ವರ್ಷದ ವಿಶ್ವ ಕಾರು - ಫೋಕ್ಸ್‌ವ್ಯಾಗನ್ ಗಾಲ್ಫ್

ಒಟ್ಟು 25 ರಾಷ್ಟ್ರಗಳ 66 ತೀರ್ಪುಗಾರರ ಸಮಿತಿಯು ವಿಜೇತ ಕಾರನ್ನು ಘೋಷಿಸಿದೆ. ನ್ಯೂಯಾರ್ಕ್ ಅಂತರಾಷ್ಟ್ರೀಯ ಆಟೋ ಶೋದಲ್ಲಿ ವಿಜೇತರನ್ನು ಘೋಷಿಸಲಾಗಿದೆ. ಮರ್ಸಿಡಿಸ್ ಬೆಂಜ್ ಎ ಕ್ಲಾಸ್ ಕೂಡಾ ನಿಕಟ ಪ್ರತಿಸ್ಪರ್ಧಿಯೆನಿಸಿತ್ತು.

ಫೋಕ್ಸ್‌ವ್ಯಾಗನ್ ಸಂಸ್ಥೆಯ ವಿನ್ಯಾಸ ವಿಭಾಗದ ಅಧಿಪತಿ ವಾಲ್ಟರ್ ಡಿಸಿಲ್ವ ಪ್ರಶಸ್ತಿ ಸ್ವೀಕರಿಸಿಕೊಂಡರು. ಅಂದ ಹಾಗೆ ಈ ಏಳನೇ ಜನರೇಷನ್ ಗಾಲ್ಫ್ ಕಾರು ಮುಂದಿನ ತಿಂಗಳಲ್ಲಿ ಆಸ್ಟ್ರೇಲಿಯಾ ಪ್ರವೇಶ ಮಾಡುತ್ತಿದೆ.

ಮರ್ಸಿಡಿಸ್ ಬೆಂಝ್ ಎ ಕ್ಲಾಸ್ ಸೇರಿದಂತೆ 42 ಕಾರುಗಳನ್ನು ಹಿಂದಿಕ್ಕಿರುವ ಫೋಕ್ಸ್‌ವ್ಯಾಗನ್ ಪ್ರಶಸ್ತಿ ತನ್ನದಾಗಿಸಿಕೊಂಡಿದೆ.

ಈ ಹಿಂದೆ 2009ರಲ್ಲಿ ಫೋಕ್ಸ್‌ವ್ಯಾಗನ್ ಗಾಲ್ಫ್, 2010ರಲ್ಲಿ ಫೋಕ್ಸ್‌ವ್ಯಾಗನ್ ಪೊಲೊ ಹಾಗೂ 2012ರಲ್ಲಿ ಫೋಕ್ಸ್‌ವ್ಯಾಗನ್ ಅಪ್ ಪ್ರಶಸ್ತಿ ಗೆದ್ದುಕೊಂಡಿತ್ತು.

ಇನ್ನು ವರ್ಷದ ಅತ್ಯುತ್ತಮ ನಿರ್ವಹೆಯ ಕಾರು ಪ್ರಶಸ್ತಿಗೆ ಫೋರ್ಷೆ ಬಾಕ್ಸ್ಟರ್/ಕೇಮ್ಯಾನ್ ಅರ್ಹವಾಗಿದೆ.

ಮೂರು ಫೈನಲಿಸ್ಟ್ ಸೇರಿದಂತೆ ಒಟ್ಟು 22 ಕಾರುಗಳನ್ನು ಹಿಂದಿಕ್ಕಿರುವ ಪೋರ್ಷೆ ಪ್ರಶಸ್ತಿಗೆ ಅರ್ಹವಾಗಿದೆ. ಫೆರಾರಿ ಹಾಗೂ ಟೊಯೊಟಾ ಕಾರುಗಳು ಅಂತಿಮ ಸುತ್ತಿನಲ್ಲಿದ್ದವು.

ಇದು ಸತತ ಎರಡನೇ ಬಾರಿಗೆ ಪೋರ್ಷೆ ಪ್ರಶಸ್ತಿ ಗೆಲ್ಲುತ್ತಿದೆ. ಕಳೆದ ವರ್ಷ ಪೋರ್ಷೆ 911 ಪ್ರಶಸ್ತಿ ಬಗಲಿಗೇರಿಸಿಕೊಂಡಿತ್ತು.

ಹಾಗೆಯೇ ವರ್ಷದ ಅತ್ಯುತ್ತಮ ವಿನ್ಯಾಸ ಕಾರು ಪ್ರಶಸ್ತಿಗೆ ಜಾಗ್ವಾರ್ ಎಫ್-ಟೈಪ್ ಕನ್ವೆರ್ಟಿಬಲ್ ಪಾತ್ರವಾಗಿದೆ.

ಆಸ್ಟನ್ ಮಾರ್ಟಿನ್ ವಾಂಗ್ವಿಷ್ ಹಾಗೂ ಮಜ್ದಾ ಕಾರುಗಳನ್ನು ಹಿಂದಿಕ್ಕಿರುವ ಜಾಗ್ವಾರ್ ಪ್ರಶಸ್ತಿಗೆ ಭಾಜನವಾಗಿದೆ.

ಅಂತೆಯೇ ವರ್ಲ್ಡ್ ಗ್ರೀನ್ ಕಾರು ಪ್ರಶಸ್ತಿಯನ್ನು ಟೆಸ್ಲಾ ಮಾಡೆಲ್ ಎಸ್ ಪಡೆದುಕೊಂಡಿದೆ.

ರೆನೊ ಹಾಗೂ ವೋಲ್ವೋ ವಿದ್ಯುತ್ ಚಾಲಿತ ವಾಹನಗಳನ್ನು ಹಿಂದಿಕ್ಕಿರುವ ಟೆಸ್ಲಾ ಹಸಿರು ಪ್ರಶಸ್ತಿ ಗೆದ್ದುಕೊಂಡಿದೆ.