ವಾಹನ ಅಧ್ಯಯನ-ಅಭಿವೃದ್ಧಿ ಘಟಕಕ್ಕೆ ಜೈ ಎಂದ ಮೋದಿ-ಕೆಮರೂನ್

By Nagaraja

Updated: Saturday, November 14, 2015, 14:58 [IST]

ಐತಿಹಾಸಿಕ ಬ್ರಿಟನ್ ಪ್ರವಾಸ ಕೈಗೊಂಡಿರುವ ಭಾರತ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರು ಬ್ರಿಟನ್ ಪ್ರಧಾನ ಮಂತ್ರಿ ಡೇವಿಡ್ ಕೆಮರೂನ್ ಅವರ ಜೊತೆ ಹಲವಾರು ಗಮನಾರ್ಹ ಒಪ್ಪಂದಗಳಿಗೆ ಸಹಿ ಹಾಕಿದ್ದಾರೆ.

Also Read: ಟೆಸ್ಲಾ ವಿದ್ಯುತ್ ಕಾರು ಘಟಕಕ್ಕೆ ಮೋದಿ ಭೇಟಿ; ಅಜೆಂಡಾ ಏನು?

ಇದರಲ್ಲಿ ಉಭಯ ರಾಷ್ಟ್ರಗಳ ನಡುವೆ ಆಟೋಮೊಬೈಲ್ ಕ್ಷೇತ್ರದಲ್ಲೂ ಪಾಲುದಾರಿಕೆಗೆ ಸಹಮತ ಮೂಡಿಬಂದಿದೆ. ಇದರಂತೆ ವಾಹನ ಅಧ್ಯಯನ ಹಾಗೂ ಅಭಿವೃದ್ಧಿ (R&D) ಘಟಕ ಆರಂಭಕ್ಕೆ ಜೈ ಎಂದಿದ್ದಾರೆ.

ವಾಹನ ಅಧ್ಯಯನ-ಅಭಿವೃದ್ಧಿ ಘಟಕಕ್ಕೆ ಜೈ ಎಂದ ಮೋದಿ-ಕೆಮರೂನ್

ವಾಹನ ಅಧ್ಯಯನ ಹಾಗೂ ಅಭಿವೃದ್ಧಿ ಜೊತೆಗೆ ಟೆಸ್ಟಿಂಗ್ ಘಟಕವನ್ನು ತೆರೆದುಕೊಳ್ಳುವುದು ಉಭಯ ರಾಷ್ಟ್ರಗಳ ಯೋಜನೆಯಾಗಿದೆ. ಇದನ್ನು ವ್ಯವಸ್ಥಿತ ನೀತಿಯೊಂದಿಗೆ ಕಾರ್ಯಗತಗೊಳಿಸಲಾಗುವುದು.

ಉಭಯ ರಾಷ್ಟ್ರಗಳ ಪ್ರಧಾನಿಗಳು ಸೇರಿ ಹೊರಡಿಸಿರುವ ಜಂಟಿ ಪತ್ರಿಕಾ ಪ್ರಕಟಣೆಯಲ್ಲಿ ಈ ಬಗ್ಗೆ ಸ್ಪಷ್ಟವಾಗಿ ಉಲ್ಲೇಖಿಸಲಾಗಿದ್ದು, ವಾಹನ ವಿಭಾಗದಲ್ಲಿ ನಾವೀನ್ಯತೆಯ ಬೆಳವಣಿಗೆಯನ್ನು ಉತ್ತೇಜಿಸಲು ಬಯಸುತ್ತೇವೆ ಎಂದಿದ್ದಾರೆ.

ಇದರ ಪ್ರಕಾರ ಭಾರತ ಹಾಗೂ ಬ್ರಿಟನ್ ದೇಶಗಳು ಆಟೋಮೊಟಿವ್ ಅಧ್ಯಯನ ಹಾಗೂ ಅಭಿವೃದ್ಧಿ ಘಟಕ ಹಾಗೂ ಟೆಸ್ಟಿಂಗ್ ವ್ಯವಸ್ಥೆಯ ಒಪ್ಪಂದಕ್ಕೆ ಸಹಿ ಹಾಕಿದೆ.

ನಿಮಗೆಲ್ಲರಿಗೂ ತಿಳಿದಿರುಂತೆಯೇ ಕೆಲವು ವರ್ಷಗಳ ಹಿಂದೆ ಆರ್ಥಿಕ ಮುಗ್ಗಟ್ಟಿಗೆ ಸಿಲುಕಿದ್ದ ಬ್ರಿಟನ್‌ನ ಐಷಾರಾಮಿ ಜಾಗ್ವಾರ್ ಲ್ಯಾಂಡ್ ರೋವರ್ ಸಂಸ್ಥೆಯನ್ನು ಭಾರತದ ಐಕಾನಿಕ್ ಟಾಟಾ ಮೋಟಾರ್ಸ್ ಸಂಸ್ಥೆಯು ಖರೀದಿಸಿತ್ತು. ಈ ಮೂಲಕ ಸಾಲದ ಸುಳಿಗೆ ಸಿಲುಕಿದ್ದ ಜಾಗ್ವಾರ್ ಲ್ಯಾಂಡ್ ರೋವರ್‌ಗೆ ಮರುಜೀವ ತುಂಬಿತ್ತು.

ಈ ಬಗ್ಗೆ ಬ್ರಿಟನ್ ಪಾರ್ಲಿಮೆಂಟ್ ನಲ್ಲಿ ಉಲ್ಲೇಖ ಮಾಡಿರುವ ಭಾರತ ಪ್ರಧಾನಿ ನರೇಂದ್ರ ಮೋದಿ "ಬ್ರಿಟನ್ ಐಕಾನಿಕ್ ಸಂಸ್ಥೆಯನ್ನು ಭಾರತದ ಐಕಾನಿಕ್ ಸಂಸ್ಥೆಯು ಮುನ್ನಡೆಸುತ್ತಿದ್ದು, ಈ ಮೂಲಕ ಇಂಗ್ಲೆಂಡ್ ಖಾಸಗಿ ವಿಭಾಗದಲ್ಲಿ ಅತಿ ದೊಡ್ಡ ಉದ್ಯೋಗದಾತನಾಗಿ ಪರಿಣಮಿಸಿದೆ" ಎಂದಿದ್ದಾರೆ.