ಬಾಡಿಗೆಯಿಂದ ಮುಕ್ತಿಗಾಗಿ ವಾಹನವನ್ನೇ ಮನೆಯಾಗಿ ಪರಿವರ್ತಿಸಿದ ಮಾಜಿ ಸೈನಿಕ

ಲೀಡ್ಸ್ ಮೂಲದ 25ರ ಹರೆಯದ ಜೆಮಿ ವ್ಯಾಂಡಿಗ್ಟನ್ ಎಂಬವರ ಮನದಲ್ಲೇ ಈ ವಿನೂತನ ಯೋಚನೆ ಹೊಳೆದಿತ್ತು. ಅವರು ಪ್ರತಿ ತಿಂಗಳು ಬಾಡಿಗೆ ಮನೆಗಾಗಿ 800 ಪೌಂಡ್ ಗಳಷ್ಟು ವ್ಯಯ ಮಾಡುತ್ತಿದ್ದರು.

ಆದರೂ ಮನೆ ಕಟ್ಟುವಷ್ಟು ಆರ್ಥಿಕ ಸ್ಥಿತಿ ಅವರಲ್ಲಿರಲಿಲ್ಲ. ಹಾಗಾಗಿ ವ್ಯಾನ್ ವೊಂದನ್ನು ಮನೆಯ ರೂಪದಲ್ಲಿ ಮಾರ್ಪಾಡುಗೊಳಿಸುವ ಯೋಚನೆ ಅವರಲ್ಲಿ ಹೊಳೆದಿತ್ತು.

ಹೊಸ ವ್ಯಾನ್ ಖರೀದಿಸುವಷ್ಟು ದುಡ್ಡು ಅವರಲ್ಲಿರಲಿಲ್ಲ. ಹಾಗಾಗಿ 750 ಪೌಂಡುಗಳಷ್ಟು ಖರ್ಚು ಮಾಡಿ 16 ವರ್ಷಗಳಷ್ಟು ಹಳೆಯದಾದ ಎಲ್‌ಡಿವಿ ಕಾನ್ವೊಯ್ ವ್ಯಾನ್ ಖರೀದಿಸಿದ್ದಾರೆ.

ಬಳಿಕ ತಮ್ಮ ಬಯಕೆಗಳಂತೆ ಮರದ ಕೆತ್ತನೆಯಿಂದ ಒಳಮೈ ವಿನ್ಯಾಸಗೊಳಿಸಿದ ಜೆಮಿ, ಕಾರ್ಪೆಟ್, ಕಪ್ ಬೋರ್ಡ್ ಮತ್ತು ಇನ್ನಿತರ ಅಗತ್ಯ ವಸ್ತುಗಳನ್ನು ಲಗತ್ತಿಸಿದರು.

ಒಟ್ಟಿನಲ್ಲಿ ಬಾಡಿಗೆಯಿಂದ ಮುಕ್ತಿ ಪಡೆಯಲು ತಮ್ಮ ವ್ಯಾನ್ ಅನ್ನೇ ಮನೆಯಾಗಿ ಪರಿವರ್ತಿಸಿರುವ ಜೆಮಿ, ಮನೆಗೆ ಬೇಕಾದ ಸೋಫಾ ಸೆಟ್, ಟಿವಿ, ಫ್ರಿಡ್ಜ್, ಬೆಡ್ ಮುಂತಾದವುಗಳನ್ನು ಆಳವಡಿಸಿಕೊಂಡರು.

ಈಗ ವಾರವೊಂದರಲ್ಲಿ 10 ಪೌಂಡುಗಳಿದ್ದರೆ ಸಾಕು ತನಗೆ ಜೀವ ನಡೆಸಲು ಎಂದು ಜೆಮಿ ಹೆಮ್ಮೆಯಿಂದಲೇ ತಿಳಿಸುತ್ತಾರೆ.

ಅಲ್ಲದೆ ಕೃಷಿಕರಿಗೆ ನೆರವು ಮಾಡುವ ತಮ್ಮ ಮನದಾಳವನ್ನು ಅವರು ಬಿಚ್ಚಿಡುತ್ತಾರೆ. ಅಡುಣೆ, ಜೀವನ ಎಲ್ಲವೂ ಇದರಿಂದಲೇ ಎಂದವರು ತಿಳಿಸುತ್ತಾರೆ.

ಆದರೂ ಪ್ರಸ್ತುತ ವ್ಯಾನ್ ನಲ್ಲಿ ಶೌಚಾಲಯದ ವ್ಯವಸ್ಥೆಯಿಲ್ಲ. ಇದಕ್ಕಾಗಿ ಸಾರ್ವಜನಿಕ ಶೌಚಾಲಯ ವ್ಯವಸ್ಥೆಯ ನೆರವು ಪಡೆಯುವುದಾಗಿ ವಿವರಿಸುತ್ತಾರೆ.

ಅನೇಕ ಯುವಕರು ಕನಸಿನ ಮನೆಯ ಬಗ್ಗೆ ಕನಸು ಕಟ್ಟಿಕೊಂಡಿರುತ್ತಾರೆ. ಇದೇ ಚಿಂತೆಯಿಂದಾಗಿ ಮಾನಸಿಕ ತೊಂದರೆಗೆ ಒಳಗಾಗುತ್ತಾರೆ. ಇವೆಲ್ಲದರ ಜೆಮಿ ತಮ್ಮ ಚಿಕ್ಕ ಮನೆಯ ಕನಸನ್ನು ನನಸಾಗಿಸಿದ್ದಾರೆ.