ಮಾರ್ಚ್‌ನಿಂದ ದೇಶದ ರಸ್ತೆಗಳಲ್ಲಿ ದಟ್ಸನ್ ಗೊ ಅಬ್ಬರ

ಜಾಗತಿಕ ಮಾರುಕಟ್ಟೆ ಪರಿಗಣಿಸಿದಾಗ ಕ್ಷಿಪ್ರ ಗತಿಯಲ್ಲಿ ಬೆಳೆದು ಬರುತ್ತಿರುವ ಭಾರತೀಯ ಮಾರುಕಟ್ಟೆಯಲ್ಲಿ ಎಂಟ್ರಿ ಲೆವೆಲ್ ಕಾರಿಗೆ ಅತಿ ಹೆಚ್ಚಿನ ಬೇಡಿಕೆಯಿದೆ. ದೇಶದ ಮಧ್ಯದ ಕುಟುಂಬದವರು ತಮ್ಮ ಮೊದಲ ಕಾರಾಗಿ ಎಂಟ್ರಿ ಲೆವೆಲ್ ಕಾರನ್ನೇ ಆಯ್ಕೆ ಮಾಡಿಕೊಳ್ಳುತ್ತಾರೆ. ಇದು ಹಣಕಾಸು ದೃಷ್ಟಿಕೋನದಲ್ಲೂ ಜನಸಾಮಾನ್ಯರಿಗೆ ಹೆಚ್ಚು ಸೂಕ್ತವೆನಿಸುತ್ತದೆ.

ಇದೇ ಕಾರಣದಿಂದಾಗಿಯೇ ಮಾರುತಿ ಆಲ್ಟೊ 800 ದೇಶದ ರಸ್ತೆಗಳಲ್ಲಿ ಅತಿ ಹೆಚ್ಚು ಯಶಸ್ಸನ್ನು ಕಂಡಿತ್ತು. ಈ ಮೂಲಕ ದೇಶದ ಮಧ್ಯಮ ವರ್ಗದವರು ತಮ್ಮ ಕಾರಿನ ಕನಸನ್ನು ನನಸಾಗಿಸಿಕೊಳ್ಳುತ್ತಿದ್ದರು. ಆದರೆ ಇದೀಗ ಪರಿಸ್ಥಿತಿ ಬದಲಾಗಿದೆ ದಟ್ಸನ್‌ನಂತಹ ಸಣ್ಣ ಬ್ರಾಂಡ್‌ಗಳು ಮಾರುತಿ ಎಂಟ್ರಿ ಲೆವೆಲ್ ಕಾರುಗಳಿಗೆ ಪ್ರತಿಸ್ಪರ್ಧಿ ಕಣಕ್ಕಿಳಿಸುತ್ತಿದೆ. ಇದು ದೇಶದ ರಸ್ತೆಗಳಲ್ಲಿ ಎಷ್ಟರ ಮಟ್ಟಿಗೆ ಯಶ ಕಾಣಲಿದೆ ಎಂಬುದಕ್ಕೆ ಮುಂದಿನ ದಿನಗಳಲ್ಲಿ ಉತ್ತರ ದೊರಕಲಿದೆ.

ನಿಸ್ಸಾನ್ ಮೈಕ್ರಾ ಫ್ಲಾಟ್‌ಫಾರ್ಮ್‌ನಲ್ಲಿ ನಿರ್ಮಾಣವಾಗಿರುವ ದಟ್ಸನ್ ಗೊ ಸಣ್ಣ ಕಾರು ತನ್ನದೇ ಆದ ವಿಶಿಷ್ಟ ವಿನ್ಯಾಸವನ್ನು ಪಡೆದುಕೊಂಡಿದೆ. ಇದು ಪ್ರಮುಖವಾಗಿಯೂ ಯುವ ಗ್ರಾಹಕರನ್ನು ಗುರಿಯಾಗಿರಿಸಿಕೊಳ್ಳಲಿದೆ.

ಈ ಬಾರಿಯ ದೆಹಲಿ ಆಟೋ ಎಕ್ಸ್‌ಪೋದಲ್ಲಿ ಒಟ್ಟು ನಾಲ್ಕು ಮಾದರಿಗಳನ್ನು ನಿಸ್ಸಾನ್ ಪರಿಚಯಿಸಲಿದೆ. ಇದರಲ್ಲಿ ದಟ್ಸನ್ ಬ್ರಾಂಡ್ ಸೇರಿದಂತೆ ಹೊಸತಾದ ಸನ್ನಿ ಹಾಗೂ ಎರಡು ಕಾನ್ಸೆಪ್ಟ್ ಕಾರುಗಳು ಇರಲಿದೆ.

ಏಳು ಸೀಟಿನ ದಟ್ಸನ್ ಗೊ ಪ್ಲಸ್ ಎಂಪಿವಿ ಸಹ ಇದೇ ಮೊದಲ ಬಾರಿಗೆ ಭಾರತದಲ್ಲಿ ಪ್ರದರ್ಶನವಾಗಲಿದೆ. ಈಗಾಗಲೇ ಇಂಡೋನೋಷ್ಯಾದಲ್ಲಿ ಅನಾವರಣವಾಗಿರುವ ದಟ್ಸನ್ ಗೊ ಪ್ಲಸ್ ಎಂಪಿವಿ ಪ್ರಮುಖವಾಗಿಯೂ ಮಾರುತಿ ಎರ್ಟಿಗಾ ಪ್ರತಿಸ್ಪರ್ಧಿಯಾಗಿರಲಿದೆ.

ಅಂದ ಹಾಗೆ ದಟ್ಸನ್ ಗೊ ಹ್ಯಾಚ್‌ಬ್ಯಾಕ್ ಕಾರು 1.2 ಲೀಟರ್ ಪೆಟ್ರೋಲ್ ಎಂಜಿನ್‌ನಿಂದ ನಿಯಂತ್ರಿಸಲ್ಪಡಲಿದೆ. ಇದು ಒಟ್ಟಾರೆಯಾಗಿ ಮಾರುಕಟ್ಟೆಯಲ್ಲಿ ಹೊಸ ಸಂಚಲನ ಮೂಡಿಸಲಿದೆ.