ರಿವರ್ಸ್ ಕಾರು ಜಂಪ್; ಗಿನ್ನೆಸ್ ದಾಖಲೆ ಬರೆದ ರೊಬ್

ಹೌದು, ರೊಬ್ ಡಿರೆಕ್ (Rob Dyrek) ಎಂಬವರು ಇಂತಹದೊಂದು ಮಹಾ ಸಾಧನೆ ಮಾಡಿ ತೋರಿಸಿದ್ದಾರೆ. ವಿಶೇಷವೆಂದರೆ ಇವರು ಯಾವುದೇ ವೃತ್ತಿ ನಿರತ ರೇಸ್ ಚಾಲಕ ಅಥವಾ ಸ್ಟಂಟ್ ರೇಸರ್ ಅಲ್ಲ.

ನೀವಿಲ್ಲಿ ಡಿರೆಕ್ ಸಾಧನೆಯನ್ನು ಮೆಚ್ಚಲೇ ಬೇಕಾಗುತ್ತದೆ. ಈ ಮೂಲಕ ಕಾರು ರಿವರ್ಸ್‌ನಲ್ಲಿ ಅತ್ಯಂತ ದೂರಕ್ಕೆ ನೆಗೆದ ಚಾಲಕರೆಂಬ ದಾಖಲೆಯೊಂದಿಗೆ ಗಿನ್ನೆಸ್ ಪುಟ ಸೇರಿಕೊಂಡಿದ್ದಾರೆ.

ಅಷ್ಟಕ್ಕೂ ರೊಬ್ ಎಷ್ಟು ದೂರದ ವರೆಗೆ ಕಾರಲ್ಲಿ ನೆಗೆದಿದ್ದಾರೆ ಎಂಬುದನ್ನು ತಿಳಿದುಕೊಳ್ಳುವ ಕುತೂಹಲತೆ ನಿಮ್ಮನ್ನು ಕಾಡಬಹುದು. ಹೌದು, 89 ಫೀಟ್ ಹಾಗೂ 3 ಕಾಲು ಇಂಚು ನಗೆಯುವ ಮೂಲಕ ದಾಖಲೆ ಸ್ಥಾಪಿಸಿದ್ದಾರೆ.

ಇದಕ್ಕಾಗಿ ಅವರು ಷೆವರ್ಲೆ ಸೊನಿಕ್ ಹ್ಯಾಚ್‌ಬ್ಯಾಕ್ ಕಾರನ್ನು ಬಳಸಿಕೊಂಡಿದ್ದಾರೆ. ಇದರಲ್ಲಿ ಅಲ್ಪ ಸ್ವಲ್ಪ ಬದಲಾವಣೆಯನ್ನು ತರಲಾಗಿತ್ತು. ಉದಾಹರಣೆ ಭಾರ ಕಡಿತಗೊಳಿಸುವುದು ಹಾಗೂ ಹೆಚ್ಚಿನ ಸುರಕ್ಷತೆ ಒದಗಿಸುವುದು ಮುಂತಾದ ಬದಲಾವಣೆಗಳನ್ನು ತರಲಾಗಿತ್ತು.

ಪ್ರಸ್ತುತ ಇಂತಹ ಸಾಹಸ ಪ್ರದರ್ಶನ ಮಾಡುವುದರಲ್ಲಿ ರೊಬ್ ನಿಸ್ಸೀಮಿರೆನಿಸಿಕೊಂಡಿದ್ದಾರೆ. ಈ ಹಿಂದೆ 2011ರಲ್ಲಿ 360 ಡಿಗ್ರಿ ಕಿಕ್-ಪ್ಲಿಪ್ ಸ್ಟಂಟ್ ಪ್ರದರ್ಶಿಸಿದ ಮೊದಲ ಚಾಲಕರೆನಿಸಿಕೊಂಡಿದ್ದರು. ಅಲ್ಲೂ ಷೆವರ್ಲೆ ಸೊನಿಕ್ ಕಾರನ್ನೇ ಬಳಕೆ ಮಾಡಿದ್ದರು.

ಅಂದ ಹಾಗೆ ರೊಬ್ ಷೆವರ್ಲೆ ಕಾರನ್ನೇ ಆಯ್ಕೆ ಮಾಡಲು ಕಾರಣವೊಂದಿದೆ. ಅವರು ಷೆವರ್ಲೆ ಕಾರುಗಳನ್ನು ಅತಿ ಹೆಚ್ಚು ನೆಚ್ಚಿಸಿಕೊಂಡಿದ್ದಾರೆ. ಅಲ್ಲದೆ ಷೆವಿ ಕಾರಗಳನ್ನು ಹೆಚ್ಚು ಇಷ್ಟಪಡುವುದಾಗಿ ತಿಳಿಸಿದ್ದಾರೆ.

ಅಮೆರಿಕದಲ್ಲಿ ಟಿವಿ ಚಾನೆಲ್‌ವೊಂದರಲ್ಲಿ ಕೆಲಸ ಮಾಡುತ್ತಿರುವ ರೊಬ್ 'ಫ್ಯಾಂಟಸಿ ಫ್ಯಾಕ್ಟರಿ' ಎಂಬ ರಿಯಾಲಿಟಿ ಶೋ ನಡೆಸಿ ಕೊಡುತ್ತಾರೆ. ಇದರ ಗ್ರಾಂಡ್ ಫಿನಾಲೆಯಲ್ಲಿ ಇಂತಹದೊಂದು ಸಾಧನೆ ಮೆರೆದಿದ್ದಾರೆ.

ರಿವರ್ಸ್ ಕಾರು ಜಂಪ್ - ವೀಕ್ಷಿಸಿ ರೋಮಾಂಚನಕಾರಿ ವೀಡಿಯೋ