ಮಹೀಂದ್ರ ಮೊಜೊ ಪವರ್‌ಫುಲ್ ಬೈಕ್ ಬಿಡುಗಡೆಗೆ ರೆಡಿ

ಭಾರತೀಯ ಮೂಲದ ವಾಹನ ತಯಾರಕ ಸಂಸ್ಥೆಯಾಗಿರುವ ಮಹೀಂದ್ರ ಟು ವೀಲರ್ಸ್, ಹೆಚ್ಚು ಎಂಜಿನ್ ಸಾಮರ್ಥ್ಯದ ಮೊಜೊ ಬೈಕ್ ಬಿಡುಗಡೆ ಮಾಡಲು ಸಜ್ಜಾಗಿದೆ. 2014 ದೆಹಲಿ ಆಟೋ ಎಕ್ಸ್ ಪೋದಲ್ಲಿ ಪ್ರದರ್ಶನ ಕಂಡಿದ್ದ ಮೊಜೊ ಹಲವಾರು ವೈಶಿಷ್ಟ್ಯಗಳನ್ನು ಪಡೆದುಕೊಳ್ಳಲಿದೆ.

ಮಹೀಂದ್ರ ಟು ವೀಲರ್ ವಿಭಾಗದಿಂದ ಯಶಸ್ವಿ ಪರೀಕ್ಷೆಯನ್ನು ಪೂರ್ಣಗೊಳಿಸಿರುವ ಮೊಜೊ ಮುಂಬರುವ ಹಬ್ಬದ ಆವೃತ್ತಿ ವೇಳೆ ಬಿಡುಗಡೆಯಾಗಲಿದೆ. ಇದು ಬೈಕ್ ಪ್ರೇಮಿಗಳಲ್ಲಿ ಇನ್ನಷ್ಟು ಕುತೂಹಲ ಮನೆ ಮಾಡಿದೆ.

ಅಪ್‌ಸೈಡ್ ಡೌನ್ ಫ್ರಂಟ್ ಫಾರ್ಕ್ ಮತ್ತು ರಿಯರ್ ಸ್ಪೋರ್ಟ್ ಮೊನೊಶಾಕ್ ಸಸ್ಪಷನ್ ಪ್ರಮುಖವಾಗಿರಲಿದೆ. ಅಂತೆಯೇ 17 ಇಂಚಿನ ಅಲಾಯ್ ವೀಲ್‌ನಲ್ಲಿ ಪೈರೆಲಿ ಸ್ಪೋರ್ಟ್ ಡೈಮನ್ ರಬ್ಬರ್ ಪಡೆದುಕೊಳ್ಳಲಿದೆ. ಇನ್ನುಳಿದಂತೆ ಡ್ಯುಯಲ್ ಎಕ್ಸಾಸ್ಟ್ ಸಿಸ್ಟಂ ಇರಲಿದೆ.

ಇಲ್ಲಿ ಗಮನಾರ್ಹ ಸಂಗತಿಯೆಂದರೆ ಸೆಂಚುರೊ ಪ್ರಯಾಣಿಕ ಬೈಕ್‌ನಲ್ಲಿರುವಂತೆಯೇ ಎಂಜಿನ್ ಕೆಳಗಡೆ ಲಂಬವಾಗಿ ಎರಡು ಪೈಪ್‌ಗಳನ್ನು ಲಗತ್ತಿಸಲಾಗಿದೆ. ಇದು ಮಹೀಂದ್ರ ಬೈಕ್‌ಗಳನ್ನು ವಿಶೇಷವಾಗಿ ಗುರುತಿಸಲು ನೆರವಾಗಲಿದೆ.

ಹೆಚ್ಚು ಪವರ್‌ಫುಲ್ ಬೈಕ್‌ ಸಾಲಿನಲ್ಲಿ ಹೋಂಡಾ ಸಿಬಿಆರ್250ಆರ್, ಬಜಾಜ್ ಪಲ್ಸರ್ 200ಎನ್‌ಎಸ್, ಕೆಟಿಎಂ ಡ್ಯೂಕ್ 200 ಮತ್ತು ಇನ್ನಷ್ಟೇ ಲಾಂಚ್ ಆಗಲಿರುವ ಯಮಹಾ ಆರ್25 ಸವಾಲನ್ನು ಮಹೀಂದ್ರ ಹೇಗೆ ಎದುರಿಸಲಿದೆ ಎಂಬುದಕ್ಕೆ ಮುಂದಿನ ಕೆಲವೇ ದಿನಗಳಲ್ಲಿ ಉತ್ತರ ಲಭ್ಯವಾಗಲಿದೆ.

ಮಹೀಂದ್ರ ಮೊಜೊ ಸ್ಥಳೀಯವಾಗಿ ಅಭಿವೃದ್ಧಿ ಹಾಗೂ ನಿರ್ಮಾಣ ಕಾರ್ಯ ನಡೆಯುತ್ತಿದೆ. ಇದು ಸ್ಮರ್ಧಾತ್ಮಕ ದರಗಳಲ್ಲಿ ಬಿಡುಗಡೆ ಮಾಡಲು ನೆರವಾಗಲಿದೆ. ಇದರ ಎಕ್ಸ್ ಶೋ ರೂಂ ದರ 1.50 ಲಕ್ಷ ರು.ಗಳಾಗುವ ಸಾಧ್ಯತೆಯಿದೆ.