ಕಾರು ಖರೀದಿಸುವ ಮುನ್ನ ಎಚ್ಚರ! 2028ರಿಂದ ಬದಲಾಗಲಿದೆ ಭಾರತದ ರಸ್ತೆ ಸುರಕ್ಷತೆ ನಿಯಮ

ಭಾರತದ ರಸ್ತೆಗಳಲ್ಲಿ ಸುರಕ್ಷತೆಯನ್ನು ಹೆಚ್ಚಿಸಲು ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯ ಮಹತ್ವದ ಹೆಜ್ಜೆಯನ್ನಿಟ್ಟಿದೆ. 'ವೆಹಿಕಲ್-ಟು-ವೆಹಿಕಲ್' (V2V) ಕಮ್ಯುನಿಕೇಷನ್ ಸಿಸ್ಟಮ್ ಜಾರಿಗೆ ತರಲು ಸರ್ಕಾರ ಕರಡು ಅಧಿಸೂಚನೆ ಹೊರಡಿಸಿದ್ದು, ಇದು ವಾಹನಗಳಲ್ಲಿರುವ ಎಡಿಎಎಸ್ (ADAS) ತಂತ್ರಜ್ಞಾನಕ್ಕೆ ಹೊಸ ಆಯಾಮ ನೀಡಲಿದೆ. ಈ ವ್ಯವಸ್ಥೆಯಿಂದಾಗಿ ವೈರ್‌ಲೆಸ್ ನೆಟ್‌ವರ್ಕ್ ಮೂಲಕ ವಾಹನಗಳು ತಮ್ಮ ನೈಜ ಸಮಯದ ಸ್ಥಳ ಮತ್ತು ವೇಗದ ಮಾಹಿತಿಯನ್ನು ಪರಸ್ಪರ ಹಂಚಿಕೊಳ್ಳಲು ಸಾಧ್ಯವಾಗುತ್ತದೆ. ಹೀಗಾಗಿ, 2028 ರ ವೇಳೆಗೆ ಜಾರಿಗೆ ಬರಲಿರುವ ಈ ಹೊಸ ನಿಯಮ, ತಂತ್ರಜ್ಞಾನ ಮತ್ತು ಕಾರುಗಳ ಬೆಲೆಯ ಮೇಲಾಗುವ ಪರಿಣಾಮಗಳ ಬಗ್ಗೆ ವಾಹನ ಖರೀದಿದಾರರು ತಿಳಿದುಕೊಳ್ಳುವುದು ಅಗತ್ಯ.

ಕನೆಕ್ಟೆಡ್ ಮೊಬಿಲಿಟಿಗಾಗಿ ರೂಪಿಸಲಾದ ಹೊಸ 'ಎಐಎಸ್-230' (AIS-230) ಸುರಕ್ಷತಾ ಮಾನದಂಡಗಳ ಆಧಾರದ ಮೇಲೆ ಸರ್ಕಾರ ಈ ನಿಯಮಗಳನ್ನು ಸಿದ್ಧಪಡಿಸಿದೆ. ವಾಹನ ತಯಾರಕರಿಗೆ 2027 ರ ಅಕ್ಟೋಬರ್ 1 ರಿಂದ ಈ ಸೌಲಭ್ಯವನ್ನು ಐಚ್ಛಿಕವಾಗಿ ನೀಡಲು ಅವಕಾಶವಿರಲಿದೆ. ಆದರೆ, 2028 ರ ಅಕ್ಟೋಬರ್ 1 ರಿಂದ ದ್ವಿಚಕ್ರ ವಾಹನಗಳು, ಪ್ರಯಾಣಿಕರ ಕಾರುಗಳು ಮತ್ತು ವಾಣಿಜ್ಯ ವಾಹನಗಳಲ್ಲಿ ಇದನ್ನು ಅಳವಡಿಸುವುದು ಕಡ್ಡಾಯವಾಗಲಿದೆ. ಈ ತಂತ್ರಜ್ಞಾನಕ್ಕಾಗಿ ದೂರಸಂಪರ್ಕ ಇಲಾಖೆಯು ಈಗಾಗಲೇ ಪ್ರತ್ಯೇಕ 5.9 GHz ಅನ್‌ಲೈಸೆನ್ಸ್ಡ್ ಫ್ರೀಕ್ವೆನ್ಸಿ ಬ್ಯಾಂಡ್ ಅನ್ನು ಕಾಯ್ದಿರಿಸಿದೆ.

V2V ತಂತ್ರಜ್ಞಾನವು ಎಡಿಎಎಸ್ (ADAS) ಸಾಮರ್ಥ್ಯವನ್ನು ಹೇಗೆ ಹೆಚ್ಚಿಸುತ್ತದೆ?

ಸದ್ಯ ಚಾಲ್ತಿಯಲ್ಲಿರುವ ಎಡಿಎಎಸ್ (ADAS) ವ್ಯವಸ್ಥೆಯು ರೇಡಾರ್ ಸೆನ್ಸರ್ ಮತ್ತು ಕ್ಯಾಮೆರಾಗಳನ್ನು ನೆಚ್ಚಿಕೊಂಡಿದ್ದು, ಕಣ್ಣಿಗೆ ಕಾಣಿಸುವ ವ್ಯಾಪ್ತಿಯಲ್ಲಿ ಮಾತ್ರ ಕೆಲಸ ಮಾಡುತ್ತದೆ. ಆದರೆ V2V ತಂತ್ರಜ್ಞಾನವು ಕಣ್ಣಿಗೆ ಕಾಣಿಸದ ಅಥವಾ ದೂರದಲ್ಲಾಗುವ ಅಪಘಾತಗಳು ಮತ್ತು ಸಡನ್ ಬ್ರೇಕಿಂಗ್ ಬಗ್ಗೆ ಚಾಲಕರಿಗೆ ಮುಂಚಿತವಾಗಿಯೇ ಎಚ್ಚರಿಕೆ ನೀಡುತ್ತದೆ. ಇನ್ಮುಂದೆ ಪ್ರತಿಯೊಂದು ಹೊಸ ಕಾರಿನಲ್ಲೂ ಕಂಪನಿಯಿಂದಲೇ 'ಆನ್-ಬೋರ್ಡ್ ಯೂನಿಟ್' (OBU) ಅಳವಡಿಸಲಾಗುತ್ತದೆ. ಈ ಸಾಧನದಿಂದಾಗಿ ಕಾರುಗಳ ಬೆಲೆ ಸುಮಾರು 5,000 ದಿಂದ 7,000 ರೂಪಾಯಿಗಳವರೆಗೆ ಹೆಚ್ಚಾಗಬಹುದು ಎಂದು ತಜ್ಞರು ಅಂದಾಜಿಸಿದ್ದಾರೆ.

ಅನುಷ್ಠಾನದ ಹಂತ	ಸಮಯಾವಧಿ	ವಾಹನಗಳ ವ್ಯಾಪ್ತಿ ಮತ್ತು ವೆಚ್ಚ
ಐಚ್ಛಿಕ ಅಳವಡಿಕೆ	ಅಕ್ಟೋಬರ್ 1, 2027	AIS-230 ಮಾನದಂಡದ ಐಚ್ಛಿಕ ಅಳವಡಿಕೆ
ಕಡ್ಡಾಯ ಅನುಷ್ಠಾನ	ಅಕ್ಟೋಬರ್ 1, 2028	ಎಲ್ಲಾ ಹೊಸ L, M, ಮತ್ತು N ವರ್ಗದ ವಾಹನಗಳು
ಸಾಧನದ ವೆಚ್ಚ	2027–2028	ಪ್ರತಿ ಆನ್-ಬೋರ್ಡ್ ಯೂನಿಟ್‌ಗೆ ₹5,000 ದಿಂದ ₹7,000

ಭಾರತೀಯ ಕಾರು ಗ್ರಾಹಕರಿಗೆ V2V ಕರಡು ನಿಯಮಗಳಿಂದಾಗುವ ಅನುಕೂಲಗಳೇನು?

ಚಾಲಕರ ಲೊಕೇಶನ್ ಮಾಹಿತಿಯ ರಕ್ಷಣೆಗಾಗಿ AIS-230 ಮಾನದಂಡಗಳಲ್ಲಿ ಡೇಟಾ ಪ್ರೈವಸಿ ನಿಯಮಗಳನ್ನು ಸೇರಿಸಲಾಗಿದೆ. ವಾಹನಗಳ ನಡುವಿನ ಸಂವಹನವು ಸಂಪೂರ್ಣ ಎನ್‌ಕ್ರಿಪ್ಟ್ ಆಗಿರಲಿದ್ದು, ಬಳಕೆದಾರರ ವೈಯಕ್ತಿಕ ಮಾಹಿತಿಯನ್ನು ಯಾವುದೇ ಸೆಂಟ್ರಲ್ ಸರ್ವರ್‌ಗಳಲ್ಲಿ ಸಂಗ್ರಹಿಸಲಾಗುವುದಿಲ್ಲ. ವಿಪರೀತ ಸಂಚಾರ ದಟ್ಟಣೆ ಇರುವ ನಗರಗಳಲ್ಲಿ ಚಾಲನೆ ಮಾಡುವಾಗ ಅಪಘಾತದ ಮುನ್ಸೂಚನೆ ಹಾಗೂ ಆಂಬ್ಯುಲೆನ್ಸ್‌ನಂತಹ ತುರ್ತು ವಾಹನಗಳ ಎಚ್ಚರಿಕೆ ತಿಳಿಯಲು ಇದು ನೆರವಾಗಲಿದೆ. ವಿಶೇಷವೆಂದರೆ, ಈ ಸುರಕ್ಷತಾ ವ್ಯವಸ್ಥೆಯು ಕೆಲಸ ಮಾಡಲು ಮೊಬೈಲ್ ಇಂಟರ್ನೆಟ್ ಸಂಪರ್ಕದ ಅಗತ್ಯವಿರುವುದಿಲ್ಲ.

ಪ್ರಸ್ತುತ ಹೊಸ ಕಾರು ಖರೀದಿಸಲು ಯೋಜಿಸುತ್ತಿರುವವರು ತಮ್ಮ ಪ್ಲಾನ್ ಮುಂದೂಡುವ ಅಗತ್ಯವಿಲ್ಲ. 2028 ರ ಗಡುವಿನ ನಂತರವೂ ಈಗಿರುವ ವಾಹನಗಳನ್ನು ರಸ್ತೆಯಲ್ಲಿ ಚಲಾಯಿಸುವುದು ಸಂಪೂರ್ಣ ಕಾನೂನುಬದ್ಧವಾಗಿರುತ್ತದೆ. ಆದರೆ, ಹೆದ್ದಾರಿಗಳಲ್ಲಿ ಹೆಚ್ಚಿನ ಸುರಕ್ಷತೆಯನ್ನು ಬಯಸುವ ಗ್ರಾಹಕರು 2027 ರ ಕೊನೆಯಲ್ಲಿ ಬರಲಿರುವ V2V ತಂತ್ರಜ್ಞಾನ ಹೊಂದಿರುವ ಕಾರುಗಳನ್ನು ಪರಿಗಣಿಸಬಹುದು. ಈ ತಂತ್ರಜ್ಞಾನವು ಎಕ್ಸ್‌ಪ್ರೆಸ್‌ವೇಗಳಲ್ಲಿ ಸಂಭವಿಸುವ ಅಪಘಾತಗಳನ್ನು ಗಣನೀಯವಾಗಿ ತಗ್ಗಿಸಿ, ಭಾರತೀಯ ರಸ್ತೆ ಸುರಕ್ಷತೆಯಲ್ಲಿ ಕ್ರಾಂತಿಕಾರಿ ಬದಲಾವಣೆ ತರಲಿದೆ.