ಡ್ರೈವಿಂಗ್ ಸಮಯದಲ್ಲಿ ಭೂಕಂಪವಾದರೆ ಏನು ಮಾಡಬೇಕು?

ಭೂಕಂಪದಂತಹ ಪ್ರಕೃತಿ ವಿಕೋಪಗಳ ಸಂದರ್ಭದಲ್ಲಿ ವಾಹನ ಸವಾರಿ ಮಾಡುತ್ತಿದ್ದರೆ ಏನು ಮಾಡಬೇಕು? ಪ್ರಶ್ನೆ ಸರಳವಾಗಿ ಕಂಡರೂ ಈ ಸಂದರ್ಭದಲ್ಲಿ ಕೆಲವರು ಎಚ್ಚರಿಕೆ ವಹಿಸುವುದನ್ನು ಮರೆಯುತ್ತಾರೆ. ಡ್ರೈವಿಂಗ್ ಮಾಡುತ್ತಿರುವಾಗ ಭೂಕಂಪದ ಅನುಭವವಾದರೆ ಏನು ಮಾಡಬೇಕು? ಯಾವ ರೀತಿ ಪಾರಾಗಬೇಕು? ಇಲ್ಲಿದೆ ಸಲಹೆ.

* ಸಮ್‌ಥಿಂಗ್ ರಾಂಗ್: ರಸ್ತೆಯಲ್ಲಿ ಕಾರು ಚಾಲನೆ ಮಾಡುತ್ತಿದ್ದಾಗ ಯಾಕೋ ಏನೋ ಸರಿಯಿಲ್ಲ ಎಂದೆನಿಸಬಹುದು. ರಸ್ತೆಯಲ್ಲಿ ಯಾವುದಾದರೂ ಪಲ್ಲಟ ಕಾಣಬಹುದು. ಅಥವಾ ಕಾರಿನೊಳಗೆ ಕುಲುಕಾಡಿದ ಅನುಭವವಾಗಬಹುದು. ರಸ್ತೆಯಲ್ಲಿ ಒಮ್ಮೆಗೆ ಬಿರುಕುಗಳು ಕಂಡುಬರಬಹುದು. ಭೂಕಂಪದ ಸೂಚನೆಯನ್ನು ನಿರ್ಲಕ್ಷಿಸಬೇಡಿ.

* ರಸ್ತೆ ಬದಿಗೆ ಕಾರು ತನ್ನಿ: ಭೂಕಂಪದ ಅನುಭವವಾದ ತಕ್ಷಣ ಕಾರನ್ನು ರಸ್ತೆ ಬದಿಗೆ ತರಲು ಪ್ರಯತ್ನಿಸಿ. ಸಂಚಾರ ದಟ್ಟಣೆ ಹೆಚ್ಚಿರುವ ಸಂದರ್ಭದಲ್ಲಿ ಗಾಬರಿ ಕ್ರೀಯೆಟ್ ಮಾಡದಿರಿ. ರಸ್ತೆಯಲ್ಲಿ ವಾಹನಗಳ ನೂಕುನುಗ್ಗಲು ಉಂಟಾದರೆ ಮತ್ತಷ್ಟು ಅಪಾಯ. ಸಾವಧಾನವಾಗಿ ಕಾರನ್ನು ರಸ್ತೆ ಪಕ್ಕಕ್ಕೆ ತನ್ನಿರಿ.

* ವಾಹನವನ್ನು ಮೇಲ್ಸೆತುವೆ, ಕಟ್ಟಡ, ವಿದ್ಯುತ್ ಕಂಬಗಳ ಕೆಳಗೆ ನಿಲ್ಲಿಸಬೇಡಿ. ಯಾಕೆಂದರೆ ಕಾರಿನ ಬಾಡಿ ಹೆಚ್ಚು ಗಟ್ಟಿಮುಟ್ಟಾಗಿರುವುದಿಲ್ಲ. ಅದರ ಮೇಲೆ ಕಟ್ಟಡಗಳು, ಮೇಲ್ಸೆತುವೆ ಉರುಳಿಬಿದ್ದರೆ ಅಪಾಯ.

* ಕಾರಿನ ಎಂಜಿನ್ ಆಫ್ ಮಾಡಿ. ಹ್ಯಾಂಡ್ ಬ್ರೇಕ್ ಹಾಕಿ. ಕಾರಿನೊಳಗೆ ರೇಡಿಯೋ ಅಥವಾ ಇಂಟರ್ನೆಟ್ ಸಂಪರ್ಕವಿದ್ದರೆ ಭೂಕಂಪದ ತಾಜಾ ಮಾಹಿತಿ ಪಡೆಯಲು ಯತ್ನಿಸಿ. ಅದರಲ್ಲಿ ಎಚ್ಚರಿಕೆಯ ಸೂಚನೆಗಳು ಬರಬಹುದು. ಹೆಚ್ಚು ಟೆನ್ಷನ್ ಆಗದಿರಿ.

* ಭೂಕಂಪನದ ಅನುಭವ ನಿಲ್ಲುವರೆಗೆ ಕಾರಿನೊಳಗೆ ಇರಿ. ಹೊರಕ್ಕೆ ಬರದಿರಿ. ಭೂಕಂಪನದ ಅನುಭವ ನಿಂತ ನಂತರ ಹೊರಭಾಗದ ಪರಿಸರ ಅವಲೋಕಿಸಿ. ಕರೆಂಟ್ ವಯರ್ ತುಂಡಾಗಿ ರಸ್ತೆಯಲ್ಲಿ ಬಿದ್ದಿರಬಹುದು. ಕಾರಿಗೆ ಏನಾದರೂ ಅಪಾಯವಾಗಿರುವುದೇ ಪರಿಶೀಲಿಸಿ. ಕಾರಿನೊಳಗಿರುವ ಪ್ರಯಾಣಿಕರೆಲ್ಲ ಸುರಕ್ಷಿತವಾಗಿದ್ದಾರೆಯೇ ಪರಿಶೀಲಿಸಿ.

* ನೀವಿರುವ ಪರಿಸರದಲ್ಲಿ ಭೂಕಂಪದಿಂದ ಹೆಚ್ಚು ಹಾನಿ ಸಂಭವಿಸಿದರೆ ತುರ್ತು ಸಂಖ್ಯೆಗಳಿಗೆ ಕರೆ ಮಾಡಿ ಡಿಸ್ಟರ್ಬ್ ಮಾಡದಿರಿ. ಯಾಕೆಂದರೆ ಅವರೂ ಈಗಾಗಲೇ ತುರ್ತುಕಾರ್ಯ ಆರಂಭಿಸಿರಬಹುದು. ನಿಮಗೆ ಅಥವಾ ಕಾರಿನಲ್ಲಿದ್ದ ಪ್ರಯಾಣಿಕರಿಗೆ ಏನಾದರೂ ಗಾಯವಾಗಿದ್ದರೆ ತಕ್ಷಣ ಪ್ರಥಮ ಚಿಕಿತ್ಸೆ ನೀಡಲು ಆದ್ಯತೆ ನೀಡಿರಿ.

* ಆದಷ್ಟು ಬೇಗ ಹೆಚ್ಚು ಸುರಕ್ಷಿತವಾಗಿರುವ ಪ್ರದೇಶಕ್ಕೆ ಹೋಗಿರಿ.

* ರಸ್ತೆಯಲ್ಲಿ ಪ್ರವಾಹ ಬಂದಿದ್ದರೆ, ಅದರ ಮೇಲೆ ವಾಹನ ಸವಾರಿ ಮಾಡುವ ದುಸ್ಸಾಹಸ ಕೈಗೊಳ್ಳದಿರಿ.

* ರಸ್ತೆಯಲ್ಲಿ ಬೃಹತ್ ಬಿರುಕು ಉಂಟಾಗಿದ್ದರೆ ಅದರ ಅಕ್ಕಪಕ್ಕ ಡ್ರೈವಿಂಗ್ ಮಾಡದಿರಿ.

* ಆದಷ್ಟು ಸಮುದ್ರ ತೀರದಲ್ಲಿ ವಾಹನ ಸವಾರಿ ತಪ್ಪಿಸಿ. ಯಾಕೆಂದರೆ ಭೂಕಂಪದ ಕಾರಣದಿಂದ ಸುನಾಮಿ ಉಂಟಾಗುವ ಸಂಭಾವ್ಯತೆ ಇರುತ್ತದೆ.

* ಒಂದು ಚಿಕ್ಕ ಭೂಕಂಪ ಉಂಟಾದ ನಂತರ ಮತ್ತೊಂದು ಭೂಕಂಪ ಸಂಭವಿಸುವ ಸಾಧ್ಯತೆ ಹೆಚ್ಚಿರುತ್ತದೆ. ಅದರ ನೆನಪಿನಲ್ಲಿಟ್ಟುಕೊಂಡು ಸುರಕ್ಷಿತವಾಗಿರಿ. ಕಟ್ಟಡಗಳು, ಸೇತುವೆಗಳು, ಮರಗಳಡಿ ನಿಲ್ಲದಿರಿ. ಭಯಪಡಬೇಡಿ ದೇವರಿದ್ದಾನೆ...