ಐಷಾರಾಮಿ ಕಾರು ಚಾಲಕನ ಕ್ರೂರತ್ವಕ್ಕೆ ನರಳಾಡಿ ಜೀವ ಬಿಟ್ಟ ಶ್ವಾನ!

ಗೋವಾದಲ್ಲಿ ಪ್ರಭಾವಿ ವ್ಯಕ್ತಿಯ ಮರ್ಸಿಡಿಸ್ ಬೆಂಝ್ ಚಾಲಕನೊಬ್ಬ, ಮಲಗಿದ್ದ ನಾಯಿಯ ಮೇಲೆ ಕಾರು ಚಲಾಯಿಸಿದ ಘಟನೆ ನಡೆದಿದೆ. ಸ್ಥಳೀಯವಾಗಿ ಅಳವಡಿಸಲಾಗಿದ್ದ ಸಿಸಿ ಕ್ಯಾಮರಾದಲ್ಲಿ ದೃಶ್ಯಗಳು ಸೆರೆಯಾಗಿದ್ದು, ಘಟನೆಯ ಕುರಿತ ವೀಡಿಯೊ ವೈರಲ್ ಆದ ನಂತರ, ಪೊಲೀಸರು ಎಚ್ಚೆತ್ತು ಕಾರು ಚಾಲಕನ ವಿರುದ್ಧ ಪ್ರಕರಣ ದಾಖಲಿಸಿದ್ದಾರೆ.

ಈ ಕುರಿತ ವಿಡಿಯೋವನ್ನು ಪ್ರುಡೆಂಟ್ ಮೀಡಿಯಾ ಗೋವಾ ತನ್ನ ಯೂಟ್ಯೂಬ್ ಚಾನೆಲ್‌ನಲ್ಲಿ ಹಂಚಿಕೊಂಡಿದೆ. ದೃಶ್ಯಗಳನ್ನು ಗಮನಿಸಿದರೆ ಕಾರು ಅಲ್ಲಿನ ವಸತಿ ಸೊಸೈಟಿಯನ್ನು ಪ್ರವೇಶಿಸುತ್ತಿದ್ದು, ಗೇಟ್ ಮುಂದೆ ನಾಯಿ ಮಲಗಿತ್ತು. ಚಾಲಕ ಗೇಟ್ ದಾಟುವಾಗ ನಾಯಿಯಿಂದ ದೂರ ಸರಿಯದೆ, ಕಾರನ್ನು ಮುಂದಕ್ಕೆ ಓಡಿಸಿದ್ದಾನೆ.

ರಸ್ತೆಯಲ್ಲಿ ಮಲಗಿದ್ದ ಆ ಬಡ ಜೀವಿಗೆ ಮುಂದಿನ ಅಪಾಯದ ಬಗ್ಗೆ ಸಂಪೂರ್ಣವಾಗಿ ತಿಳಿದಿರಲಿಲ್ಲ, ಚಾಲಕ ವಾಹನವನ್ನು ಏಕಾಏಕಿ ಅದರ ಮೇಲೆ ಓಡಿಸಿದ್ದಾನೆ. ವೀಡಿಯೊದಲ್ಲಿ ಕಾರು ಅದರ ಮೇಲೆ ಹರಿದ ನಂತರ ನಾಯಿಯ ಕಿರುಚಾಟವನ್ನು ಕೇಳಬಹುದು. ವಾಹನ ಹಾದುಹೋದ ನಂತರ ಗಾಯಗೊಂಡ ನಾಯಿ ನಡೆಯಲು ಹೆಣಗಾಡುತ್ತಿರುವುದನ್ನು ಕಾಣಬಹುದು.

ಕಾರು ಚಾಲಕನಿಗೆ ನಾಯಿಯಿಂದ ದೂರವಿರಲು ಸಾಕಷ್ಟು ಸ್ಥಳಾವಕಾಶವಿರುವುದನ್ನು ವೀಡಿಯೊದಲ್ಲಿ ಸ್ಪಷ್ಟವಾಗಿ ನೋಡಬಹುದು. ಅಲ್ಲದೇ ಕಾರು ಚಾಲಕ ಗೇಟ್ ಬಳಿ ನಿಧಾನಗೊಳಿಸಿದ್ದ, ಮುಂದೆ ಇರುವ ಅಡೆತಡೆಗಳನ್ನು ನೋಡಲು ಸಾಕಷ್ಟು ಸಮಯವಿತ್ತು. ಆದರೂ ಹಾಗೆಯೇ ಮುನ್ನುಗ್ಗಿದ್ದಾನೆ. ವರದಿಗಳ ಪ್ರಕಾರ, ಗಾಯಗೊಂಡ ನಾಯಿ 30 ನಿಮಿಷಗಳ ನಂತರ ಸಾವನ್ನಪ್ಪಿದೆ.

X (ಟ್ವಿಟರ್) ಬಳಕೆದಾರರಾದ ನಟಿ ದೀಪ್ತಿ ಭಟ್ನಾಗರ್, "ಗೋವಾದಲ್ಲಿ ಐಷಾರಾಮಿ GA03Z6144 ಎಂಬ ನಂಬರ್‌ನ ಕಾರು ಚಾಲಕ ಪ್ರಭಾವಿ ವ್ಯಕ್ತಿಯ ಚಾಲಕನಾಗಿದ್ದು, ಉದ್ದೇಶಪೂರ್ವಕವಾಗಿ ಮಲಗಿದ್ದ ನಾಯಿಯ ಮೇಲೆ ಓಡಿಸಿದ್ದಾನೆ. ಇದೇ ಕಾರಿನಿಂದ ಮೃತಪಟ್ಟ 2ನೇ ನಾಯಿ ಇದಾಗಿದೆ ಎಂದು ಟ್ವಿಟರ್‌ನಲ್ಲಿ ಪೋಸ್ಟ್‌ ಮಾಡಿದ್ದಾರೆ.

ಆರೋಪಿ ಭರತ್ ನಾಟೇಕರ್ ಪೋರ್ವೊರಿಮ್ ನಿವಾಸಿಯಾಗಿದ್ದಾನೆ. ಈ ಕೃತ್ಯವನ್ನು ಕ್ಯಾಮೆರಾದಲ್ಲಿ ಸೆರೆಹಿಡಿಯಲಾಗಿದ್ದರೂ ಅಗಾಸೈಮ್ ಪೊಲೀಸರು ಎಫ್ಐಆರ್ ದಾಖಲಿಸಿಲ್ಲ ಎಂದು ನಟಿ ಹೇಳಿದ್ದಾರೆ. ವೀಡಿಯೊ ವೈರಲ್ ಆದ ನಂತರ, ಜನರು ಈ ಕ್ರೂರ ಕೃತ್ಯಕ್ಕೆ ಪ್ರತಿಕ್ರಿಯಿಸಲು ಪ್ರಾರಂಭಿಸಿದ್ದು, ಹಿರಿಯ ಪೊಲೀಸ್ ಅಧಿಕಾರಿಗಳನ್ನು ಟ್ಯಾಗ್ ಮಾಡಿ ಅಪರಾಧಿಯ ವಿರುದ್ಧ ಕ್ರಮ ಕೈಗೊಳ್ಳುವಂತೆ ಆಗ್ರಹಿಸಿದ್ದರು.

ವರದಿಗಳ ಪ್ರಕಾರ, ಚಾಲಕನ ವಿರುದ್ಧ ಈಗ ಕ್ರಮ ತೆಗೆದುಕೊಳ್ಳಲಾಗಿದೆ. ಅವನ ವಿರುದ್ಧ ಹಲವಾರು ವಿಭಾಗಗಳ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ. ಇದರ ನಿಖರವಾದ ವಿವರಗಳು ಪ್ರಸ್ತುತ ಲಭ್ಯವಿಲ್ಲ. ಈ ರೀತಿಯ ಘಟನೆಯನ್ನು ನಾವು ನೋಡುತ್ತಿರುವುದು ಇದೇ ಮೊದಲಲ್ಲ. 2022ರಲ್ಲಿ ಆಡಿ ಕಾರು ಚಾಲಕ ಕೂಡ ಇದೇ ರೀತಿಯ ಕೃತ್ಯವೆಸಗಿದ್ದ. ನಂತರ ಅಪರಾಧಿಯನ್ನು ಪೊಲೀಸರು ಬಂಧಿಸಿ ಹತ್ತು ಲಕ್ಷ ರೂ.ಗಳ ಬಾಂಡ್ ಪಾವತಿಸಿದ ನಂತರ ಬಿಡುಗಡೆ ಮಾಡಿದ್ದರು.

ಡ್ರೈವ್‌ಸ್ಪಾರ್ಕ್ ಕನ್ನಡ ವೆಬ್‌ಸೈಟ್ ತ್ವರಿತವಾಗಿ ಆಟೋಮೊಬೈಲ್ ಸಂಬಂಧಿಸಿದ ಸುದ್ದಿಗಳನ್ನು ನೀಡುತ್ತದೆ. ಜೊತೆಗೆ ಸೋಷಿಯಲ್ ಮೀಡಿಯಾಗಳ ಮೂಲಕ ತಕ್ಷಣವೇ ಓದುಗರೊಂದಿಗೆ ಸುದ್ದಿಗಳನ್ನು ಶೇರ್ ಮಾಡುತ್ತೇವೆ. ಇತ್ತೀಚಿನ ಕಾರು, ಬೈಕ್ ಸುದ್ದಿ, ಟೆಸ್ಟ್ ಡ್ರೈವ್ ವರದಿಗಳು ಮತ್ತು ವೀಡಿಯೊಗಳನ್ನು ಪಡೆಯಲು ನಮ್ಮ ಫೇಸ್‌ಬುಕ್, ಇನ್‌ಸ್ಟಾಗ್ರಾಮ್, ಯೂಟ್ಯೂಬ್ ಪೇಜ್‌ಗಳೊಂದಿಗೆ ಫಾಲೋ ಮಾಡಿ. ನಿಮಗೆ ನಮ್ಮ ಯಾವುದೇ ಸುದ್ದಿ ಇಷ್ಟವಾದರೆ ಲೈಕ್, ಕಾಮೆಂಟ್ ಮಾಡುವುದನ್ನು ಮರೆಯದಿರಿ.