ನಾಝಿ ಚಿನ್ನದ ರೈಲಿಗಾಗಿ ಭೂಗತ ಶೋಧ ಕಾರ್ಯ; ಬಯಲಾದಿತೇ ಸತ್ಯಾಸತ್ಯತೆ?

ಮಹಾ ಯುದ್ಧದಲ್ಲಿ ಸೋಲಿನ ಅಂಚಿಗೆ ತಲುಪಿದ್ದ ಹಿಟ್ಲರ್ ಅಪಾರ ಪ್ರಮಾಣದ ಚಿನ್ನಾಭರಣಗಳನ್ನು ಶತ್ರು ಪಾಳೇಯಕ್ಕೆ ಸಿಗದಂತೆ ನೋಡಿಕೊಳ್ಳುವ ನಿಟ್ಟಿನಲ್ಲಿ ಹೂತಿಟ್ಟಿದ್ದರು. ಆದರೆ ಇದಕ್ಕೆಲ್ಲ ಯಾವುದೇ ವೈಜ್ಞಾನಿಕ ಪುರಾವೆಗಳಿಲ್ಲ.

ಈ ರೈಲಿಗೆ ಸರಿ ಸುಮಾರು 70 ವರ್ಷಗಳ ಇತಿಹಾಸವಿದ್ದು, ಭೂಮಿಯೊಳಗೆ 26ರಿಂದ 28 ಅಡಿ ಆಳದಲ್ಲಿ ರೈಲು ಹೂತು ಹೋಗಿದೆಯೆಂದು ಸಂಶೋಧಕರು ಘೋಷಣೆ ಮಾಡಿರುವುದು ಮತ್ತಷ್ಟು ರೋಚಕತೆ ಸೃಷ್ಟಿ ಮಾಡಿದೆ.

ಕಳೆದ ವರ್ಷ ರಾಡಾರ್ ಮುಖಾಂತರ ಸಂಶೋಧನೆ ನಿರತರಾಗಿದ್ದ ಆಂಡ್ರೆಯಾಸ್ ರಿಕ್ಟರ್ ಮತ್ತು ಪೊಲೆಂಡ್ ನ ಪಿಯಾಟ್ರ ಕೋಪೆರ್ ಅಪಾರ ಪ್ರಮಾಣದ ಚಿನ್ನಾಭರಣಗಳನ್ನು ಪತ್ತೆ ಹಚ್ಚಲಾಗಿದೆ ಎಂದು ಬಯಲು ಮಾಡಿದ್ದರು.

ಇದರಂತೆ ವ್ರೊಕ್ಲಾ ಮತ್ತು ವಾಲ್ಬ್ ಝಿಕ್ ನಡುವಣ ರೈಲ್ವೇ ಹಳಿಯಲ್ಲಿ ಖಾಸಗಿ ಅನುದಾನಿತ 35ರಷ್ಟು ಸಂಶೋಧಕರ ತಂಡವು ನಿರಂತರ ಶೋಧನಾ ಕಾರ್ಯವನ್ನು ಆರಂಭಿಸಿದೆ.

ಮಗದೊಂದು ಮೂಲದ ಪ್ರಕಾರ 1940ರ ದಶಕದಲ್ಲಿ ಪೂರ್ವ ಯುರೋಪ್ ನಿಂದ ಕೊಳ್ಳೆ ಹೊಡೆದ ಸಂಪತ್ತುಗಳನ್ನು ರೈಲು ಮೂಲಕ ಬರ್ಲಿನ್ ಗೆ ಸಾಗಿಸಲಾಗುತ್ತಿತ್ತು.

ಪ್ರಸ್ತುತ ನಾಪತ್ತೆಯಾಗಿರುವ ರೈಲು 300 ಟನ್ ಗಳಷ್ಟು ಚಿನ್ನಾಭರಣಗಳನ್ನು ಸಾಗಿಸಲಾಗುತ್ತಿತ್ತು ಎಂಬುದನ್ನು ಊಹೆ ಮಾಡಲಾಗಿದೆ. ಆದರೆ ಇದ್ಯಾವುದೂ ದೃಢಪಟ್ಟಿಲ್ಲ.

ಈ ನಡುವೆ ರೈಲಿನಲ್ಲಿ ಸ್ಪೋಟಕ ವಸ್ತುಗಳು, ಶಸ್ತ್ರಾಸ್ತ್ರಗಳನ್ನು ಸಾಗಿಸಲು ಯತ್ನ ನಡೆದಿತ್ತು ಎಂಬುದರ ಬಗ್ಗೆಯೂ ಭೀತಿ ಕಾಡಿದೆ.

ಒಟ್ಟಿನಲ್ಲಿ ವೈಜ್ಞಾನಿಕ ಅಧ್ಯಯನದಲ್ಲಿ ಅಂತಹ ರೈಲಿನ ಯಾವುದೇ ಪುರಾವೆಗಳಿಲ್ಲ ಎಂದು ಘೋಷಿಸಿದ್ದರೂ ಛಲ ಬಿಡದ ಸಂಶೋಧಕರು ನಾಝಿ ರೈಲಿನ ಸತ್ಯಾಸತ್ಯತೆಯನ್ನು ಬಯಲು ಮಾಡಲು ಹೊರಟಿರುವುದು ಬಹಳಷ್ಟು ಕುತೂಹಲ ಕೆರಳಿಸಿದೆ.