ವಂದೇ ಭಾರತ್ ಬಂದರೇನು ಸದಾ ಸೇವೆಯಲ್ಲಿರುತ್ತೇವೆ: ರೆಸ್ಟೋರೆಂಟ್‌ಗಳಾದ ಹಳೇ ಬೋಗಿಗಳು

ಭಾರತೀಯ ರೈಲ್ವೆಯಲ್ಲಿ ಹಲವು ಹಳೆಯ ಕೋಚ್‌ಗಳು ಖಾಲಿಯಾಗಿ ಬಿದ್ದಿವೆ. ಇನ್ನೊಂದೆಡೆ ಇಲಾಖೆಗೆ ವಂದೇ ಭಾರತ್ ರೈಲುಗಳು ಎಂಟ್ರಿ ಕೊಡುತ್ತಿವೆ. ಹೀಗಿರುವಾಗ ಹಳೆಯ ಖಾಲಿ ಕೋಚ್‌ಗಳ ಪರಿಸ್ಥಿತಿಯೇನು? ಇದಕ್ಕೆ ಅದ್ಬುತ ಮಾರ್ಗವನ್ನು ಕಂಡುಕೊಂಡಿರುವ ರೈಲ್ವೆಯು ಪ್ರಯಾಣಿಕರಿಗೆ ಕೋಚ್‌ನೊಳಗೆ ರೆಸ್ಟೋರೆಂಟ್ ಅನುಭವ ನೀಡಲು ಮುಂದಾಗಿದೆ.

ಭಾರತೀಯ ರೈಲ್ವೇಯು ಎರಡು ಕೈಬಿಡಲಾದ ರೈಲ್ವೇ ಕೋಚ್‌ಗಳನ್ನು ಕತ್ರಾ ಮತ್ತು ಜಮ್ಮು ರೈಲು ನಿಲ್ದಾಣಗಳಲ್ಲಿ ಥೀಮ್ ಆಧಾರಿತ ರೆಸ್ಟೋರೆಂಟ್‌ಗಳಾಗಿ ಪರಿವರ್ತಿಸಲು ಸಿದ್ಧವಾಗಿಬಿಟ್ಟಿದೆ. ಇದು ಭಾರತೀಯ ರೈಲ್ವೆಯ ಯೋಜನೆಯಾಗಿದ್ದು, ಇದರ ಅಡಿಯಲ್ಲಿ ಹಳೆಯ ಕೋಚ್‌ಗಳನ್ನು ರೈಲು - ಕೋಚ್ ರೆಸ್ಟೋರೆಂಟ್‌ಗಳಾಗಿ ಪರಿವರ್ತಿಸಲಾಗುತ್ತದೆ. ಇದಕ್ಕೆ "ಬ್ಯೂಟಿಫುಲ್ ರೆಸ್ಟೊರೆಂಟ್ಸ್ ಆನ್ ವೀಲ್ಸ್" ಎಂದು ಹೆಸರಿಸಲಾಗಿದೆ.

ಎರಡು ಎಸಿ ರೆಸ್ಟೊರೆಂಟ್‌ಗಳು ಸೇರಿ ವಾರ್ಷಿಕ 50 ಲಕ್ಷ ರೂಪಾಯಿ ಆದಾಯ ತರಲಿದ್ದು, ಪ್ರತಿಯೊಂದೂ 1,600 ಚದರ ಅಡಿಗಳಲ್ಲಿ ಸ್ಥಾಪಿಸಲಾಗುತ್ತಿದೆ ಎಂದು ತಿಳಿದುಬಂದಿದೆ. "ಜಮ್ಮು ಮತ್ತು ಕತ್ರಾದಲ್ಲಿ ಎರಡು ರೈಲು-ಕೋಚ್ ರೆಸ್ಟೋರೆಂಟ್‌ಗಳು ಕಾರ್ಯನಿರ್ವಹಿಸುತ್ತಿವೆ. ಇದಕ್ಕಾಗಿ ಎರಡು ವಿಭಿನ್ನ ಪಕ್ಷಗಳಿಗೆ ಟೆಂಡರ್‌ಗಳನ್ನು ನೀಡಲಾಗಿದೆ ಎಂದು ಜಮ್ಮುವಿನ ವಿಭಾಗೀಯ ಸಾರಿಗೆ ವ್ಯವಸ್ಥಾಪಕ ಪ್ರತೀಕ್ ಶ್ರೀವಾಸ್ತವ ಪಿಟಿಐಗೆ ತಿಳಿಸಿದ್ದಾರೆ.

"ಈ ಯೋಜನೆಯಡಿಯಲ್ಲಿ, ಖಾಸಗಿಯವರಿಗೆ ಅವರ ಸ್ವಂತ ವಿನ್ಯಾಸಗಳ ಪ್ರಕಾರ ಅತ್ಯಾಧುನಿಕ ರೆಸ್ಟೋರೆಂಟ್‌ಗಳನ್ನು ರಚಿಸಲು ಕೋಚ್‌ಗಳನ್ನು ನೀಡುತ್ತಿದ್ದೇವೆ" ಎಂದು ಅವರು ಹೇಳಿದರು. ಮೊದಲ ಕೋಚ್ ರೆಸ್ಟೋರೆಂಟ್ ಡಿಸೆಂಬರ್ ವೇಳೆಗೆ ತನ್ನ ಬಾಗಿಲು ತೆರೆಯುವ ನಿರೀಕ್ಷೆಯಿದೆ, ಕೋಚ್‌ಗಳು ಈಗಾಗಲೇ ಸ್ಥಳದಲ್ಲಿವೆ. ಎರಡು ರೆಸ್ಟೋರೆಂಟ್‌ಗಳಿಗೆ 'ಅನ್ನಪೂರ್ಣ' ಮತ್ತು 'ಮಾ ದುರ್ಗಾ' ಎಂದು ಹೆಸರಿಡಲಾಗಿದೆ.

ಈಗಾಗಲೇ ಭಾರತದಾದ್ಯಂತ ಒಂಬತ್ತರಿಂದ 10 ಪ್ರಮುಖ ರೈಲು ನಿಲ್ದಾಣಗಳಲ್ಲಿ ಯಶಸ್ವಿಯಾಗಿ ಪ್ರಾರಂಭಿಸಲಾಗಿದೆ. "ಈ ಉಪಕ್ರಮವನ್ನು ರಾಷ್ಟ್ರವ್ಯಾಪಿ ಪ್ರಯೋಗಿಸಲಾಗುತ್ತಿದೆ. ನನಗೆ ತಿಳಿದಿರುವಂತೆ, ಇದು ಈಗಾಗಲೇ ಜಬಲ್‌ಪುರ, ಭೋಪಾಲ್, ಲಕ್ನೋ ಮತ್ತು ವಾರಣಾಸಿಯಂತಹ ಹಲವಾರು ರೈಲು ನಿಲ್ದಾಣಗಳಲ್ಲಿ ಕಾರ್ಯನಿರ್ವಹಿಸುತ್ತಿದೆ ಎಂದು ಡಿಟಿಎಂ ಹೇಳಿದೆ.

ಜಮ್ಮು ಮತ್ತು ಕತ್ರಾ ರೈಲು ನಿಲ್ದಾಣಗಳಲ್ಲಿನ ಎರಡು ರೆಸ್ಟೋರೆಂಟ್‌ಗಳು ಮಾಂಸಾಹಾರಿ ಆಹಾರವನ್ನು ಸಹ ನೀಡುತ್ತವೆ. ಸಂಪೂರ್ಣ ಹವಾನಿಯಂತ್ರಿತವಾಗಿರುತ್ತವೆ ಎಂದು ಅವರು ಹೇಳಿದರು. "ಇದು ಸ್ಥಳದ ಸೌಂದರ್ಯಕ್ಕೆ ಉತ್ತಮ ಸೇರ್ಪಡೆಯಾಗಲಿದೆ. ರೈಲ್ವೇ ನಿಲ್ದಾಣದಲ್ಲಿ ವಿಭಿನ್ನ ಮತ್ತು ವಿಶಿಷ್ಟವಾದ ಭೋಜನದ ಅನುಭವವನ್ನು ನೀಡುತ್ತಿರುವ ಇಲ್ಲಿನ ಮೊದಲ ರೆಸ್ಟೋರೆಂಟ್ ಇದಾಗಿದೆ,'' ಎಂದು ಹೇಳಿದರು.

ಇದೇ ಕುರಿತು ಪ್ರತಿಕ್ರಿಯಿಸಿರುವ ಅನ್ನಪೂರ್ಣ ರೆಸ್ಟೋರೆಂಟ್ ಮಾಲೀಕ ಪ್ರದೀಪ್ ಗುಪ್ತಾ, "ಒಂದು ಕೋಚ್ ಅನ್ನು ಸಂಪೂರ್ಣ ಕ್ರಿಯಾತ್ಮಕ ರೆಸ್ಟೋರೆಂಟ್ ಆಗಿ ಪರಿವರ್ತಿಸಲು 90 ದಿನಗಳನ್ನು ತೆಗೆದುಕೊಳ್ಳಲಾಗಿದೆ. ಅಗತ್ಯವಿರುವ ಎಲ್ಲಾ ಸೌಲಭ್ಯಗಳೊಂದಿಗೆ ಇದು ಸಜ್ಜುಗೊಳಿಸಲ್ಪಡುತ್ತದೆ. " ಜಮ್ಮುವಿನಲ್ಲಿರುವ ರೈಲು-ಕೋಚ್ ರೆಸ್ಟೋರೆಂಟ್‌ಗಳ ಬಗ್ಗೆ ಪ್ರವಾಸಿಗರು ಉತ್ಸುಕರಾಗಿದ್ದಾರೆ ಎಂದು ಅವರು ಹೇಳಿದರು.

ಇಲಾಖೆಯ ಈ ನಿರ್ಧಾರವು ನಿಜಕ್ಕೂ ಶ್ಲಾಘನೀಯ, ಈಗಾಗಲೇ ಒಂದೊಂದಾಗಿ ವಂದೇ ಭಾರತ್ ರೈಲುಗಳು ಎಂಟ್ರಿ ಕೊಡುತ್ತಿದ್ದು, ಮುಂಬರುವ ದಿನಗಳಲ್ಲಿ ಹಳೆಯ ರೈಲುಗಳು ಕಣ್ಮರೆಯಾಗಲಿವೆ. ಆದ್ರೆ ಹಳೆಯ ರೈಲುಗಳು ನಮ್ಮೆಲ್ಲರಿಗೂ ಆತ್ಮೀಯವಾಗಿರುವುದರಲ್ಲಿ ಯಾವುದೇ ಅನುಮಾನವಿಲ್ಲ. ಹಾಗಾಗಿ ಇವು ರೆಸ್ಟಾರೆಂಟ್‌ಗಳಾಗಿ ನಮ್ಮೆ ಹಳೆಯ ನೆನಪುಗಳನ್ನು ಉಳಿಸಲಿವೆ. ಈ ಬಗ್ಗೆ ನಿಮ್ಮ ಅನಿಸಿಕೆಗಳನ್ನು ಕಮೆಂಟ್‌ನಲ್ಲಿ ತಿಳಿಸಿ.

ಡ್ರೈವ್‌ಸ್ಪಾರ್ಕ್ ಕನ್ನಡ ವೆಬ್‌ಸೈಟ್ ತ್ವರಿತವಾಗಿ ಆಟೋಮೊಬೈಲ್ ಸಂಬಂಧಿಸಿದ ಸುದ್ದಿಗಳನ್ನು ನೀಡುತ್ತದೆ. ಜೊತೆಗೆ ಸೋಷಿಯಲ್ ಮೀಡಿಯಾಗಳ ಮೂಲಕ ತಕ್ಷಣವೇ ಓದುಗರೊಂದಿಗೆ ಸುದ್ದಿಗಳನ್ನು ಶೇರ್ ಮಾಡುತ್ತೇವೆ. ಇತ್ತೀಚಿನ ಕಾರು, ಬೈಕ್ ಸುದ್ದಿ, ಟೆಸ್ಟ್ ಡ್ರೈವ್ ವರದಿಗಳು ಮತ್ತು ವೀಡಿಯೊಗಳನ್ನು ಪಡೆಯಲು ನಮ್ಮ ಫೇಸ್‌ಬುಕ್, ಇನ್‌ಸ್ಟಾಗ್ರಾಮ್, ಯೂಟ್ಯೂಬ್ ಪೇಜ್‌ಗಳೊಂದಿಗೆ ಫಾಲೋ ಮಾಡಿ. ನಿಮಗೆ ನಮ್ಮ ಯಾವುದೇ ಸುದ್ದಿ ಇಷ್ಟವಾದರೆ ಲೈಕ್, ಕಾಮೆಂಟ್ ಮಾಡುವುದನ್ನು ಮರೆಯದಿರಿ.