ಭಾರತೀಯ ಉದ್ಯಮಿಗಾಗಿ ವಿಶೇಷ ಕಾರನ್ನು ಸಿದ್ದಪಡಿಸಿದ ಫೆರಾರಿ

ಫೆರಾರಿ ಕಂಪನಿಯು ಸೂಪರ್ ಕಾರುಗಳನ್ನು ಉತ್ಪಾದಿಸುತ್ತದೆ. ಕಂಪನಿಯು ಭಾರತೀಯ ಉದ್ಯಮಿಯೊಬ್ಬರಿಗಾಗಿ ವಿಶೇಷ ಕಾರೊಂದನ್ನು ಸಿದ್ಧಪಡಿಸಿದ್ದು, ಆ ಕಾರನ್ನು ವಿಮಾನದ ಮೂಲಕ ಭಾರತಕ್ಕೆ ಕಳುಹಿಸುತ್ತಿದೆ ಎಂದು ವರದಿಯಾಗಿದೆ. ಭಾರತದ ಅಗ್ರಗಣ್ಯ ಉದ್ಯಮಿಗಳಲ್ಲಿ ಯೋಹಾನ್ ಪೂನವಾಲಾ ಸಹ ಒಬ್ಬರು. ಫೆರಾರಿ ಕಂಪನಿಯು ಯೋಹಾನ್ ಪೂನವಾಲಾರವರಿಗಾಗಿ ಫೆರಾರಿ 488 ಪಿಸ್ತಾ ಸ್ಪೈಡರ್ ಕಾರನ್ನು ವಿಶೇಷವಾಗಿ ಕಸ್ಟಮೈಸ್ ಮಾಡಿದೆ.

ಯೋಹಾನ್ ಪೂನವಾಲಾ ಫೆರಾರಿಯ 458 ಸ್ಪೆಷಿಯಲ್ ಅಪರ್ಟಾ ಕಾರನ್ನು ಸಹ ಹೊಂದಿದ್ದಾರೆ. ಅಂದ ಹಾಗೆ ಯೋಹಾನ್ ಪೂನವಾಲಾ ಭಾರತದಲ್ಲಿ ಈ ಕಾರನ್ನು ಬಳಸಿದ ಏಕೈಕ ವ್ಯಕ್ತಿ. ಈಗ ತಮ್ಮಿಷ್ಟದ ವಿಶೇಷ ಪರಿಕರ ಹಾಗೂ ಐಷಾರಾಮಿ ಸೌಕರ್ಯಗಳನ್ನು ಹೊಂದಿರುವ ಹೊಸ ಫೆರಾರಿ 488 ಪಿಸ್ತಾ ಸ್ಪೈಡರ್ ಕಾರನ್ನು ಖರೀದಿಸಿದ್ದಾರೆ.

ಈ ಕಾರಿನ ಫೋಟೋವನ್ನು ಇನ್‌ಸ್ಟಾಗ್ರಾಮ್ ಬಳಕೆದಾರರಾದ ಥ್ರೊಟ್ 97ಶೇರ್ ಮಾಡಿದ್ದಾರೆ. ಅವರು ಮಾಡಲಾದ ಪೋಸ್ಟ್ ಅನ್ನು ಗಮನಿಸಿದರೆ ಈ ಕಾರು ಭಾರತಕ್ಕೆ ಬಂದಿಳಿದಿರುವುದು ಕಂಡು ಬರುತ್ತದೆ.

ಕೆಂಪು ಬಣ್ಣದಲ್ಲಿರುವ ಈ ಕಾರು ಹಾರ್ಡ್‌ಟಾಪ್ ಕನ್ವರ್ಟಿಬಲ್ ಮಾದರಿಯಾಗಿದೆ. ಈ ಕಾರಿನಲ್ಲಿ ಯಾವ ವಿಶೇಷ ಫೀಚರ್ ಗಳನ್ನು ಅಳವಡಿಸಲಾಗಿದೆ ಎಂಬುದನ್ನು ಬಹಿರಂಗಪಡಿಸಿಲ್ಲ. ಆದರೆ ಕಾರಿನ ಬ್ಯಾಡ್ಜ್‌ಗಳ ಆಧಾರದ ಮೇಲೆ ಕಾರು ವಿವಿಧ ಫೀಚರ್ ಗಳನ್ನು ಹೊಂದಿದೆ ಎಂಬುದನ್ನು ಖಚಿತವಾಗಿ ಹೇಳಬಹುದು.

ಕಾರುಗಳ ಬಲಭಾಗ ಹಾಗೂ ಎಡಭಾಗದಲ್ಲಿ 'ಪಿ' ಅಕ್ಷರದ ಸ್ಟಿಕ್ಕರ್‌ಗಳಿವೆ. ಪಿ ಎಂದರೆ ಪೂನಾವಾಲಾ ಎಂದಾಗುತ್ತದೆ. ಇದು ಮಾತ್ರವಲ್ಲದೇ ಕಾರಿನ ಮೇಲೆ ಯೋಹಾನ್ ಪೂನವಾಲಾಗಾಗಿ ವಿಶೇಷವಾಗಿ ತಯಾರಿಸಿದ ಕಾರು ಎಂದು ಬರೆಯಲಾಗಿದೆ.

ಇದು ಯೋಹಾನ್ ಪೂನವಾಲಾರವರ ಗ್ಯಾರೇಜ್‌ನಲ್ಲಿರುವ ಎರಡನೇ ಫೆರಾರಿ ಕಾರು. ಯೋಹಾನ್ ಪೂನವಾಲಾ ಫೆರಾರಿ ಕಾರುಗಳನ್ನು ಮಾತ್ರವಲ್ಲದೆ ವಿವಿಧ ರೀತಿಯ ಸೂಪರ್ ಕಾರುಗಳನ್ನು ಸಹ ಹೊಂದಿದ್ದಾರೆ.

ಅವುಗಳಲ್ಲಿ ಮರ್ಸಿಡಿಸ್ ಬೆಂಝ್ ಎಎಂಜಿ ಜಿಟಿ ಆರ್ ರೋಡ್ ಸ್ಟರ್, ರೋಲ್ಸ್ ರಾಯ್ಸ್ ಫ್ಯಾಂಟಮ್, ರೋಲ್ಸ್ ರಾಯ್ಸ್ ಫ್ಯಾಂಟಮ್ ಡ್ರಾಪ್ ಹೆಡ್ ಕೂಪೆ, ಲ್ಯಾಂಬೊರ್ಗಿನಿ ಗಲ್ಲಾರ್ಡೊ, ಮರ್ಸಿಡಿಸ್ ಬೆಂಝ್ ಎಸ್‌ಎಲ್‌ಎಸ್ ಎಎಂಜಿ, ಬೆಂಟ್ಲಿ ಫ್ಲೈಯಿಂಗ್ ಸ್ಪರ್ ಕಾರುಗಳು ಸೇರಿವೆ.

ಫೆರಾರಿ 488 ಪಿಸ್ತಾ ಸ್ಪೈಡರ್ ಕಾರಿನಲ್ಲಿ 3.9 ಲೀಟರಿನ ವಿ 8 ಎಂಜಿನ್ ಅಳವಡಿಸಲಾಗಿದೆ. ಈ ಎಂಜಿನ್ 720 ಬಿಹೆಚ್‌ಪಿ ಪವರ್ ಹಾಗೂ 770 ಎನ್‌ಎಂ ಟಾರ್ಕ್ ಉತ್ಪಾದಿಸುತ್ತದೆ. ಈ ಕಾರು ಕೇವಲ 2.85 ಸೆಕೆಂಡುಗಳಲ್ಲಿ 0-100 ಕಿ.ಮೀ ವೇಗವನ್ನು ಆಕ್ಸಲರೇಟ್ ಮಾಡುತ್ತದೆ.

ಈ ಎಂಜಿನ್, ವರ್ಷದ ಎಂಜಿನ್ ಎಂಬ ಹಿರಿಮೆಯನ್ನು ಹೊಂದಿದೆ. ಈ ಕಾರಿನ ಟಾಪ್ ಸ್ಪೀಡ್ ಪ್ರತಿ ಗಂಟೆಗೆ ಗರಿಷ್ಠ 340 ಕಿ.ಮೀಗಳಾಗಿದೆ. ಈ ವೇಗಕ್ಕೆ ಅನುಸಾರವಾಗಿ ಈ ಕಾರಿನಲ್ಲಿ ಕಾರ್ಬನ್ ಫೈಬರ್ ರೇಸ್ ವ್ಹೀಲ್ ಗಳನ್ನು ಬಳಸಲಾಗುತ್ತದೆ. ಈ ವ್ಹೀಲ್ ಗಳು ಅಲ್ಯೂಮಿನಿಯಂ ವ್ಹೀಲ್ ಗಳಿಗಿಂತ ಹೆಚ್ಚು ಹಗುರವಾಗಿರುತ್ತವೆ.

ಈ ಕಾರಿನ ಆರಂಭಿಕ ಮಾದರಿಯ ಬೆಲೆ ಸುಮಾರು ರೂ.3 ಕೋಟಿಗಳಾಗಿದೆ. ಯೋಹಾನ್ ಪೂನಾವಾಲಾ ಖರೀದಿಸುತ್ತಿರುವ ಈ ಕಾರಿನಲ್ಲಿ ಹೆಚ್ಚುವರಿ ಆಕ್ಸೆಸರಿಸ್ ಗಳನ್ನು ಅಳವಡಿಸಿರುವುದರಿಂದ ಈ ಕಾರಿನ ಬೆಲೆ ಮತ್ತಷ್ಟು ಹೆಚ್ಚಾಗುವ ಸಾಧ್ಯತೆಗಳಿವೆ.

ಫೆರಾರಿ ಕಂಪನಿಯು ಫೆರಾರಿ 488 ಪಿಸ್ತಾ ಸ್ಪೈಡರ್ ಕಾರನ್ನು ಸೀಮಿತ ಆವೃತ್ತಿಯಲ್ಲಿ ಮಾತ್ರ ಮಾರಾಟ ಮಾಡಲು ಬಯಸಿದೆ. ಇದಕ್ಕಾಗಿ ಕಂಪನಿಯು ಈ ಕಾರಿನ 3,500 ಯುನಿಟ್ ಗಳನ್ನು ಮಾತ್ರ ತಯಾರಿಸುತ್ತಿದೆ.