ಭಾರತದಲ್ಲಿ ಹಾರಾಡಲಿರುವ ಮಹೀಂದ್ರ ವಿಮಾನಗಳು

ಪ್ರಸಕ್ತ ಸಾಲಿನಲ್ಲೇ ವ್ಯೋಮಯಾನ ನಿಯಂತ್ರಣ ಮಂಡಳಿಯಿಂದ ಅನುಮೋದನೆ ಗಿಟ್ಟಿಸಿಕೊಳ್ಳಲಿರುವ ಸಂಸ್ಥೆಯು ತದಾ ಬಳಿಕ ಹಗುರ ಭಾರದ ವಿಮಾನ ಸೇವೆಯನ್ನು ಆರಂಭಿಸಲಿದೆ.

ನಿಮ್ಮ ಮಾಹಿತಿಗಾಗಿ, 2008ರಲ್ಲಿ ಆಸ್ಟ್ರೇಲಿಯಾದ ಗಿಪ್ಸ್ ಏರೋ ವಿಮಾನಯಾನ ಸಂಸ್ಥೆಯನ್ನು ಮಹೀಂದ್ರ ಖರೀದಿಸಿತ್ತು. ಮೆಲ್ಪರ್ನ್ ತಳಹದಿಯ ಈ ಸಂಸ್ಥೆಯು ಎಂಟು ಸೀಟುಗಳ ಜಿಎ8 ಏರ್ ವ್ಯಾನ್ ವಿಮಾನವನ್ನು ನಿರ್ಮಿಸುತ್ತದೆ.

ಸದ್ಯ 220ರಷ್ಟು ಇಂತಹ ವಿಮಾನಗಳು 30 ರಾಷ್ಟ್ರಗಳಲ್ಲಾಗಿ ಸೇವೆಯಲ್ಲಿದೆ. ಸದ್ಯಕ್ಕಂತೂ ಮೆಲ್ಪರ್ನ್ ಘಟಕದಲ್ಲೇ ವಿಮಾನ ನಿರ್ಮಾಣವಾಗಲಿದೆ. ಮುಂದಿನ ಹಂತದ ಭಾಗವಾಗಿ ಭಾರತದಲ್ಲೂ ನಿರ್ಮಿಸುವ ಯೋಜನೆಯಿದೆ.

ಒಮ್ಮೆ ಭಾರತದಲ್ಲಿ ಮಾರಾಟ ಆರಂಭಿಸಿದ ಬಳಿಕ 'ಮೇಕ್ ಇನ್ ಇಂಡಿಯಾ' ಯೋಜನೆಯ ಭಾಗವಾಗಿ ಭಾರತದಲ್ಲಿ ವಿಮಾನ ನಿರ್ಮಿಸುವ ಸಾಧಕ ಬಾಧಕಗಳ ಕುರಿತಾಗಿ ಯೋಚಿಸಲಿದ್ದೇವೆ ಎಂದು ಮಹೀಂದ್ರ ತಿಳಿಸಿದೆ.

ಈಗಲೇ ಬೆಂಗಳೂರಿನ ಘಟಕದಲ್ಲಿ ಬಿಡಿಭಾಗಗಳನ್ನು ನಿರ್ಮಿಸುತ್ತಿರುವ ಮಹೀಂದ್ರ ಇಲ್ಲಿಂದ ಬಳಿಕ ಮೆಲ್ಪರ್ನ್ ಘಟಕಕ್ಕೆ ರವಾನಿಸುತ್ತಿದೆ.

ಗಿಪ್ಸ್ ಏರೋ ನಿರ್ಮಿಸುತ್ತಿರುವ ಏರ್ ವ್ಯಾನ್ ಓರ್ವ ಪೈಲಟ್ ನಿಂದ ನಿಯಂತ್ರಿಸಬಹುದಾಗಿದೆ. ನಾಗರಿಕ ವಿಮಾನಯಾನ ಜನರಲ್ ನಿರ್ದೇಶನಾಲಯದ (ಡಿಜಿಸಿ) ನಿಯಮಗಳ ಪ್ರಕಾರ 1,500 ಕೆ.ಜಿಗೂ ಹೆಚ್ಚು ಭಾರವುಳ್ಳ ವಾಣಿಜ್ಯ ವಿಮಾನಗಳು ಎರಡು ಪೈಲಟ್ ಗಳನ್ನು ಕಡ್ಡಾಯವಾಗಿ ಹೊಂದಿರಬೇಕು.

ಇದರಿಂದಾಗಿ ಭಾರತದಲ್ಲಿ ಮಾರಾಟ ಮಾಡುವ ಮಹೀಂದ್ರ ವಿಮಾನಗಳ ಕಾಕ್ ಪೀಟ್ ಗಳನ್ನು (ಚಾಲಕ ಕೋಣೆ) ಮಾರ್ಪಾಡುಗೊಳಿಸಬೇಕಾದ ಅವಶ್ಯಕತೆಯಿದೆ. ಈ ನಡುವೆ 10 ಸೀಟುಗಳ ಇನ್ನು ಸ್ವಲ್ಪ ದೊಡ್ಡದಾದ ವಿಮಾನ ನಿರ್ಮಿಸುವ ಯೋಜನೆಯು ಮಹೀಂದ್ರ ಬಳಿಯಿದೆ.