ಡಕಾರ್ ರಾಲಿಗೆ ಮತ್ತೋರ್ವ ಬಲಿ; ಮಿಂಚಿದ ಸಂತೋಷ್

ಡಕಾರ್ ರಾಲಿಯಿಂದ ಬಂದ ಮಾಹಿತಿ ಪ್ರಕಾರ ಮೂರನೇ ಹಂತರ ರೇಸಿಂಗ್ ವೇಳೆ ಪೊಲೆಂಡ್‌ನ 39ರ ಹರೆಯದ ರೇಸರ್ ಮೈಕಲ್ ಹೆರ್ನಿಕ್ ತಮ್ಮ ಪ್ರಾಣವನ್ನೇ ತೆತ್ತಿದ್ದಾರೆ. ಹಾಗಿದ್ದರೂ ಹೆರ್ನಿಕ್ ಸಾವಿಗೆ ನಿಖರ ಕಾರಣ ಇನ್ನಷ್ಟೇ ತಿಳಿದು ಬರಬೇಕಾಗಿದ್ದು, ತನಿಖೆ ಪ್ರಗತಿಯಲ್ಲಿದೆ. ಇದೇ ಮೊದಲ ಬಾರಿಗೆ ಹೆರ್ನಿಕ್ ಡಕಾರ್ ರಾಲಿಯಲ್ಲಿ ಭಾಗವಹಿಸುತ್ತಿದ್ದಾರೆ.

ಈ ನಡುವೆ ಭಾರತದ ಹೆಮ್ಮೆಯ ರೇಸರ್ ಸಂತೋಷ್ ಮೂರನೇ ಹಂತದಲ್ಲಿ 53ನೇ ಸ್ಥಾನಕ್ಕೆ ನೆಗೆತ ಕಾಣುವ ಮೂಲಕ ಅಚ್ಚರಿ ಫಲಿತಾಂಶಕ್ಕೆ ಕಾರಣವಾಗಿದ್ದಾರೆ.

ಮೊದಲ ಸುತ್ತು ಅಥವಾ ಸ್ಟೇಜ್ ಒಂದರಲ್ಲಿ 85ನೇ ಸ್ಥಾನದಲ್ಲಿದ್ದ ಸಂತೋಷ್ ತಮ್ಮ ಚಾಣಕ್ಷತೆಯನ್ನು ಮುಂದುವರಿಸಿದ್ದಾರೆ. ಏಕೆಂದರೆ ಭಾರತೀಯ ರೇಸರ್ ಪಾಲಿಗಿದು ಡಕಾರ್ ರಾಲಿಯಲ್ಲೇ ಭಾಗವಹಿಸುವುದೇ ದೊಡ್ಡ ಗೌರವಾಗಿದೆ. ಹಾಗಿರುವಾಗ ಸಂತೋಷ್ ಗಮನಾರ್ಹ ಸಾಧನೆ ಹಲವು ಮೂಲಗಳಿಂದ ಭಾರಿ ಮೆಚ್ಚೆಗೆಗೆ ಗ್ರಾಸವಾಗುತ್ತಿದೆ.

ಫ್ರಾನ್ಸ್‌ನ ಪ್ಯಾರಿಸ್‌ನಿಂದ ತೆರವುಗೊಳಿಸಿದ ಬಳಿಕ ಸತತವಾಗಿ ಏಳನೇ ಬಾರಿಗೆ ದಕ್ಷಿಣ ಅಮೆರಿಕಾದಲ್ಲಿ ಡಕಾರ್ ರಾಲಿ ಯಶಸ್ವಿಯಾಗಿ ಆಯೋಜನೆಯಾಗುತ್ತಿದೆ.

ಜನವರಿ 4ರಂದು ಅರ್ಜೆಂಟೀನಾದ ಬ್ಯೂನಸ್ ಐರಿಸ್‌ನಿಂದ ಆರಂಭವಾಗಿರುವ ರೇಸ್ ಚೀಲಿ ಹಾಗೂ ಬೊಲಿವಿಯಾ ಕ್ರಮಿಸಿ ಮತ್ತೆ ಬ್ಯೂನಸ್ ಐರಿಸ್‌ನಲ್ಲಿ ಜನವರಿ 17ರಂದು ಕೊನೆಗೊಳ್ಳಲಿದೆ.

ಒಟ್ಟು 13 ಹಂತಗಳಾಗಿ (ಸ್ಟೇಜ್) ಡಕಾರ್ ರಾಲಿ ಆಯೋಜನೆಯಾಗಲಿದೆ. ಇಲ್ಲಿ ಕಾರು ಬೈಕ್ ಸೇರಿದಂತೆ ಟ್ರಕ್ ಹಾಗೂ ಕ್ವಾಡ್ ರೇಸ್ ಸಹ ನಡೆಯುತ್ತಿದೆ.

ಮರಭೂಮಿ, ಪರ್ವತ ಶಿಖರ , ಅಟ್ಲಾಂಟಿಕ್ ಹಾಗೂ ಫೆಸಿಫಿಕ್ ಮಹಾಸಾಗರ ಕಿನಾರೆಯಲ್ಲಿ ಸುತ್ತುವರಿಯಲಿರುವ ಡಕಾರ್ ರಾಲಿಯಲ್ಲಿ ದಿನಕ್ಕೆ 800ರಿಂದ 900 ಕೀ.ಮೀ.ಗಳನ್ನು ಕ್ರಮಿಸಬೇಕಾಗುತ್ತದೆ. ಈ ಮೂಲಕ ಒಟ್ಟು 9000 ಕೀ.ಮೀ. ಉದ್ದಕ್ಕೂ ಸ್ಪರ್ಧೆ ನಡೆಯಲಿದೆ.