ಯಮಹಾ ಸೂಪರ್ ಬೈಕ್ FZ1 8 ಲಕ್ಷಕ್ಕೆ

ಸಾಮಾನ್ಯವಾಗಿ ಸೂಪರ್ ಬೈಕುಗಳನ್ನು 500ಸಿಸಿ+ ಇಂಜಿನ್ ಸಾಮರ್ಥ್ಯದ ಆಧಾರದ ಮೇಲೆ ವರ್ಗೀಕರಿಸಲಾಗುತ್ತದೆ. ಹೋಂಡಾ, ಯಮಹಾ, ಕವಾಸಕಿ ಅಲ್ಲದೆ ಡುಕಾಟಿ, ಹಯಬುಸಾ ಹಾಗೂ ಬಿಎಂಡಬ್ಲ್ಯೂ ಎಲ್ಲವೂ ಭಾರತದ ಮಾರುಕಟ್ಟೆಯಲ್ಲಿ ಪರಿಚಿತ ಹೆಸರಾಗಿಬಿಟ್ಟಿವೆ. ಹೊಸತನ ಮೈಗೂಡಿಸಿಕೊಂಡಿರುವ ಯಮಹಾ ಹೆಚ್ಚಿನ ಇಂಜಿನ್ ಸಾಮರ್ಥ್ಯವುಳ್ಳ FZ1 ಅನ್ನು ಪರಿಚಯಿಸುವ ಮೂಲಕ ಹೆಚ್ಚಿನ ಪವರ್ ಬಯಸುವ ಯುವ ಪೀಳಿಗೆಗೆ ಕಿಚ್ಚು ಹಚ್ಚುತ್ತಿದೆ.

ಆಮದು ಮಾಡಿಕೊಂಡ ಬೈಕುಗಳ ಪೈಕಿ FZ1 ಬೆಲೆ ಹೋಂಡಾ CB1000R ಗಿಂತ ಕಮ್ಮಿಯಿದ್ದು, ಅತಿ ಕಮ್ಮಿ ಬೆಲೆಯ ಸೂಪರ್ ಬೈಕ್ ಎನಿಸಲಿದೆ. ಭಾರತದ ಮಾರುಕಟ್ಟೆಯಲ್ಲಿ ಸುಮಾರು 80 ರಿಂದ 100 ಸೂಪರ್ ಬೈಕುಗಳನ್ನು ಮಾರಾಟ ಮಾಡುವ ದಾಖಲೆಯನ್ನು ಯಮಹಾ ಹೊಂದಿದೆ. ಬೈಕುಗಳ ಬೆಲೆ ಕೂಡಾ ಇತರೆ ಕಂಪೆನಿ ಬೈಕುಗಳಿಗೆ ಹೋಲಿಸಿದರೆ ತುಸು ಕಮ್ಮಿ ಎನ್ನಬಹುದು. 14 ರಿಂದ 24 ಲಕ್ಷ ರು ತನಕ ಬೆಲೆಯಿದೆ.

ಈ ರೀತಿಯ ಬೈಕು ಹತ್ತಲು ಬಯಸುವವರು ಬೆಲೆಗಿಂತ, ವಿನ್ಯಾಸ ಹಾಗೂ ಸಾಮರ್ಥ್ಯದ ಮೇಲೆ ಹೆಚ್ಚಿನ ಗಮನಹರಿಸುತ್ತಾರೆ. ಸೂಪರ್ ಬೈಕು ಭಾರತದಲ್ಲಿ ಸ್ಪರ್ಧಾತ್ಮಕವಾಗಿ ಅಥವಾ ಕ್ರೀಡೆಗಾಗಿ ಅಲ್ಲದಿದ್ದರೂ ಕ್ರೇಜ್ ಗಾಗಿ ಖರೀದಿಸುವ ಯುವಕರ ದೊಡ್ಡ ಪಡೆಯೇ ಹುಟ್ಟಿಕೊಂಡಿದೆ ಎಂಬುದನ್ನು ಯಮಹಾ ಕಂಪೆನಿ ಗಮನಿಸಿದೆ.

ಹೊಸ ಉತ್ಪನ್ನದ ಬಗ್ಗೆ ಜಾಹೀರಾತು ನೀಡುವಾಗ ಈ ಅಂಶಗಳನ್ನು ಅಳವಡಿಸಿಕೊಳ್ಳುವುದನ್ನು ಯಮಹಾ ಮರೆತಿಲ್ಲ. ಉತ್ತರ ಪ್ರದೇಶ ಹಾಗೂ ಹರ್ಯಾಣದಲ್ಲಿರುವ ತನ್ನ ಘಟಕದಲ್ಲಿ ತಿಂಗಳಿಗೆ 10, 000 ಆರ್ಡರ್ ಗಳ ಬೇಡಿಕೆಯಿದೆ. ವಾರ್ಷಿಕವಾಗಿ 3.5 ಲಕ್ಷ ವಾಹನಗಳನ್ನು ಹೊರಬಿಡುತ್ತಿದ್ದು, ಈ ಸಂಖ್ಯೆಯನ್ನು 8 ಲಕ್ಷಕ್ಕೆ ಏರಿಸುವ ಗುರಿಯನ್ನು ಯಮಹಾ ಮೋಟರ್ಸ್ ಹೊಂದಿದೆ.