ವಿಮಾನದೊಳಗೆ ಸೆಖೆಯೆಂದು ವಿಮಾನದ ರೆಕ್ಕೆ ಮೇಲೆ ಕುಳಿತ ಮಹಿಳೆ

ಮಹಿಳೆಯೊಬ್ಬರು ವಿಚಿತ್ರವಾಗಿ ವರ್ತಿಸಿದ ಕಾರಣಕ್ಕೆ ನಿಷೇಧಕ್ಕೆ ಒಳಗಾಗಿದ್ದಾರೆ. ಟರ್ಕಿಯ ಅಂಟಲ್ಯ ನಗರದಿಂದ ಉಕ್ರೇನ್‌ಗೆ ಪ್ರಯಾಣಿಸುತ್ತಿದ್ದ ಈ ವಿಮಾನದಲ್ಲಿದ್ದ ಮಹಿಳೆಯೊಬ್ಬರು ಇದ್ದಕ್ಕಿದ್ದಂತೆ ವಿಮಾನದ ಎಮರ್ಜೆನ್ಸಿ ಗೇಟ್ ತೆರೆದು ವಿಮಾನದ ರೆಕ್ಕೆಯ ಮೇಲೆ ಕುಳಿತಿದ್ದಾರೆ. ಉಕ್ರೇನ್‌ನ ವಿಮಾನ ನಿಲ್ದಾಣದಲ್ಲಿ ಬೋಯಿಂಗ್ 737 ವಿಮಾನ ಲ್ಯಾಂಡಿಂಗ್ ಆಗಿದ್ದ ವೇಳೆ ಈ ಘಟನೆ ನಡೆದಿದೆ.

ವಿಮಾನವನ್ನು ರನ್ ವೇಯಲ್ಲಿ ನಿಲ್ಲಿಸಿದ್ದ ವೇಳೆ ಮಹಿಳೆಯೊಬ್ಬರು ವಿಮಾನದ ರೆಕ್ಕೆಗಳ ಮೇಲಿರುವ ಎಮರ್ಜೆನ್ಸಿ ಗೇಟ್ ತೆರೆದು ರೆಕ್ಕೆಗಳ ಮೇಲೆ ನಡೆದು ಅದರ ಮೇಲೆ ಕುಳಿತಿದ್ದಾರೆ. ಮಹಿಳೆಯ ಈ ನಡೆಯನ್ನು ಕಂಡ ವಿಮಾನ ನಿಲ್ದಾಣದ ಸಿಬ್ಬಂದಿ ಗಾಬರಿಯಾಗಿದ್ದಾರೆ.

MOST READ:ಒಂದು ವರ್ಷದಿಂದ ಚಲಿಸಿದರೂ ಇನ್ನೂ ಗುರಿ ಮುಟ್ಟದ ಟ್ರಕ್

ವಿಮಾನ ನಿಲ್ದಾಣದ ಸಿಬ್ಬಂದಿ ತಕ್ಷಣವೇ ಮಹಿಳೆಗೆ ಎಚ್ಚರಿಕೆ ನೀಡಿದ್ದಾರೆ. ಕೆಲವು ಸೆಕೆಂಡುಗಳ ನಂತರ ಮಹಿಳೆ ಸ್ವತಃ ಎಮರ್ಜೆನ್ಸಿ ಗೇಟ್ ಮೂಲಕ ವಿಮಾನದ ಒಳಕ್ಕೆ ಪ್ರವೇಶಿಸಿದ್ದಾರೆ. ವಿಮಾನ ನಿಲ್ದಾಣದ ಸಿಬ್ಬಂದಿ ಈ ಬಗ್ಗೆ ವಿಚಾರಿಸಿದಾಗ ವಿಮಾನದೊಳಗೆ ಸೆಖೆಯಾದ ಕಾರಣ ತಂಪಾದ ಗಾಳಿ ಪಡೆಯಲು ಎಮರ್ಜೆನ್ಸಿ ಗೇಟ್ ತೆರೆದು ಹೊರ ಹೋಗಿದ್ದಾಗಿ ತಿಳಿಸಿದ್ದಾರೆ.

ಇಬ್ಬರು ಮಕ್ಕಳ ತಾಯಿಯಾಗಿರುವ ಆ ಮಹಿಳೆ, ತಮ್ಮ ಪತಿ ಹಾಗೂ ಮಕ್ಕಳೊಂದಿಗೆ ವಿಮಾನದಲ್ಲಿ ಪ್ರಯಾಣಿಸುತ್ತಿದ್ದರು ಎಂದು ತನಿಖೆಯಿಂದ ತಿಳಿದುಬಂದಿದೆ. ವಿಮಾನವು ರನ್ ವೇಯಲ್ಲಿ ನಿಂತಿದ್ದ ಸಮಯದಲ್ಲಿ ವಿಮಾನದೊಳಗಿದ್ದ ಬಹುತೇಕ ಎಲ್ಲಾ ಪ್ರಯಾಣಿಕರು ಇಳಿದಿದ್ದರು. ವಿಮಾನದ ಹಿಂಭಾಗದ ಬಳಿ ತೆರಳಿದ ಮಹಿಳೆ ಎಮರ್ಜೆನ್ಸಿ ಗೇಟ್ ತೆರೆದು ಹೊರಕ್ಕೆ ಹೋಗಿದ್ದಾರೆ.

MOSTREAD: ಇನ್ನು ಮುಂದೆ ಈ ಬಣ್ಣದ ಕಾರುಗಳ ನೋಂದಣಿ ಕಾನೂನುಬದ್ದ

ತಮ್ಮ ತಾಯಿ ವಿಮಾನದ ರೆಕ್ಕೆ ಮೇಲೆ ಕುಳಿತಿರುವುದನ್ನು ನೋಡಿದ ಅವರ ಮಕ್ಕಳು ಎಮರ್ಜೆನ್ಸಿ ಗೇಟ್ ಬಳಿ ಬಂದು ತಾಯಿಯನ್ನು ಕರೆದಿದ್ದಾರೆ. ಮಹಿಳೆ ಯಾವುದೇ ಡ್ರಗ್ಸ್ ಅಥವಾ ಮಾದಕವಸ್ತು ಸೇವಿಸಿರಲಿಲ್ಲ ಎಂದು ತನಿಖೆಯಿಂದ ತಿಳಿದುಬಂದಿದೆ.

ಈ ಮಹಿಳೆಯನ್ನು ಬ್ಲಾಕ್ ಲಿಸ್ಟ್ ಗೆ ಸೇರಿಸಲಾಗಿದೆ ಎಂದು ಉಕ್ರೇನ್‌ನ ವಿಮಾನಯಾನ ಸಂಸ್ಥೆ ತಿಳಿಸಿದೆ. ಇದರಿಂದಾಗಿ ಆ ಮಹಿಳೆಗೆ ಕೆಲವು ದಿನಗಳವರೆಗೆ ವಿಮಾನದಲ್ಲಿ ಪ್ರಯಾಣಿಸಲು ಸಾಧ್ಯವಾಗುವುದಿಲ್ಲ.