ಬೆಂಗಳೂರಿಗೆ ಟನಲ್‌ ರೋಡ್ ಬೇಡವಂತೆ! ಮೆಟ್ರೋ ಆಯ್ತು, ಈಗ ಟ್ರಾಮ್: ಸಂಸದರ ಮಾಸ್ಟರ್ ಪ್ಲಾನ್!

ಬೆಂಗಳೂರಿನ ಟ್ರಾಫಿಕ್ ಸಮಸ್ಯೆಗೆ ಆಧುನಿಕ ಪರಿಹಾರವಾಗಿ ಟ್ರಾಮ್‌ಗಳನ್ನು ಪರಿಚಯಿಸುವ ಪ್ರಸ್ತಾಪವನ್ನು ಬಿಜೆಪಿ ಸಂಸದ ತೇಜಸ್ವಿ ಸೂರ್ಯ ಪ್ರಸ್ತಾಸಿದ್ದಾರೆ. ಇದಕ್ಕಾಗಿ ನಗರ ಮತ್ತು ಹೊರ ವರ್ತುಲ ರಸ್ತೆ (ORR) ಮೇಲೆ ನಿರ್ದಿಷ್ಟ ಗಮನ ಹರಿಸಲಾಗಿದೆ. ಈ ಉಪಕ್ರಮವು ನಗರದ ಚೌಕಟ್ಟಿನಲ್ಲಿ ಟ್ರಾಮ್‌ಗಳನ್ನು ಪರಿಚಯಿಸುವ ಮೂಲಕ ನಿರಂತರ ಸಾರಿಗೆ ಸವಾಲುಗಳು ಮತ್ತು ದಟ್ಟಣೆಯನ್ನು ಪರಿಹರಿಸುವ ಗುರಿಯನ್ನು ಹೊಂದಿದೆ. ತೇಜಸ್ವಿ ಸೂರ್ಯ ಮತ್ತು ನಗರ/ರಾಜ್ಯ ಅಧಿಕಾರಿಗಳ ನಡುವೆ ಚರ್ಚೆಗಳು ನಡೆಯುತ್ತಿವೆ, ಬೆಂಗಳೂರಿನ ಚಲನಶೀಲತಾ ಕಾರ್ಯತಂತ್ರವನ್ನು ಪರಿಷ್ಕರಿಸಲು ಮತ್ತಷ್ಟು ಪಾಲುದಾರರ ಸಭೆಗಳನ್ನು ಯೋಜಿಸಲಾಗಿದೆ ಎಂದು ವರದಿಯಾಗಿದೆ.

ಪ್ರಸ್ತಾಪದ ಮುಖ್ಯಾಂಶಗಳು

ಮೆಟ್ರೋ ನಿಲ್ದಾಣಗಳು ಮತ್ತು ಪ್ರಮುಖ ವ್ಯಾಪಾರ ಕಾರಿಡಾರ್‌ಗಳ ನಡುವೆ, ವಿಶೇಷವಾಗಿ ಸೆಂಟ್ರಲ್ ಬ್ಯುಸಿನೆಸ್ ಡಿಸ್ಟ್ರಿಕ್ಟ್ ಮತ್ತು ORR (ಔಟರ್ ರಿಂಗ್ ರೋಡ್)ನ 17-ಕಿ.ಮೀ ಟೆಕ್ ಕಾರಿಡಾರ್ ನಡುವೆ ಪರಿಣಾಮಕಾರಿ ಕೊಂಡಿಯಾಗಿ ಟ್ರಾಮ್‌ಗಳ ಕಾರ್ಯಸಾಧ್ಯತೆಯನ್ನು ಅಧ್ಯಯನ ಮಾಡಲು ಸೂರ್ಯ ಒಂದು ಪೈಲಟ್ ಯೋಜನೆ ಘೋಷಿಸಿದ್ದಾರೆ. ಎರಡು ವಾರಗಳಲ್ಲಿ ಕಾರ್ಯಸಾಧ್ಯತಾ ಅಧ್ಯಯನವನ್ನು ಪ್ರಾರಂಭಿಸಲು RITES (ರೈಲ್ ಇಂಡಿಯಾ ತಾಂತ್ರಿಕ ಮತ್ತು ಆರ್ಥಿಕ ಸೇವೆ)ಗೆ ಸೂಚಿಸಲಾಗಿದೆ.

ಪ್ರಸ್ತಾವಿತ ಟ್ರಾಮ್ ವ್ಯವಸ್ಥೆಯು ಹೆಚ್ಚಿನ ಸಂಖ್ಯೆಯ ಜನರನ್ನು ಪರಿಣಾಮಕಾರಿಯಾಗಿ ಸ್ಥಳಾಂತರಿಸುವುದಲ್ಲದೆ, ಕಾರುಗಳು ಮತ್ತು ಬಸ್‌ಗಳ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡಲು ಕೊಡುಗೆ ನೀಡುತ್ತದೆ. ಇದರಿಂದಾಗಿ ಬೆಂಗಳೂರಿನ ದಟ್ಟಣೆಯನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ ಎಂದು ಬಿಜೆಪಿ ಸಂಸದ ತೇಜಸ್ವಿ ಸೂರ್ಯ ಹೇಳಿದ್ದಾರೆ.

ವಿಶಾಲ ನಗರ ಸಾರಿಗೆ ದೃಷ್ಟಿ: ಟ್ರಾಮ್‌ಗಳ ಪ್ರಸ್ತಾಪವು ಸೂರ್ಯ ಪ್ರತಿಪಾದಿಸಿದ ದೊಡ್ಡ ಬದಲಾವಣೆಯ ಭಾಗವಾಗಿದೆ, ಅವರು ORR ನಾದ್ಯಂತ ಮೆಟ್ರೋ, ಉಪನಗರ ರೈಲು ಮತ್ತು ಮೀಸಲಾದ ಲೂಪ್ ಬಸ್‌ಗಳಂತಹ ಸಾರ್ವಜನಿಕ ಸಾರಿಗೆ ವ್ಯವಸ್ಥೆಗಳನ್ನು ಹೆಚ್ಚಿಸುವಂತೆ ಸೂಚಿಸಿದ್ದಾರೆ. ಸುರಂಗ ರಸ್ತೆಯಂತಹ ಕಾರು-ಕೇಂದ್ರಿತ ಯೋಜನೆಗಳಿಂದ ನಗರದ ಹಣವನ್ನು ಸಾರ್ವಜನಿಕ ಸಾರಿಗೆಗೆ ತಿರುಗಿಸಲು ಸೂರ್ಯ ವಾದಿಸಿದ್ದಾರೆ.

ಸುರಂಗ ರಸ್ತೆಗಳಲ್ಲಿ ಸಂಚರಿಸುವ 1,800 ವಾಹನಗಳಿಗೆ ಹೋಲಿಸಿದರೆ ಮೆಟ್ರೋ ಅಥವಾ ಟ್ರಾಮ್ ವ್ಯವಸ್ಥೆಯು ಪ್ರತಿ ದಿಕ್ಕಿನಲ್ಲಿ ಗಂಟೆಗೆ 69,000 ಜನರನ್ನು ಸಾಗಿಸಬಲ್ಲದು ಎಂದು ಹೇಳಿದ್ದಾರೆ. ಪಾದಚಾರಿ ಮಾರ್ಗಗಳನ್ನು ಸುಧಾರಿಸುವುದು, ಬೆಂಗಳೂರು ಮಹಾನಗರ ಭೂ ಸಾರಿಗೆ ಪ್ರಾಧಿಕಾರ (BMLTA)ವನ್ನು ಸಬಲೀಕರಣಗೊಳಿಸುವುದು ಮತ್ತು ಪುನರಾವರ್ತಿತ ರಸ್ತೆ ದುರಸ್ತಿಗಳಿಗಿಂತ ಸುಸ್ಥಿರ ಚಲನಶೀಲತೆಗೆ ಆದ್ಯತೆ ನೀಡುವುದು ಅವರ ಹೆಚ್ಚುವರಿ ಶಿಫಾರಸುಗಳಲ್ಲಿ ಸೇರಿವೆ.

ಟ್ರಾಮ್ ಅನುಕೂಲಗಳು

ಕಾರುಗಳು ಮತ್ತು ಬಸ್‌ಗಳಿಗೆ ಹೋಲಿಸಿದರೆ ಟ್ರಾಮ್‌ಗಳು ಉತ್ತಮ ಸಾಗಿಸುವ ಸಾಮರ್ಥ್ಯವನ್ನು ಹೊಂದಿವೆ, ಇವು ಹೆಚ್ಚಿನ ಸಾಂದ್ರತೆಯ ಪ್ರದೇಶಗಳಿಗೆ ಸೂಕ್ತವಾಗಿರುತ್ತದೆ. ಟ್ರಾಮ್‌ಗಳ ಅನುಸ್ಥಾಪನಾ ವೆಚ್ಚಗಳು ಸುರಂಗ ಅಥವಾ ಎತ್ತರದ ಮೆಟ್ರೋ ರೈಲು ಮಾರ್ಗಗಳಿಗಿಂತ ಗಮನಾರ್ಹವಾಗಿ ಕಡಿಮೆಯಾಗಿದ್ದು, ನಗರಗಳಿಗೆ ವೇಗವಾದ ಮತ್ತು ಹೆಚ್ಚು ಕೈಗೆಟುಕುವ ನೆಟ್‌ವರ್ಕ್ ವಿಸ್ತರಣೆಯನ್ನು ಸಕ್ರಿಯಗೊಳಿಸುತ್ತವೆ.

ಟ್ರಾಮ್‌ಗಳು ಮೆಟ್ರೋ ರೈಲುಗಳು ತಲುಪಲು ಸಾಧ್ಯವಾಗದ ಪ್ರದೇಶಗಳಿಗೂ ತಲುಪಬಲ್ಲವು, ಹಾಗಾಗಿ ಇದು ದೈನಂದಿನ ಪ್ರಯಾಣಿಕರಿಗೆ ನಿರ್ಣಾಯಕವಾಗಿದೆ. ಆಧುನಿಕ ಟ್ರಾಮ್‌ಗಳು ಹೆಚ್ಚಾಗಿ ವಿದ್ಯುತ್ ಅಥವಾ ಬ್ಯಾಟರಿ ಚಾಲಿತವಾಗಿದ್ದು, ಯಾವುದೇ ಕಾರ್ಬನ್ ಹೊರಸೂಸುವಿಕೆ ಇಲ್ಲದೆ ಪರಿಸರ ಸ್ನೇಹಿ ಸಾರಿಗೆ ವಿಧಾನವನ್ನು ನೀಡುತ್ತವೆ. ಟ್ರಾಮ್ ನಗರದ ಸೌಂದರ್ಯ ಹೆಚ್ಚಿಸಬಹುದು ಮತ್ತು ಪ್ರವಾಸೋದ್ಯಮವನ್ನು ಆಕರ್ಷಿಸಬಹುದು.

ಅನಾನುಕೂಲಗಳು

ಟ್ರಾಮ್‌ಗಳು ರಸ್ತೆ ಮಟ್ಟದಲ್ಲಿ ಚಲಿಸುತ್ತವೆ. ಹಾಗಾಗಿ ಅವುಗಳಿಗೆ ಮೀಸಲಾದ ಲೇನ್‌ಗಳನ್ನು ಖಾತರಿಪಡಿಸದಿದ್ದರೆ ವಾಹನ ದಟ್ಟಣೆಯಿಂದ ಉಂಟಾಗುವ ಅವುಗಳ ವೇಗ ಮಿತಿಗೊಳ್ಳಬಹುದು. ಟ್ರಾಮ್ ಮಾರ್ಗಗಳ ನಿರ್ಮಾಣವು ಅಸ್ತಿತ್ವದಲ್ಲಿರುವ ರಸ್ತೆ ಮೂಲಸೌಕರ್ಯ ಮತ್ತು ಸಂಚಾರವನ್ನು ಅಡ್ಡಿಪಡಿಸಬಹುದು, ಇದು ತಾತ್ಕಾಲಿಕ ಅನಾನುಕೂಲತೆಯನ್ನು ಉಂಟುಮಾಡುತ್ತದೆ.

ಕಿರಿದಾದ ಅಥವಾ ಹೆಚ್ಚು ಜನದಟ್ಟಣೆಯ ಬೀದಿಗಳಲ್ಲಿ, ಟ್ರಾಮ್‌ಗಳು ಇತರ ರಸ್ತೆ ಬಳಕೆದಾರರೊಂದಿಗೆ ಸ್ಪರ್ಧಿಸಬಹುದು. ಸರಿಯಾದ ಸಂಚಾರ ನಿಯಮಗಳನ್ನು ಜಾರಿಗೊಳಿಸದಿದ್ದರೆ ಹೆಚ್ಚಿನ ಟ್ರಾಫಿಕ್ ಜಾಮ್‌ಗಳಿಗೆ ಕಾರಣವಾಗಬಹುದು. ದೃಢವಾದ ಸುರಕ್ಷತೆ ಮತ್ತು ಸಂಚಾರ ನಿರ್ವಹಣಾ ಕ್ರಮಗಳನ್ನು ಅಳವಡಿಸಿಕೊಳ್ಳದಿದ್ದರೆ, ಟ್ರಾಫಿಕ್ ದಟ್ಟಣೆಯ ಪಕ್ಕದಲ್ಲಿ ಟ್ರಾಮ್‌ಗಳನ್ನು ಸಂಚರಿಸುವುದರಿಂದ ಅಪಘಾತಗಳು ಹೆಚ್ಚಾಗಬಹುದು.

ಡ್ರೈವ್‌ಸ್ಪಾರ್ಕ್ ಅಭಿಪ್ರಾಯ: ಬೆಂಗಳೂರಿನಲ್ಲಿ ಇನ್ನೂ ಮೆಟ್ರೋ ಕಾಮಗಾರಿಗಳು ನಡೆಯುತ್ತಿವೆ. ಹಲವೆಡೆ ಈ ಕಾಮಗಾರಿಗಳಿಂದಲೇ ಸಾರ್ವಜನಿಕರಿಗೆ ಟ್ರಾಫಿಕ್ ಕಿರಿಕಿರಿ ಹೆಚ್ಚಾಗಿದೆ. ಈಗ ಸಂಸದ ತೇಜಸ್ವಿ ಸೂರ್ಯ ಪ್ರಸ್ತಾಪಿಸಿರುವ ಟ್ರಾಮ್ ಈಗಿರುವ ಟ್ರಾಫಿಕ್ ಸಮಸ್ಯೆಗಳಿಗೆ ಪರ್ಯಾಯವಾಗಲಿದೆಯೇ? ಬೆಂಗಳೂರಿನಲ್ಲಿ ಸಾರ್ವಜನಿಕರಿಗೆ ಉಪಯುಕ್ತವಾಗಲಿದೆಯೇ? ನಿಮ್ಮ ಅನಿಸಿಕೆಗಳನ್ನು ಕಮೆಂಟ್‌ನಲ್ಲಿ ತಿಳಿಸಿ.