ಬಾ ಮಳೆಯೇ ಬಾ.. ನನ್ನ ಬೈಕಿಗೆ ಕವರ್ ಇದೆ!

ಚಿತ್ರಲೋಕ

ಈ ಮುಂಗಾರು ಮಳೆಗೆ ಅಚ್ಚುಮೆಚ್ಚಿನ ಬೈಕನ್ನು ಹೇಗೆ ಕಾಪಾಡಿಕೊಳ್ಳುವುದೆಂದು ನೀವು ತಲೆಕೆಡಿಸಿಕೊಂಡಿದ್ದರೆ ಇಲ್ಲೊಂದು ಬೈಕ್ ಕವರ್ ಇದೆ. ಇದನ್ನು ಆಸ್ಟ್ರೀಯದ ಬೈಕ್ ತಯಾರಿಕಾ ಕಂಪನಿ ಕೆಟಿಎಂ ಪರಿಚಯಿಸಿದೆ. ನೂತನ ಔಟ್ ಡೋರ್ ಬೈಕ್ ಕವರ್ ಕಂಪನಿಯ ಎಲ್ಲಾ ಶೋರೂಂಗಳಲ್ಲೂ ದೊರಕುತ್ತದೆಯಂತೆ.

ಆರೆಂಜ್ ಬಣ್ಣದ ಈ ಬೈಕ್ ಕವರ್ ಕೆಟಿಎಂ ಲೊಗೊ ಹೊಂದಿದೆ. ಕಂಪನಿಯು ಇದನ್ನು ಬಜಾಜ್ ಕೆಟಿಎಂ ಡ್ಯೂಕ್ ಬೈಕಿಗಾಗಿ ತಯಾರಿಸಿದೆ. ಹಾಗಂತ ಉಳಿದ ಬೈಕುಗಳಿಗೆ ಬಳಸಲಾಗದು ಎಂದುಕೊಳ್ಳಬೇಡಿ. ನಿಮ್ಮಲ್ಲಿರುವ ಯಾವುದೇ ಬೈಕಿಗೂ ಈ ಕವರ್ ಬಳಸಬಹುದು.

ಇದು ಬರೀ ಮಳೆಗಾಲಕ್ಕೆ ಮಾತ್ರನಾ ಎಂದು ಮೂಗು ಮುರಿಯಬೇಡಿ. ವರ್ಷದ ಹನ್ನೆರಡು ತಿಂಗಳೂ ಬಳಸಬಹುದು. ಮರದಡಿ ನಿಲ್ಲಿಸಿದರೆ ಹಕ್ಕಿಹಿಕ್ಕೆಯಿಂದಲೂ ಇದು ನಿಮ್ಮ ಬೈಕನ್ನು ಪಾರು ಮಾಡುತ್ತದೆ. ಬೈಕಿನೊಳಗೆ ಯಾವುದೇ ಧೂಳು, ಕಸ ಹೋಗದಂತೆ ರಕ್ಷಿಸುತ್ತದೆ.

ಕೆಟಿಎಂ ಬೈಕ್ ಕವರನ್ನು ಮಡುಚಿಡಲು ಸಣ್ಣ ಬ್ಯಾಗ್ ಸಾಕು. ಎಲ್ಲಿ ಹೋದರೂ ತೆಗೆದುಕೊಂಡು ಹೋಗಲು ಇದರ ಸಣ್ಣ ಗಾತ್ರ ನೆರವಾಗುತ್ತದೆ. ಕೆಟಿಎಂ ಬೈಕ್ ಹೆಸರು ಕೇಳಿ ಈ ಕವರ್ ದರವೂ ದುಬಾರಿಯಾಗಿರಬಹುದು ಎಂದು ಭಾವಿಸಬೇಡಿ. ಸುಮಾರು 720 ರುಪಾಯಿಗೆ ಈ ಕವರ್ ದೊರಕುತ್ತದೆ. ನಿಮ್ಮ ಬೈಕಿಗೆ ಈ ಕವರ್ ಹಾಕಿದ್ಮೇಲೆ ಬಾ... ಮಳೆಯೇ ಬಾ... ಎಂದು ಹಾಡು ಆರಂಭಿಸಿ.