಪಟ್ಟಿದ್ದಾರೆ.

ಭಾರತೀಯ ಕಾರು ಮಾರುಕಟ್ಟೆಯಲ್ಲಿ ಸಾಮಾನ್ಯವಾಗಿ ಎಂಟ್ರಿ ಲೆವಲ್ ಕಾರುಗಳಲ್ಲಿ ಡ್ಯುಯಲ್ ಫ್ರಂಟ್, ಸೈಡ್ ಮತ್ತು ಕರ್ಟನ್ ಏರ್‌ಬ್ಯಾಗ್‌ಗಳನ್ನು ಒಳಗೊಂಡಂತೆ 6 ಏರ್‌ಬ್ಯಾಗ್‌ಗಳನ್ನು ಸ್ಟ್ಯಾಂಡರ್ಡ್ ಆಗಿ ನೀಡುವುದು ತುಂಬಾ ಅಪರೂಪ. ಆದರೆ ಮಾರುತಿ ತನ್ನ ಅಗ್ಗದ ಹ್ಯಾಚ್‌ಬ್ಯಾಕ್‌ಗಳಿಂದ ಹಿಡಿದು ದೊಡ್ಡ 7 -ಸೀಟರ್ ಕಾರುಗಳಲ್ಲಿ ಈ ಅಪ್‌ಗ್ರೇಡ್ ನೀಡುವ ಮೂಲಕ ವಾಹನ ಸುರಕ್ಷತೆಯನ್ನು ಹೆಚ್ಚಿಸಿದೆ.

ಇದು ಭಾರತದಲ್ಲಿ ಹೆಚ್ಚುತ್ತಿರುವ ಸುರಕ್ಷಿತ ವಾಹನಗಳ ಬೇಡಿಕೆಗೆ ಹೊಂದಿಕೆಯಾಗುತ್ತದೆ. ಹಾಗೆಯೇ ಮಾರುತಿ ಸುಜುಕಿ ಸುಧಾರಿತ ಸುರಕ್ಷತಾ ವೈಶಿಷ್ಟ್ಯಗಳೊಂದಿಗೆ ಕೈಗೆಟುಕುವ ದರದಲ್ಲಿ ಕಾರುಗಳನ್ನು ನೀಡುವ ಮೂಲಕ ತನ್ನ ಮಾರುಕಟ್ಟೆ ನಾಯಕತ್ವವನ್ನು ಕಾಪಾಡಿಕೊಳ್ಳುವ ಗುರಿಯನ್ನೂ ಹೊಂದಿದೆ. ಈ ಬದಲಾವಣೆಯಿಂದ ಪ್ರಯೋಜನ ಪಡೆಯುತ್ತಿರುವ 14 ಮಾಡಲ್‌ಗಳಲ್ಲಿ ಹ್ಯಾಚ್‌ಬ್ಯಾಕ್, ಸೆಡಾನ್ ಮತ್ತು SUV ವಿಭಾಗಗಳಲ್ಲಿ ಜನಪ್ರಿಯ ಕಾರುಗಳು ಸೇರಿವೆ.

ಅವುಗಳನ್ನು ನೋಡುವುದಾದ್ರೆ, ಅರೆನಾ ಮಾದರಿಗಳಾದ ಆಲ್ಟೋ ಕೆ 10, ಸೆಲೆರಿಯೊ, ವ್ಯಾಗನ್ ಆರ್, ಎಸ್ - ಪ್ರೆಸ್ಸೊ, ಇಕೋ, ಸ್ವಿಫ್ಟ್, ಡಿಜೈರ್, ಬ್ರೆಝಾ ಮತ್ತು ಎರ್ಟಿಗಾ ಸೇರಿವೆ. ನೆಕ್ಸಾ ಮಾಡಲ್‌ಗಳಲ್ಲಿ ಇಗ್ನಿಸ್, ಬಲೆನೊ, ಫ್ರಾಂಕ್ಸ್, ಜಿಮ್ನಿ, ಗ್ರ್ಯಾಂಡ್ ವಿಟಾರಾ, ಎಕ್ಸ್ ಎಲ್ 6 ಮತ್ತು ಇನ್ವಿಕ್ಟೊ ಸೇರಿವೆ.

ಇದರಲ್ಲಿ ಬಲೆನೊ, ಫ್ರಾಂಕ್ಸ್, ಎರ್ಟಿಗಾ ಮತ್ತು ಎಕ್ಸ್ ಎಲ್ 6 ಕಾರುಗಳು ತಮ್ಮ ಸಂಪೂರ್ಣ ವೇರಿಯೆಂಟ್‌ಗಳಲ್ಲಿ ಆರು ಏರ್ ಬ್ಯಾಗ್‌ಗಳನ್ನು ಹೊಂದಿರುವ ಇತ್ತೀಚಿನ ಮಾರುತಿ ಕಾರುಗಳಾಗಿವೆ. ಈ ಸುರಕ್ಷತಾ ಉಪಕ್ರಮವು ಗ್ರಾಹಕರಿಂದ ಸಕಾರಾತ್ಮಕ ಪ್ರತಿಕ್ರಿಯೆಯನ್ನು ಪ್ರೇರೇಪಿಸುವ ನಿರೀಕ್ಷೆಯಿದೆ. ಬಲವಾದ ಮಾರಾಟ ಮತ್ತು ಬ್ರ್ಯಾಂಡ್ ಮೇಲೆ ನಂಬಿಕೆಗೆ ಕೊಡುಗೆ ನೀಡುವ ಸಾಧ್ಯತೆಯಿದೆ.

ಆರು ಏರ್ ಬ್ಯಾಗ್‌ಗಳನ್ನು ಹೊರತುಪಡಿಸಿ, ಮಾರುತಿ ಕಾರುಗಳಲ್ಲಿ ಎಲೆಕ್ಟ್ರಾನಿಕ್ ಸ್ಟೆಬಿಲಿಟಿ ಪ್ರೋಗ್ರಾಂ (ಇಎಸ್ ಪಿ), ಆಂಟಿ-ಲಾಕ್ ಬ್ರೇಕಿಂಗ್ ಸಿಸ್ಟಮ್ (ಎಬಿಎಸ್), ಹಿಲ್ ಹೋಲ್ಡ್ ಅಸಿಸ್ಟ್, ಸೀಟ್ ಬೆಲ್ಟ್ ರಿಮೈಂಡರ್, ಎಲೆಕ್ಟ್ರಾನಿಕ್ ಬ್ರೇಕ್ ಫೋರ್ಸ್ ಡಿಸ್ಟ್ರಿಬ್ಯೂಷನ್ (ಇಬಿಡಿ) ನೊಂದಿಗೆ ಮೂರು-ಪಾಯಿಂಟ್ ಎಮರ್ಜೆನ್ಸಿ ಲಾಕಿಂಗ್ ರಿಟ್ರಾಕ್ಟರ್ (ಇಎಲ್ ಆರ್) ಮತ್ತು ರಿವರ್ಸ್ ಪಾರ್ಕಿಂಗ್ ಸೆನ್ಸಾರ್ ಗಳಂತಹ ಸುರಕ್ಷತಾ ಫೀಚರ್ಸ್ ನೀಡಲಾಗುತ್ತದೆ.

ಒಟ್ಟಾರೆಯಾಗಿ, ಮಾರುತಿ ಸುಜುಕಿ ತನ್ನ ಹೆಚ್ಚಿನ ಮಾಡಲ್‌ಗಳಲ್ಲಿ 6 ಏರ್‌ಬ್ಯಾಗ್‌ಗಳನ್ನು ಪ್ರಮಾಣೀಕರಿಸುವ ನಿರ್ಧಾರವು ಭಾರತದಲ್ಲಿ ಸುರಕ್ಷತಾ ಮಾನದಂಡಗಳ ಪ್ರಮುಖ ವರ್ಧನೆಯನ್ನು ಗುರುತಿಸುತ್ತದೆ. ಕಂಪನಿಯು ತನ್ನ ಭವಿಷ್ಯದ ಮಾಡಲ್‌ಗಳಲ್ಲಿಯೂ ಸುರಕ್ಷತಾ ವೈಶಿಷ್ಟ್ಯಗಳನ್ನು ಗಮನಾರ್ಹವಾಗಿ ನವೀಕರಿಸಲು ಯೋಜಿಸಿದೆ. ಈ ವರ್ಷ ಬಿಡುಗಡೆಯಾಗಲಿರುವ ಇ ವಿಟಾರಾ ಸೇರಿದಂತೆ ಎರಡು ಹೊಸ ಮಾರುತಿ ಎಸ್‌ಯುವಿಗಳು ಲೆವೆಲ್ 2 ಅಡ್ವಾನ್ಸ್ಡ್ ಡ್ರೈವರ್ ಅಸಿಸ್ಟೆನ್ಸ್ ಸಿಸ್ಟಮ್ಸ್ (ಎಡಿಎಎಸ್) ಅನ್ನು ಹೊಂದಿರಲಿವೆ.

ಇತ್ತೀಚೆಗೆ ಮಾರುತಿ ಕಾರುಗಳ ಸುರಕ್ಷತೆ ಬಗ್ಗೆ ಮಾತನಾಡಿರುವ ಮಾರುತಿ ಸುಜುಕಿ ಮಾರ್ಕೆಟಿಂಗ್ ಮತ್ತು ಸೇಲ್ಸ್ ಹಿರಿಯ ಕಾರ್ಯನಿರ್ವಾಹಕ ಅಧಿಕಾರಿ ಪಾರ್ಥೋ ಬ್ಯಾನರ್ಜಿ, ''ನಾವು ನಮ್ಮ ಗ್ರಾಹಕರ ಸುರಕ್ಷತೆಗೆ ಬದ್ಧರಾಗಿದ್ದೇವೆ, ಬೇಸ್‌ ವೇರಿಯೆಂಟ್ ಆಗಿರಲಿ ಅಥವಾ ಟಾಪ್ ವೇರಿಯೆಂಟ್ ಖರೀದಿಸುವ ಗ್ರಾಹಕರಾಗಿರಲಿ ನಾವು ವ್ಯತ್ಯಾಸವನ್ನು ತೋರಿಸುವುದಿಲ್ಲ. ಸುರಕ್ಷತೆಯು ಅತ್ಯುನ್ನತವಾಗಿದೆ ಎಂದು ನಾವು ನಂಬುತ್ತೇವೆ, ಅದನ್ನು ಎಲ್ಲಾ ಗ್ರಾಹಕರಿಗೆ ಒದಗಿಸಬೇಕು" ಎಂದು ಹೇಳಿದ್ದಾರೆ.