ಡಿಮ್ಯಾಂಡ್ ಇನ್ನೂ ಕಡಿಮೆ ಆಗಿಲ್ಲ... ಮುಗಿಬಿದ್ದು ಖರೀದಿ: ಚೀನಾ ಕಾರಿಗೆ ಕ್ಯೂ ನಿಂತ ಜನ!

ಭಾರತದಲ್ಲಿ ತನ್ನ ಕಾರುಗಳಿಗೆ ಸರಿಯಾದ ಬೇಡಿಕೆಯಿಲ್ಲದೆ ಪರದಾಡುತ್ತಿದ್ದ ಎಂಜಿ ಮೋಟಾರ್‌ (MG Motor) ಗೆ ಚಿನ್ನದ ಮೊಟ್ಟೆಯಂತಾದ ತನ್ನ ಪ್ರಮುಖ ಇವಿ ಕಾರು ಈಗ ವರದಾನವಾಗಿ ಮಾರ್ಪಟ್ಟಿದೆ. ಭಾರತದಲ್ಲಿ ಗ್ರಾಹಕರಿಂದ ಉತ್ತಮ ಬೇಡಿಕೆಯೊಂದಿಗೆ ಕಂಪನಿಗೆ ಭಾರೀ ಲಾಭ ತಂದುಕೊಡುತ್ತಿದೆ. ಹೌದು, ಆಗಸ್ಟ್ 2025 ರಲ್ಲಿ ಕಂಪನಿಯ ಪ್ರಮುಖ ಮಾಡಲ್ 'ಎಂಜಿ ವಿಂಡ್ಸರ್' ಅತ್ಯಧಿಕ ಮಾಸಿಕ ಮಾರಾಟವನ್ನು ದಾಖಲಿಸುವ ಮೂಲಕ, ಮತ್ತೊಮ್ಮೆ EV ವಿಭಾಗದಲ್ಲಿ ತನ್ನ ಸ್ಥಾನವನ್ನು ಗಟ್ಟಿಗೊಳಿಸಿದೆ. ಆಗಸ್ಟ್ 2025 ರಲ್ಲಿ MG ವಿಂಡ್ಸರ್‌ (MG Windsor EV) ನ ಬರೋಬ್ಬರಿ 4,511 ಯುನಿಟ್‌ ಕಾರುಗಳನ್ನು ಮಾರಾಟ ಮಾಡಿರುವುದಾಗಿ ಕಂಪನಿ ತಿಳಿಸಿದೆ.

ಮಾರಾಟದ ಹೊರತಾಗಿ, ಕಾರು ತಯಾರಕರು MG ವಿಂಡ್ಸರ್‌ಗಾಗಿ ಇದುವರೆಗಿನ ಅತ್ಯಧಿಕ ಮಾಸಿಕ ಮಾರಾಟ ಜೊತೆಗೆ ಗ್ರಾಹಕರಿಗೆ ಡೆಲಿವರಿಗಳನ್ನು ಸಹ ನೋಂದಾಯಿಸಿದ್ದಾರೆ. ಇದು ಆಗಸ್ಟ್ ಅನ್ನು ಬೆಳವಣಿಗೆ ಮತ್ತು ಮೈಲಿಗಲ್ಲುಗಳ ತಿಂಗಳನ್ನಾಗಿ ಮಾಡಿದೆ. ಬಿಡುಗಡೆಯಾದಾಗಿನಿಂದ ಕಾರು ತಯಾರಕರು MG ವಿಂಡ್ಸರ್‌ನ 41,000 ಕ್ಕೂ ಹೆಚ್ಚು ಯುನಿಟ್‌ ಕಾರುಗಳನ್ನು ಮಾರಾಟ ಮಾಡಿರುವುದಾಗಿ ತಿಳಿಸಿದ್ದಾರೆ.

MG ವಿಂಡ್ಸರ್ ಬಿಡುಗಡೆಯಾದಾಗಿನಿಂದ ಭಾರತೀಯ 4W - EV ವಿಭಾಗದಲ್ಲಿ ಮುಂಚೂಣಿಯಲ್ಲಿದೆ, ಉದ್ಯಮದಲ್ಲಿ ಒಂದು ಅದ್ಭುತ ಕೊಡುಗೆಯಾಗಿ ತನ್ನ ಸ್ಥಾನವನ್ನು ಗಟ್ಟಿಗೊಳಿಸಿದೆ. ICOTY ನಿಂದ ಅತ್ಯಂತ ಅಪೇಕ್ಷಿತ ಗ್ರೀನ್ ಕಾರ್ ಪ್ರಶಸ್ತಿ 2025 ಸೇರಿದಂತೆ MG ವಿಂಡ್ಸರ್ 30 ಕ್ಕೂ ಹೆಚ್ಚು ಪ್ರಶಸ್ತಿಗಳೊಂದಿಗೆ ಗುರುತಿಸಲ್ಪಟ್ಟಿದೆ. ಆಕರ್ಷಕ ಡಿಸೈನ್ ಹಾಗೂ ಆರಾಮದಾಯಕ ಇಂಟೀರಿಯರ್‌ನೊಂದಿಗೆ ದೇಶದಲ್ಲಿ ಉತ್ತಮ ಪ್ರತಿಕ್ರಿಯೆ ಪಡೆದುಕೊಂಡಿದೆ.

ವಿಂಡ್ಸರ್ ಎಕ್ಸ್‌ಕ್ಲೂಸಿವ್ ಪ್ರೊ ಬಿಡುಗಡೆ

ಕಳೆದ ಮೇ 21 ರಂದು ಕಂಪನಿಯು ತನ್ನ ಆಕರ್ಷಕ ವಿಂಡ್ಸರ್ ಎಕ್ಸ್‌ಕ್ಲೂಸಿವ್ ಪ್ರೊ ವೇರಿಯೆಂಟ್ ಅನ್ನು ಸಹ ಬಿಡುಗಡೆ ಮಾಡಿದೆ. ಈ ಕಾರು ಪ್ರೀಮಿಯಂ ಇಂಟೀರಿಯರ್, ವಿಮಾನದಂತಹ ಸೌಕರ್ಯ, ಆಕರ್ಷಕ ಫೀಚರ್ಸ್ ಜೊತೆಗೆ ದೊಡ್ಡ ಬ್ಯಾಟರಿಯನ್ನು ಇದರಲ್ಲಿ ಪರಿಚಯಿಸಲಾಗಿದ್ದು, ಒಮ್ಮೆ ಚಾರ್ಜ್ ಮಾಡಿದರೆ ಬರೋಬ್ಬರಿ 449 ಕಿ.ಮೀ ಓಡಿಸಬಹುದು ಎಂದು ಕಂಪನಿ ಹೇಳಿದೆ.

ಗ್ರಾಹಕರು ಈ ಕಾರನ್ನು ತಮ್ಮ ಹತ್ತಿರದ MG ಡೀಲರ್‌ಶಿಪ್‌ನಲ್ಲಿ ರೂ. 11,000 ಪಾವತಿಸುವ ಮೂಲಕ ಬುಕ್ ಮಾಡಬಹುದು ಎಂದು ಕಂಪನಿ ಹೇಳಿಕೊಂಡಿದೆ. ರೂ. 17,24,800 (ಎಕ್ಸ್ - ಶೋರೂಂ) ಬೆಲೆಯಲ್ಲಿ ಖರೀದಿಗೆ ಲಭ್ಯವಿದೆ. ಈ ಹೊಸ ವೇರಿಯೆಂಟ್ ಡೆಲಿವರಿಗಳು ಜೂನ್ ಮೊದಲ ವಾರದಲ್ಲಿ ಪ್ರಾರಂಭವಾಗುತ್ತವೆ ಎಂದು ಕಂಪನಿ ತಿಳಿಸಿದೆ.

ಕಾರಿನಲ್ಲಿ ಒಂಬತ್ತು ಸ್ಪೀಕರ್‌ಗಳೊಂದಿಗೆ ಅಳವಡಿಸಲಾದ 15.6 - ಇಂಚಿನ ಗ್ರ್ಯಾಂಡ್‌ವ್ಯೂ ಡಿಸ್ಪ್ಲೇ, 80 ಕ್ಕೂ ಹೆಚ್ಚು ಕನೆಕ್ಟೆಡ್ ಫೀಚರ್ಸ್, 100 ಕ್ಕೂ ಹೆಚ್ಚು AI - ಆಧಾರಿತ ವಾಯಿಸ್ ಕಮಾಂಡ್‌ಗಳು ಮತ್ತು ಮನರಂಜನಾ ವೈಶಿಷ್ಟ್ಯಗಳೊಂದಿಗೆ i-SMART # ನಿಂದ ನಡೆಸಲ್ಪಡುವ ತಂತ್ರಜ್ಞಾನ, ಸೆಂಟ್ರಲ್ ಕನ್ಸೋಲ್‌ನಲ್ಲಿ ಬೃಹತ್ 15.6" GRANDVIEW ಟಚ್ ಡಿಸ್ಪ್ಲೇಯನ್ನು ಹೊಂದಿದೆ.

ಇಂಟೀರಿಯರ್ ‌ನಲ್ಲಿ ಡ್ಯುಯಲ್ - ಟೋನ್ ಐವರಿ ಮತ್ತು ಬ್ಲಾಕ್ ಒಳಾಂಗಣ ಕಾರಿನ ಪ್ರೀಮಿಯಂ ಆಕರ್ಷಣೆಯನ್ನು ಮತ್ತಷ್ಟು ಹೆಚ್ಚಿಸುತ್ತದೆ. ಜೊತೆಗೆ ಒರಗಬಹುದಾದ (135 ಡಿಗ್ರಿಗಳವರೆಗೆ) ಏರೋ ಲೌಂಜ್ ಸೀಟುಗಳು ಪ್ರತಿ ಪ್ರಯಾಣವನ್ನು ಪ್ರೀಮಿಯಂ ಅನುಭವವನ್ನಾಗಿ ಮಾಡುತ್ತದೆ. ಕಾರು ಪರ್ಲ್ ವೈಟ್, ಸ್ಟಾರಿ ಬ್ಲ್ಯಾಕ್ ಮತ್ತು ಟರ್ಕೋಯಿಸ್ ಗ್ರೀನ್ ಎಂಬ ಮೂರು ಬಣ್ಣಗಳಲ್ಲಿ ಖರೀದಿಗೆ ಲಭ್ಯವಿದೆ.

ಫ್ಯೂಚರಿಸ್ಟಿಕ್ ಏರೋಗ್ಲೈಡ್ ವಿನ್ಯಾಸವನ್ನು ಹೊಂದಿದ್ದು, 18 - ಇಂಚಿನ ಡ್ಯುಯಲ್ ಟೋನ್ ಅಲಾಯ್ ವೀಲ್‌ಗಳೊಂದಿಗೆ ಕಾರು ಚಾಲನೆಯಲ್ಲಿದ್ದಾಗ ಸ್ಪೋರ್ಟಿಯಾಗಿ ಕಾಣುತ್ತದೆ. ಈ ಎಕ್ಸ್‌ಕ್ಲೂಸಿವ್ ಪ್ರೊ ವೇರಿಯೆಂಟ್ ದೊಡ್ಡ 52.9 kWh ನ ಬ್ಯಾಟರಿ ಪ್ಯಾಕ್ ಹೊಂದಿದ್ದು, ಒಂದು ಬಾರಿ ಚಾರ್ಜ್ ಮಾಡಿದರೆ ಬರೋಬ್ಬರಿ 449 ಕಿ.ಮೀ ಹಿಂದಿರುಗಿಸುತ್ತದೆ.