ದೇಶದ ಮೊದಲ ಬುಲೆಟ್ ರೈಲು ಬೆಂಗಳೂರಿನಲ್ಲಿ ನಿರ್ಮಾಣ ಸಾಧ್ಯತೆ

ಬೆಂಗಳೂರಿನಲ್ಲಿ ಭಾರತದ ಮೊದಲ ಹೈಸ್ಪೀಡ್ ರೈಲನ್ನು ತಯಾರಿಸಲು ಭಾರತೀಯ ರೈಲ್ವೆ ಸಜ್ಜಾಗಿದೆ. ಈ ಹೈಸ್ಪೀಡ್ ರೈಲು ಸ್ಟೇನ್ಲೆಸ್ ಸ್ಟೀಲ್ ಕಾರ್‌ಬಾಡಿಯೊಂದಿಗೆ ಗರಿಷ್ಠ 280 ಕಿ.ಮೀ ವೇಗ ಮತ್ತು 250 ಕಿ.ಮೀ ಕಾರ್ಯಾಚರಣೆಯ ವೇಗವನ್ನು ಹೊಂದಿರಲಿವೆ. ಈ ಸಂಬಂಧ ಸೆಪ್ಟೆಂಬರ್ 5 ರಂದು ಎರಡು ಚೇರ್ - ಕಾರ್ ಹೈಸ್ಪೀಡ್ ರೈಲುಗಳನ್ನು ತಯಾರಿಸಲು ಇಂಟಿಗ್ರಲ್ ಕೋಚ್ ಫ್ಯಾಕ್ಟರಿ (ಐಸಿಎಫ್) ಟೆಂಡರ್ ಆಹ್ವಾನಿಸಿದೆ. ಬಿಡ್ ಸಲ್ಲಿಸಲು ಸೆಪ್ಟೆಂಬರ್ 19 (ಗುರುವಾರ) ಕೊನೆಯ ದಿನಾಂಕವೆಂದು ಸುದ್ದಿ ಸಂಸ್ಥೆ ಮನಿಕಂಟ್ರೋಲ್‌ನಲ್ಲಿ ವರದಿ ಮಾಡಲಾಗಿದೆ.

ಈ ರೈಲಿನಲ್ಲಿ ಒಟ್ಟು ಆಸನ ಸಾಮರ್ಥ್ಯವು ಸುಮಾರು 174 ಎಂದು ನಿರೀಕ್ಷಿಸಲಾಗಿದೆ. ಸ್ಟ್ಯಾಂಡರ್ಡ್ 3+2 ಆಸನ ವ್ಯವಸ್ಥೆಯೊಂದಿಗೆ ಎಂಟು ಕಾರುಗಳು ಮತ್ತು 2+2 ಆಸನದ ಒಂದು ಕಾರ್ಯನಿರ್ವಾಹಕ ಕಾರ್ ಇರುತ್ತದೆ. ಪ್ರಯಾಣಿಕರ ಬೇಡಿಕೆಯನ್ನು ಅವಲಂಬಿಸಿ, ಹೆಚ್ಚಿನ ಕಾರುಗಳನ್ನು ಸೇರಿಸಬಹುದು, ಭವಿಷ್ಯದಲ್ಲಿ ರೈಲನ್ನು 12 ಅಥವಾ 16 ಕಾರುಗಳಿಗೆ ವಿಸ್ತರಿಸಬಹುದು.

ಆಗ್ನೇಯ ಏಷ್ಯಾ ಮತ್ತು ಆಫ್ರಿಕಾದಂತಹ ರಫ್ತು ಮಾರುಕಟ್ಟೆಗಳನ್ನು ಕೂಡ ಗಮನದಲ್ಲಿಟ್ಟುಕೊಂಡು, ಸ್ಟ್ಯಾಂಡರ್ಡ್ ಗೇಜ್ ಟ್ರ್ಯಾಕ್‌ಗಳಿಗಾಗಿ ರೈಲುಗಳನ್ನು ನಿರ್ಮಿಸಲಾಗುವುದು. 280 ಕಿ.ಮೀ ವೇಗ ಮತ್ತು 250 ಕಿ.ಮೀ ಕಾರ್ಯಾಚರಣೆಯ ವೇಗದೊಂದಿಗೆ ಮೊದಲ ರೈಲು ಡಿಸೆಂಬರ್ 2026ರ ವೇಳೆಗೆ ಬರುವ ನಿರೀಕ್ಷೆಯಿದೆ ಎಂದು ಮೂಲಗಳು ತಿಳಿಸಿವೆ.

ಬೆಂಗಳೂರಿನಲ್ಲೇ ಏಕೆ?: ಮನಿ ಕಂಟ್ರೋಲ್ ವರದಿಯ ಪ್ರಕಾರ, ಬೆಂಗಳೂರಿನಲ್ಲಿರುವ ಬಿಇಎಂಎಲ್ ಮಾತ್ರ ಎರಡು ಎಂಟು ಕಾರುಗಳ ರೈಲು ಸೆಟ್‌ಗಳನ್ನು ತಯಾರಿಸಲು ಬಿಡ್ ಸಲ್ಲಿಸಿದೆ. ಇದು ಕೇವಲ ಎರಡು ರೈಲುಗಳಿಗೆ ಸಣ್ಣ ಆದೇಶವಾಗಿರುವುದರಿಂದ, ಇತರ ರೋಲಿಂಗ್ ಸ್ಟಾಕ್ ತಯಾರಕರು ಭಾಗವಹಿಸಲು ಉತ್ಸುಕರಾಗಿರಲಿಲ್ಲ. 2.5 ವರ್ಷಗಳಲ್ಲಿ ಉತ್ಪಾದನೆಯನ್ನು ಪೂರ್ಣಗೊಳಿಸುವುದು ನಮ್ಮ ಗುರಿಯಾಗಿದೆ ಎಂದು ಚೆನ್ನೈನ ಐಸಿಎಫ್ ಜನರಲ್ ಮ್ಯಾನೇಜರ್ ಯು.ಸುಬ್ಬರಾವ್ ಹೇಳಿರುವುದಾಗಿ ವರದಿಯಾಗಿದೆ.

ರಾಷ್ಟ್ರೀಯ ಹೈಸ್ಪೀಡ್ ರೈಲು ಕಾರ್ಪೊರೇಷನ್ ಲಿಮಿಟೆಡ್ (NHSRCL) ಅಭಿವೃದ್ಧಿಪಡಿಸುತ್ತಿರುವ ಮುಂಬೈ-ಅಹಮದಾಬಾದ್ ಹೈಸ್ಪೀಡ್ ರೈಲು (ಎಂಎಎಚ್ಎಸ್ಆರ್) ಕಾರಿಡಾರ್‌ನಲ್ಲಿ ಈ ರೈಲುಗಳು ಕಾರ್ಯನಿರ್ವಹಿಸಲಿವೆ. ಆರಂಭದಲ್ಲಿ, ಜಪಾನಿನ ಶಿಂಕನ್ಸೆನ್ ರೈಲುಗಳು ಈ ಮಾರ್ಗದಲ್ಲಿ ಚಲಿಸುವ ನಿರೀಕ್ಷೆಯಿತ್ತು. ಜಪಾನಿನ ಸಂಸ್ಥೆಗಳು ಉಲ್ಲೇಖಿಸಿದ ಹೆಚ್ಚಿನ ಬೆಲೆಯಿಂದಾಗಿ, ದೇಶೀಯವಾಗಿ ಹೈಸ್ಪೀಡ್ ರೈಲುಗಳನ್ನು ಅಭಿವೃದ್ಧಿಪಡಿಸಲು ನಿರ್ಧರಿಸಲಾಗಿದೆ.

BEML ನ ಮೇಧಾ ಅವರ ಪ್ರೊಪಲ್ಷನ್ ಸಿಸ್ಟಮ್ ಈಗಾಗಲೇ ವಂದೇ ಭಾರತ್ ರೈಲುಗಳಲ್ಲಿ ಯಶಸ್ವಿಯಾಗಿದೆ. ಇದು ಗರಿಷ್ಠ 160 ಕಿ.ಮೀ ವೇಗದಲ್ಲಿ ಚಲಿಸುತ್ತದೆ. ಈ ಕಾರ್‌ಬಾಡಿ ಬಿಲ್ಡಿಂಗ್ ಪರಿಣತಿ ಮತ್ತು ಮೇಧಾ ಅವರ ಪ್ರೊಪಲ್ಷನ್ ಸಿಸ್ಟಮ್ ಸಾಮರ್ಥ್ಯಗಳೊಂದಿಗೆ, ಮೇಧಾ ಈಗ 250 Kmph ವೇಗದಲ್ಲಿ ಚಲಿಸುವ ಸಾಮರ್ಥ್ಯವನ್ನು ಹೊಂದಿರುವ ಪ್ರೊಪಲ್ಷನ್ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸಲಿದೆ.

ಇದಕ್ಕಾಗಿ BEML ಅಂತಹ ವೇಗವನ್ನು ತಡೆದುಕೊಳ್ಳುವ ಕಾರ್‌ಬಾಡಿ ರಚನೆಯನ್ನು ಅಭಿವೃದ್ಧಿಪಡಿಸಬೇಕಿದೆ. ಇದಕ್ಕಾಗಿ BEML ಯುರೋಪಿಯನ್ ವಿನ್ಯಾಸ ಸಲಹೆಗಾರರನ್ನು ನೇಮಿಸಿಕೊಳ್ಳುವ ನಿರೀಕ್ಷೆಯಿದೆ. ಮೇಧಾ ಪ್ರೊಪಲ್ಷನ್ ಸಿಸ್ಟಮ್ ಅನ್ನು ತಯಾರಿಸಿ ತಮ್ಮ ಹೈದರಾಬಾದ್ ಸೌಲಭ್ಯದಿಂದ ರೈಲು ನಿಯಂತ್ರಣ ಮತ್ತು ನಿರ್ವಹಣಾ ವ್ಯವಸ್ಥೆ (TCMS) ಸಾಫ್ಟ್‌ವೇರ್ ಅನ್ನು ಅಭಿವೃದ್ಧಿಪಡಿಸಲಿದ್ದಾರೆ.

BEML ತನ್ನ ಬೆಂಗಳೂರು ಕಾರ್ಖಾನೆಯಿಂದ ಅಂತಿಮ ಜೋಡಣೆ ಮತ್ತು ರೋಲ್‌ಔಟ್ ಅನ್ನು ನಿರ್ವಹಿಸುತ್ತದೆ. ಇದು ಯಶಸ್ವಿಯಾದಲ್ಲಿ, ಮುಂಬೈ - ಅಹಮದಾಬಾದ್ ಮಾರ್ಗ ಮತ್ತು ಬೆಂಗಳೂರು - ಚೆನ್ನೈ, ಮುಂಬೈ - ಹೈದರಾಬಾದ್, ದೆಹಲಿ - ವಾರಣಾಸಿ ಮುಂತಾದ ಮುಂಬರುವ ಹೈಸ್ಪೀಡ್ ರೈಲು ಮಾರ್ಗಗಳಿಗೆ ಹೆಚ್ಚುವರಿ ಆರ್ಡರ್‌ಗಳ ಸಾಧ್ಯತೆಯಿದೆ.