ಲೋಕಸಭಾ ಚುನಾವಣಾ ಪ್ರಚಾರಕ್ಕೆ ಬಿಜೆಪಿ ಹೈಟೆಕ್ ಗಾಡಿ

ಈ ಹೈಟೆಕ್ ಬಸ್ಸಿಗೆ ಬೆಂಗಳೂರಿನ ಜಗನ್ನಾಥ ಭವನದಲ್ಲಿ ಉತ್ತರ ಲೋಕಸಭಾ ಬಿಜೆಪಿ ಅಭ್ಯರ್ಥಿ ಹಾಗೂ ಮಾಜಿ ಮುಖ್ಯಮಂತ್ರಿ ಡಿ.ವಿ. ಸದಾನಂದ ಗೌಡ ಅವರು ವಿದ್ಯುಕ್ತ ಚಾಲನೆ ನೀಡಿದರು.

ಇನ್ನೇನು ರಾಜ್ಯ ನಾಯಕರ ಪ್ರವಾಸಕ್ಕೆ ಬಳಕೆಯಾಗಲಿರುವ ಈ ಹೈಟೆಕ್ ಬಸ್ಸು ಅನ್ನು ಮಾಜಿ ಕೈಗಾರಿಕಾ ಸಚಿವ ಮುರುಗೇಶ್ ನಿರಾಣಿ ಕೊಡುಗೆಯಾಗಿ ನೀಡಿದ್ದಾರೆ.

ಸ್ವರಾಜ್ ಮಾಜ್ದಾ ಕಂಪನಿಯ ಈ ಬಸ್ಸನ್ನು ಪಂಜಾಬ್‌ನಿಂದ ತಯಾರಿಸಲಾಗಿದ್ದು, ಚಾಸೀಗೆ ಮುಂಬೈನ ಡಿಸಿ ಡಿಸೈನ್ ಪ್ರೈವೇಟ್ ಲಿಮಿಟೆಡ್ ಕಂಪನಿಯು ವಿಶೇಷ ವಿನ್ಯಾಸಗೊಳಿಸಿದೆ.

ಇದರಲ್ಲಿ ಆಧುನಿಕ ಸೌಲಭ್ಯಗಳಿದ್ದು, ಎಂಟು ಜನರಿಗೆ ಆರಾಮದಾಯಕವಾಗಿ ಪ್ರವಾಸ ಮಾಡಬಹುದಾಗಿದೆ. ಅಷ್ಟೇ ಅಲ್ಲದೆ ಹೈಡ್ರಾಲಿಕ್ ಲಿಫ್ಟ್ ಮುಖಾಂತರ ಮೇಲ್ಛಾವಣಿಯಿಂದಲೇ ಭಾಷಣ ಮಾಡುವ ವ್ಯವಸ್ಥೆಯಿರುತ್ತದೆ.

ಇದರಿಂದಾಗಿ ತುರ್ತು ಸಂದರ್ಭಗಳಲ್ಲಿ ನಾಯಕರು ಪ್ರವಾಸದ ಮಧ್ಯೆ ಗ್ರಾಮ ಹಾಗೂ ತಾಲೂಕು ಪ್ರದೇಶಗಳಲ್ಲಿ ರೋಡ್ ಶೋ ಜತೆ ಬಿರುಸಿನ ಪ್ರಚಾರ ನಡೆಸಲು ಅನುಕೂಲವಾಗಲಿದೆ.

ಇನ್ನು ನಾಯಕರು ವಾಹನದಲ್ಲಿಯೇ ಪ್ರವಾಸದ ಮಧ್ಯೆ ಮಾಧ್ಯಮಗಳಿಗೆ ಸಂದರ್ಶನವನ್ನು ಸಹ ನೀಡಬಹುದಾಗಿದೆ. ಇನ್ನುಳಿದಂತೆ ಡಿಶ್ ಟಿ.ವಿ ಸೌಲಭ್ಯವನ್ನು ಹೊಂದಿದ್ದು, ನಾಯಕರು ವಾಹನದಲ್ಲಿರುವ ಎರಡು ಎಲ್‌ಸಿಡಿ ಮುಖಾಂತರ ಟಿ.ವಿಯನ್ನು ವೀಕ್ಷಿಸಬಹುದು.

ಹಾಗೆಯೇ ಸಮರ್ಪಕ ಜನರೇಟರ್, ಎಸಿ, ಫ್ರಿಡ್ಜ್, ಸಿಸಿ ಟಿವಿ, ಧ್ವನಿವರ್ಧಕ, ಟೇಬಲ್, ಕಪ್ ಹೋಲ್ಡರ್ ಹಾಗೂ ಶೌಚಾಲಯ ವ್ಯವಸ್ಥೆಗಳನ್ನು ಈ ಹೈಟೆಕ್ ಬಸ್ ಹೊಂದಿರುತ್ತದೆ.

ವಾಹನದ ಹೊರಗಡೆ ಎಲ್ಲ ಪ್ರಮುಖ ನಾಯಕರ ಭಾವಚಿತ್ರಗಳು, ಬಿಜೆಪಿ ಲಾಂಛನ ಜತೆಗೆ 'ಈ ಬಾರಿ ಮೋದಿ ಸರ್ಕಾರ' ಎಂಬ ದೊಡ್ಡಕ್ಷರದ ಘೋಷವಾಕ್ಯವನ್ನು ನೋಡಬಹುದಾಗಿದೆ.

ಹಾಗೆಯೇ ಪ್ರಧಾನಿ ಅಭ್ಯರ್ಥಿ ನರೇಂದ್ರ ಮೋದಿ ಭಾವಚಿತ್ರ ಮತ್ತು 'ನಾನು ಜನನಾಯಕನಲ್ಲ, ಜನಸೇವಕ' ಎಂಬ ಘೋಷವಾಕ್ಯವನ್ನು ಉಲ್ಲೇಖಿಸಲಾಗಿದೆ.

'ಕೇವಲ ಬದಲಾವಣೆಯನ್ನು ಅಪೇಕ್ಷಿಸಬೇಡಿ, ಬದಲಾವಣೆಗಾಗಿ ಮತ ನೀಡಿ, ಬಿಜೆಪಿಯನ್ನು ಚುನಾಯಿಸಿ'. 'ಭಾರತಕ್ಕಾಗಿ ಮತ ನೀಡಿ, ಭಾರತ ಗೆಲ್ಲಿಸಿ' ಎಂಬ ಉಲ್ಲೇಖವನ್ನು ಕಾಣಬಹುದು.

ಒಟ್ಟಿನಲ್ಲಿ ಈ ಹೈಟೆಕ್ ಗಾಡಿಯ ಬೆಲೆ ಎಷ್ಟು ಎಂಬುದು ತಿಳಿದು ಬಂದಿಲ್ಲ. ಪ್ರಸ್ತುತ ಬಸ್ ಬಿಜೆಪಿ ಚುನಾವಣಾ ಪ್ರಚಾರ ಕಾರ್ಯಕ್ಕೆ ಬಿಸಿ ಮುಟ್ಟಿಸಲಿದೆ ಎಂಬುದರಲ್ಲಿ ಎರಡು ಮಾತಿಲ್ಲ.