ಜನಪ್ರಿಯ ಮಾರುತಿ ಸ್ವಿಫ್ಟ್ ವಿಶೇಷ ಆವೃತ್ತಿ ಲಾಂಚ್

By Nagaraja

Published: Thursday, September 19, 2013, 12:52 [IST]

ದೇಶದ ಅತಿದೊಡ್ಡ ಕಾರು ತಯಾರಕ ಸಂಸ್ಥೆಯಾಗಿರುವ ಮಾರುತಿ ಸುಜುಕಿ, ತನ್ನ ಜನಪ್ರಿಯ ಸ್ವಿಫ್ಟ್ ಮಾದರಿಯ ವಿಶೇಷ ಆವೃತ್ತಿಯೊಂದನ್ನು ಲಾಂಚ್ ಮಾಡಿದೆ. ಸದ್ಯ ಬಿಡುಗಡೆಯಾಗಿರುವ ಸ್ವಿಫ್ಟ್ ಎಕ್ಸ್‌ಡಿಐ ಸ್ಪೆಷಲ್ ಎಡಿಷನ್ ರಾಜಸ್ತಾನ ಮಾರುಕಟ್ಟೆಯಲ್ಲಿ ಮಾತ್ರ ಲಭ್ಯವಿರಲಿದೆ. ಇದು ಕಾರು ಪ್ರಿಯರ ನಿರಾಸೆಗೆ ಕಾರಣವಾಗಿದ್ದರೂ ನಿಕಟ ಭವಿಷ್ಯದಲ್ಲೇ ದೇಶದ ಇತರ ಮಾರುಕಟ್ಟೆ ಪ್ರವೇಶಿಸುವ ನಿರೀಕ್ಷೆಯಿದೆ.

ಎಲ್‌ಎಕ್ಸ್‌ಐ ಮತ್ತು ಎಲ್‌ಡಿಐ ವೆರಿಯಂಟ್ ತಲಹದಿಯಲ್ಲಿ ವಿಶೇಷ ಎಕ್ಸ್‌ಡಿಐ ವೆರಿಯಂಟ್ ರೂಪಿಸಲಾಗಿದ್ದು ಇದು ಅನೇಕ ವಿನೂತನ ಫೀಚರುಗಳನ್ನು ಹೊಂದಿರಲಿದೆ. ನೂತನ ಎಕ್ಸ್‌ಡಿಐ ವಿಶೇಷ ಆವೃತ್ತಿಯು ಫ್ರಂಟ್ ಫಾಗ್ ಲೈಟ್ ಜತೆಗೆ ವಿಂಗ್ ಮಿರರ್‌ನಲ್ಲಿ ಸಂಯೋಜಿತ ಟರ್ನ್ ಇಂಡಿಕೇಟರ್ ಪಡೆದುಕೊಂಡಿದೆ. ಹಾಗೆಯೇ ಈ ಪ್ಯಾಕೇಜ್‌ನ ಭಾಗವಾಗಿ ಸಂಪೂರ್ಣ ವೀಲ್ ಕವರ್ ಸಹ ಆಫರ್ ಮಾಡಲಾಗುತ್ತಿದೆ.

ಕಾರಿನ ಒಳಗಡೆ 2 ಸ್ಪೀಕರ್ ಜತೆಗೆ 2 ಡಿನ್ ಮ್ಯೂಸಿಕ್ ಸಿಸ್ಟಂ, ಲೆಥರ್ ಸೀಟು ಕವರ್, ಸೆಂಟ್ರಲ್ ಲಾಕಿಂಗ್ ಮತ್ತು ಕೀಲೆಸ್ ಎಂಟ್ರಿ, ಫ್ರಂಟ್ ಪವರ್ ವಿಂಡೋ, ರಿಯರ್ ಪಾರ್ಕಿಂಗ್ ಸೆನ್ಸಾರ್, ಡೋರ್ ಸಿಲ್ ಗಾರ್ಡ್ ಜತೆಗೆ ಸ್ವಿಫ್ಟ್ ಲೊಗೊಗಳಂತಹ ವೈಶಿಷ್ಟ್ಯಗಳನ್ನು ಪಡೆದುಕೊಳ್ಳಲಿದೆ.

ನೀವು ರು. 40,000 ಹೆಚ್ಚು ಪಾವತಿಸಲು ತಯಾರಾಗಿದ್ದರೆ ಫಾಗ್ ಲೈಟ್, ಸೆಂಟ್ರಲ್ ಲಾಕಿಂಗ್ ಮತ್ತು ಫ್ರಂಟ್ ವೀಲ್ ವಿಂಡೋ ವೈಶಿಷ್ಟ್ಯಗಳ ಸೌಲಭ್ಯವನ್ನು ಪಡೆಯಬಹುದಾಗಿದೆ. ಸಾಮಾನ್ಯ ಎಲ್‌ಎಕ್ಸ್‌ಐ ದರ 5.06 ಲಕ್ಷ ರು.ಗಳಾಗಿವೆ. ಹಾಗೆಯೇ ಸ್ವಿಫ್ಟ್ ಡೀಸೆಲ್ ಎಲ್‌ಡಿಐ ದರ 6.26 ಲಕ್ಷ ರು.ಗಳಾಗಿವೆ.