ಸೋಲರಿಯದ ಛಲಗಾರ; ಕೋಮಾದಿಂದ ಎಚ್ಚೆತ್ತ ಶುಮಿ

ರೇಸ್ ಟ್ರ್ಯಾಕ್‌ನಲ್ಲಿ ಛಲ ಬಿಡದ ಚಾಲಕರಾಗಿ ಗುರುತಿಸಿಕೊಂಡಿದ್ದ ಮೈಕಲ್ ಶುಮೇಕರ್ ಶೀಘ್ರದಲ್ಲೇ ಸಹಜ ಸ್ಥಿತಿಗೆ ಮರಳುವ ನಂಬಿಕೆ ಅಭಿಮಾನಿಗಳಲ್ಲಿತ್ತು. ಇದನ್ನು ಹುಸಿಗೊಳಿಸದ ಶುಮೇಕರ್ ಕೊನೆಗೂ ಸಾವನ್ನು ಗೆದ್ದು ಬಂದಿದ್ದು, ಆಸ್ಪತ್ರೆಯಿಂದ ಹೊರ ಬಂದಿದ್ದಾರೆ.

ಕಳೆದ ವರ್ಷ ಡಿಸೆಂಬರ್ ತಿಂಗಳಲ್ಲಿ ಫ್ರಾನ್ಸ್‌ನ ಆಲ್ಫ್ಸ್ ಪರ್ವತದ ಮೆರಿಬೆಲ್ ರಿಸಾರ್ಟ್‌ನಲ್ಲಿ ಸಂಭವಿಸಿದ ಸ್ಕೇಯಿಂಗ್ ಅಪಘಾತದ ವೇಳೆ ಶುಮಿ ತಲೆ ಬಂಡೆಗಲ್ಲಿಗೆ ಬಡಿದು ಗಂಭೀರ ಗಾಯ ಮಾಡಿಕೊಂಡಿದ್ದರು. ಬಳಿಕ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಇದೀಗ ಕೋಮಾ ಸ್ಥಿತಿಯಿಂದ ಹೊರಬಂದಿದ್ದು, ತಮ್ಮ ಆಪ್ತ ವಲಯದಲ್ಲಿ ಸಂತಸಕ್ಕೆ ಕಾರಣವಾಗಿದ್ದಾರೆ.

ಎರಡು ಬಾರಿ ಲೌರೆಸ್ ವಿಶ್ವ ಕ್ರೀಡಾಪಟು ಪ್ರಶಸ್ತಿಗೆ ಭಾಜನರಾಗಿರುವ ಶುಮೇಕರ್, ಅತಿ ಹೆಚ್ಚು ಬಾರಿ ಚಾಂಪಿಯನ್, ರೇಸ್ ವಿನ್, ಫಾಸಸ್ಟ್ ಲ್ಯಾಪ್, ಪೊಲ್ ಪೊಜಿಷನ್ ಮತ್ತು ಒಂದೇ ಅವಧಿಯಲ್ಲಿ ಅತ್ಯಂತ ಹೆಚ್ಚು ಗೆಲುವು (2004ರಲ್ಲಿ 13 ಬಾರಿ) ಹೀಗೆ ಹತ್ತು ಹಲವಾರು ದಾಖಲೆಗಳನ್ನು ಹೊಂದಿದ್ದಾರೆ.

ಫಾರ್ಮುಲಾ ಒನ್ ಇತಿಹಾಸದಲ್ಲೇ ಸರ್ವಕಾಲಿಕ ಶ್ರೇಷ್ಠ ಚಾಲಕ ಎನಿಸಿಕೊಂಡಿರುವ ಶುಮೇಕರ್, 1994, 1995, 2000, 2001, 2002, 2003 ಮತ್ತು 2004ನೇ ಇಸವಿಗಳಲ್ಲಿ ಸೇರಿದಂತೆ ಒಟ್ಟು ಏಳು ಬಾರಿ ಎಫ್1 ಚಾಂಪಿಯನ್ ಪಟ್ಟ ಅಲಂಕರಿಸಿದ್ದರು.

ಯುನೆಸ್ಕೋದ ಚಾಲಕ ಸುರಕ್ಷತೆಯ ಬ್ರಾಂಡ್ ಅಂಬಾಸಿಡರ್ ಕೂಡಾ ಆಗಿರುವ ಶುಮೇಕರ್ ಹಲವಾರು ಮಾನವೀಯ ಕಾರ್ಯಕ್ರಮಗಳಲ್ಲೂ ತಮ್ಮನ್ನು ತಾವು ತೊಡಗಿಸಿಕೊಂಡಿದ್ದರು. ಅಲ್ಲದೆ ಸಹಾಯಾರ್ಥ ಸಂಸ್ಥೆಗಾಗಿ ಹತ್ತು ಮಿಲಿಯನ್ ಅಮೆರಿಕನ್ ಡಾಲರ್ ಸಹಾಯಾಸ್ತ ಸಲ್ಲಿಸಿದ್ದರು.

ರೇಸಿಂಗ್ ದುನಿಯಾಕ್ಕೆ ಶುಮೇಕರ್ ಅಲ್‌ವಿದಾ - ಮುಂದಕ್ಕೆ ಓದಿರಿ