ವಿಶ್ವದ ಅತಿ ದೊಡ್ಡ ವಿಮಾನ 'ಏರ್ ಲ್ಯಾಂಡರ್' ಪತನ

ಬಲೂನ್ ಮಾದರಿಯ ಏರ್ ಲ್ಯಾಂಡರ್ ಹೈಬ್ರಿಡ್ ವಿಮಾನವು, ಹೀಲಿಯಂ ಬಳಕೆಯಿಂದ ಮೂರು ದಿನಗಳಷ್ಟು ಕಾಲ ಆಕಾಶದಲ್ಲೇ ಹಾರಾಡುವಷ್ಟು ಸಾಮರ್ಥ್ಯವನ್ನು ಹೊಂದಿದೆ.

ಇಂಗ್ಲೆಂಡ್ ನಲ್ಲಿ ಏರ್ ಲ್ಯಾಂಡರ್ ವಿಮಾನದ ಟೆಸ್ಟಿಂಗ್ ಪ್ರಕ್ರಿಯೆಯನ್ನು ಹಮ್ಮಿಕೊಳ್ಳಲಾಗಿತ್ತು. ಬಳಿಕ ಲ್ಯಾಂಡಿಂಗ್ ಮಾಡುವಾಗ ಎಡವಟ್ಟು ಸಂಭವಿಸಿತ್ತು ಎಂಬುದನ್ನು ಅಧಿಕೃತರು ಬಹಿರಂಗಪಡಿಸುತ್ತಾರೆ.

ವಿಮಾನದ ಮುಂಭಾಗಕ್ಕೆ ಸಣ್ಣ ಪುಟ್ಟ ಹಾನಿಯನ್ನು ಬಿಟ್ಟರೆ ಇತರೆ ಯಾವುದೇ ತೊಂದರೆಯಾಗಿಲ್ಲ. ಅಲ್ಲದೆ ಘಟನೆಯಲ್ಲಿ ಯಾರಿಗೂ ಗಾಯಗಳು ಸಂಭವಿಸಿಲ್ಲ ಎಂಬುದನ್ನು ಏರ್ ವೆಹಿಕಲ್ಸ್ ಸ್ಪಷ್ಟಪಡಿಸಿದೆ.

ಏರ್ ಲ್ಯಾಂಡರ್ ವಿಮಾನ ಟೆಲಿಗ್ರಾಫಿಕ್ ಕಂಬಕ್ಕೆ ಢಿಕ್ಕಿಯಾಗಿರುವುದ್ದರಿಂದ ಪತನಗೊಂಡಿತ್ತೆಂಬ ಶಂಕೆ ಮೂಡಿತ್ತು. ಆದರೆ ಈ ವದಂತಿಗಳನ್ನು ಹೈಬ್ರಿಡ್ ಏರ್ ವೆಹಿಕಲ್ಸ್ ನಿರಾಕರಿಸಿದೆ.

ಅಂದ ಹಾಗೆ ಏರ್ ಲ್ಯಾಂಡರ್ 10, ಅತ್ಯಂತ ಶಕ್ತಿಶಾಲಿ 4.0 ಲೀಟರ್ ಸೂಪರ್ ಚಾರ್ಜ್ಡ್ ಡೀಸೆಲ್ ಎಂಜಿನ್ ನಿಂದ ನಿಯಂತ್ರಿಸಲ್ಪಡುತ್ತಿದ್ದು, 1380 ಅಶ್ವಶಕ್ತಿಯನ್ನು ಉತ್ಪಾದಿಸಲಿದೆ.

ಏರ್ ಲ್ಯಾಂಡರ್ ಪ್ರಾಯೋಗಿಕ ಸಂಚಾರ ಪರೀಕ್ಷೆಗೆ ಯುರೋಪಿಯನ್ ಎವಿಯೇಷನ್ ಸೇಫ್ಟಿ ಏಜೆನ್ಸಿ ಹಾಗೂ ಬ್ರಿಟನ್ ಸಿವಿಲಿ ಎವಿವೇಷನ್ ಅಥಾರಟಿ ಗ್ರೀನ್ ಸಿಗ್ನಲನ್ನು ನೀಡಿತ್ತು. ಇದರ ನಿರ್ಮಾಣ ಹಾಗೂ ಅಭಿವೃದ್ಧಿಗಾಗಿ 200ಗಿಂತಲೂ ಹೆಚ್ಚು ಕೋಟಿ ರುಪಾಯಿಗಳನ್ನು ಖರ್ಚು ಮಾಡಲಾಗಿದೆ.

ಅರ್ಧದಷ್ಟು ವಿಮಾನ, ಅರ್ಧದಷ್ಟು ವಾಯು ನೌಕೆಯಂತಿರುವ ಏರ್ ಲ್ಯಾಂಡರ್ ಗೆ ಹೀಲಿಯಂ ಪಂಪ್ ಮಾಡಲಾಗುವುದು. ಅಲ್ಲದೆ ನೀರಿನ ಮೇಲೂ ಲ್ಯಾಂಡ್ ಮಾಡುವ ಸಾಮರ್ಥ್ಯ ಹೊಂದಿರುತ್ತದೆ.

302 ಅಡಿ ಉದ್ದದ ಏರ್ ಲ್ಯಾಂಡರ್ ವಿಮಾನವನ್ನು ಮೂಲತ: ಅಮೆರಿಕ ಸೈನಿಕರ ಯೋಜನೆಗಳಿಗಾಗಿ ಅಭಿವೃದ್ಧಿಗೊಳಿಸಲಾಗಿತ್ತು. ಆದರೆ ಕಾರಣಾಂತರಗಳಿಂದಾಗಿ 2012ರಲ್ಲಿ ಯೋಜನೆಯನ್ನು ಕೈಬಿಡಲಾಗಿತ್ತು.