MiG-21 Crash: ಮಿಗ್-21 ಜೆಟ್ ಪತನ: ಹಾರುವ ಶವಪೆಟ್ಟಿಗೆ ಬಿರುದು... ಪೈಲೆಟ್ ಸೇಫ್, ಇಬ್ಬರ ಸಾವು

ಭಾರತೀಯ ವಾಯುಪಡೆಯ ಮಿಗ್ -21 ಜೆಟ್ ರಾಜಸ್ಥಾನದ ಹನುಮಾನ್‌ಗಢದಲ್ಲಿ ಇಂದು ಪತನಗೊಂಡಿದ್ದು, ಇಬ್ಬರು ನಾಗರಿಕರು ಸಾವನ್ನಪ್ಪಿದ್ದಾರೆ ಎಂದು ಹೆಚ್ಚುವರಿ ಪೊಲೀಸ್ ವರಿಷ್ಠಾಧಿಕಾರಿ ಜಸ್ಸಾರಾಮ್ ಬೋಸ್ ತಿಳಿಸಿದ್ದಾರೆ. ಹಾಗೆಯೇ ಮಿಗ್ -21 ಜೆಟ್ ಪೈಲಟ್ ಸುರಕ್ಷಿತವಾಗಿದ್ದಾರೆ ಎಂದು ಜಿಲ್ಲಾಧಿಕಾರಿ ರುಕ್ಮಣಿ ರಿಯಾರ್ ತಿಳಿಸಿದ್ದಾರೆ.

ವಾಯುಪಡೆಯಲ್ಲಿ ಈ MiG-21 ಜೆಟ್‌ಗೆ ಕೆಟ್ಟ ಹೆಸರು ದಾಖಲಾಗಿದೆ. ಏಕೆಂದರೆ ಭಾರತೀಯ ವಾಯುಪಡೆಯಲ್ಲಿ ಈವೆರೆಗೂ ಅತಿಹೆಚ್ಚು ಅಪಘಾತಗಳಿಗೆ ತುತ್ತಾದ ದಾಖಲೆ ಈ ವಿಮಾನದ ಮೇಲಿದೆ. ಮಾಹಿತಿಯ ಪ್ರಕಾರ ಈ ಹಿಂದೆಯೂ ಬರೋಬ್ಬರಿ 170 ಕ್ಕೂ ಹೆಚ್ಚು ಪೈಲಟ್‌ಗಳು ಅಪಘಾತಗಳಲ್ಲಿ ಪ್ರಾಣ ಕಳೆದುಕೊಂಡಿರುವುದಾಗಿ ತಿಳಿದುಬಂದಿದೆ. ಇದೀಗ ಈ ಅಪಘಾತವು ಮತ್ತೊಮ್ಮೆ ವಿಮಾನದ ಗುಣಮಟ್ಟಕ್ಕೆ ಸವಾಲಾಗಿ ಪರಿಣಮಿಸಿದೆ.

ಈ ವಿಮಾನಗಳ ಕಳಪೆ ಸುರಕ್ಷತಾ ದಾಖಲೆಯ ಆರೋಪಗಳ ನಡುವೆ ಅಪಘಾತಗಳ ಕುರಿತು ಅನೇಕ ವಿಚಾರಣೆಗಳು ನಡೆದಿವೆ, 2010 ರಿಂದ 20 ಕ್ಕೂ ಹೆಚ್ಚು ವಿಮಾನಗಳು ಮತ್ತು 2003 ಮತ್ತು 2013 ರ ನಡುವೆ ಹತ್ತು ವರ್ಷಗಳ ಅವಧಿಯಲ್ಲಿ 38 ವಿಮಾನಗಳು ಅಪಘಾತಕ್ಕೀಡಾಗಿವೆ ಎಂದು ಈ ಹಿಂದೆ ರಕ್ಷಣಾ ಸಚಿವಾಲಯವು ಅಧಿಕೃತವಾಗಿ ಪ್ರಕಟಿಸಿತ್ತು.

ಅಪಘಾತಗಳ ಪ್ರಮಾಣವು ಹೆಚ್ಚಾಗಿರುವ ಕಾರಣ ಈ ವಿಮಾನಕ್ಕೆ 'ಹಾರುವ ಶವಪೆಟ್ಟಿಗೆ' (ಫ್ಲೈಯಿಂಗ್ ಕಾಫಿನ್) ಎಂಬ ಅಡ್ಡಹೆಸರನ್ನು ತಂದುಕೊಟ್ಟಿದೆ. ಇದೀಗ ಸಂಭವಿಸಿರುವ ಅಪಘಾತಕ್ಕೆ ಕಾರಣ ತಿಳಿದು ಬರಬೇಕಿದ್ದು, ಉನ್ನತ ಅಧಿಕಾರಿಗಳು ಈ ಕುರಿತು ವಿಚಾರಣೆ ಮಾಡಲಿದ್ದಾರೆ. ಏನೇ ಆಗಲಿ ಈ ಅಪಘಾತದಲ್ಲಿ ಇಬ್ಬರು ನಾಗರಿಕರು ಸಾವನ್ನಪ್ಪಿರುವುದು ಸ್ಥಳೀಯರಲ್ಲಿ ಆಕ್ರೋಶಕ್ಕೆ ಕಾರಣವಾಗಿದೆ.

MiG-21 ಬೈಸನ್: MiG-21 ಸೋವಿಯತ್ ಮೂಲದ ಫೈಟರ್ ಮತ್ತು ಇಂಟರ್‌ಸೆಪ್ಟರ್ ವಿಮಾನವಾಗಿದೆ. ಇದನ್ನು ಮೊದಲು 1959 ರಲ್ಲಿ ಪರಿಚಯಿಸಲಾಗಿದ್ದು, ಇಲ್ಲಿಯವರೆಗೆ ವಿಶ್ವದಾದ್ಯಂತ 11,496 ವಿಮಾನಗಳನ್ನು ನಿರ್ಮಿಸಲಾಗಿದೆ. MiG-21 ಅತ್ಯಂತ ಕೈಗೆಟುಕುವ ಬೆಲೆಯ ವಿಮಾನವಾಗಿದ್ದು, ಅನೇಕ ದೇಶಗಳಿಗೆ ರಫ್ತು ಮಾಡಲಾಗಿದೆ. ಸದ್ಯ ಭಾರತವು ಕೂಡ MiG-21 ಫೈಟರ್ ಜೆಟ್‌ಗಳ ಅತಿದೊಡ್ಡ ಸಂಗ್ರಹವನ್ನು ಹೊಂದಿದೆ.

ಭಾರತೀಯ ವಾಯುಪಡೆಗೆ ಈವರೆಗೆ 1,200 ಕ್ಕೂ ಹೆಚ್ಚು MiG-21 ಯುದ್ಧ ವಿಮಾನಗಳನ್ನು ಪರಿಚಯಿಸಲಾಗಿದೆ. ಆದರೆ ಸದ್ಯ ಭಾರತದಲ್ಲಿ ಕಾರ್ಯನಿರ್ವಹಿಸುತ್ತಿರುವುದು ಮಾತ್ರ ಕೇವಲ 113 ಯುನಿಟ್‌ಗಳು, ಏಕೆಂದರೆ ವಿಮಾನದ ಹಿಂದಿನ ಆವೃತ್ತಿಗಳನ್ನು ಈಗಾಗಲೇ ಹಂತ ಹಂತವಾಗಿ ಸ್ಥಗಿತಗೊಳಿಸಲಾಗಿದೆ. ಇದಕ್ಕೆ ಮುಖ್ಯ ಕಾರಣ ವಿಮಾನದ ಕಳಪೆ ಗುಣಮಟ್ಟವೇ ಎಂದು ಸಹ ಹೇಳಲಾಗುತ್ತಿದೆ.

ಹೇಳುವುದಾದರೆ, ಭಾರತೀಯ ವಾಯುಪಡೆಯು ಪ್ರಸ್ತುತ ಸಕ್ರಿಯ ಫೈಟರ್ ಜೆಟ್‌ಗಳಾದ ಡಸಾಲ್ಟ್ ರಫೇಲ್, MiG-29UPG, HAL ತೇಜಸ್, ಸುಖೋಯ್ 30MKI, SEPECAT ಜಾಗ್ವಾರ್, ಮಿರಾಜ್ 2000 ಎಂಬ ಅತ್ಯಾಧುನಿಕ ಜೆಟ್‌ಗಳನ್ನು ಒಳಗೊಂಡಿದೆ. ಆದರೆ MiG-21 ಮಾತ್ರ ಭಾರತೀಯ ವಾಯುಪಡೆಯ ಮೊದಲ ಫೈಟರ್ ಜೆಟ್‌ ಆಗಿದೆ. MiG-21 ತುಂಬಾ ಹಳೆಯ ಮಾದರಿಯಾಗಿದ್ದರಿಂದ ಅಪ್‌ಡೇಟ್‌ ಭಾಗವಾಗಿ ಹಲವು ನವೀಕರಗಳನ್ನು ತರಲಾಯಿತು.

ನವೀರಣವಾದ ಬಳಿಕ MiG-21 ಬೈಸನ್ ಎಂದು ಕರೆಯಲಾಯಿತು. ಆದರೂ ಈ ವಿಮಾನಕ್ಕಿರುವ ಅಡ್ಡ ಹೆಸರು ಮಾತ್ರ ಬದಲಾಗಲಿಲ್ಲ. ಸಾಲು ಅಪಘಾತಗಳು MiG-21 ಬೈಸನ್ ಫೈಟರ್ ಜೆಟ್ ಅನ್ನು 'ಹಾರುವ ಶವಪೆಟ್ಟಿಗೆ' ಎಂಬ ಬಿರುದನ್ನು ತಂದುಕೊಟ್ಟವು. ಭಾರತೀಯ ವಾಯುಪಡೆಯು 2025 ರ ವೇಳೆಗೆ ಎಲ್ಲಾ MiG-21 ಗಳನ್ನು ಹಂತ ಹಂತವಾಗಿ ನಿಷ್ಕ್ರಿಯಗೊಳಿಸುವ ಯೋಜನೆಯಲ್ಲಿದೆ.