ಬಜಾಜ್ ಡಿಸ್ಕವರ್ 150 ಮಾರಾಟಕ್ಕೂ ಬೀಳಲಿದೆ ಬ್ರೇಕ್?

ಬಲ್ಲ ಮೂಲಗಳ ಪ್ರಕಾರ ಕಳಪೆ ಮಾರಾಟದಲ್ಲಿರುವ ಬಜಾಜ್ ಡಿಸ್ಕವರ್ 150ಎಫ್ ಮತ್ತು ಡಿಸ್ಕವರ್ 150ಎಸ್ ಮಾದರಿಗಳನ್ನು ಮಾರಾಟದಿಂದ ಹಿಂದಕ್ಕೆ ಪಡೆಯುವ ಸಾಧ್ಯತೆಗಳಿವೆ.

2014ನೇ ಸಾಲಿನಲ್ಲಿ ಬಿಡುಗಡೆಯಾದ ಬಜಾಜ್ ನ ಎರಡು ಜನಪ್ರಿಯ ಬೈಕ್ ಗಳಲ್ಲಿ ಡಿಸ್ಕವರ್ 150 ಸಿಸಿ ಮಾದರಿಗಳು ಸೇರಿಕೊಂಡಿದ್ದವು. ಆದರೆ ಬೈಕ್ ಖರೀದಿಗಾರರ ನಿರೀಕ್ಷೆಗಳು ಹೆಚ್ಚಿದಾಗ ಅದನ್ನು ನೆರವೇರಿಸಿಕೊಳ್ಳುವಲ್ಲಿ ವಿಫಲವಾಗಿದೆ.

ಹಂತ ಹಂತವಾಗಿ ಬಜಾಜ್ ಡಿಸ್ಕವರ್ ಬೈಕ್ ಗಳು ಅವನತಿಯನ್ನು ಕಾಣುತ್ತಿದೆ. ಕಳೆದ ವರ್ಷ ಅಕ್ಟೋಬರ್ ತಿಂಗಳಲ್ಲಿ 1272 ಯನಿಟ್ ಗಳಿಷ್ಟಿದ್ದ ಡಿಸ್ಕವರ್ 150 ಶ್ರೇಣಿಯ ಬೈಕ್ ಗಳ ಮಾರಾಟವೀಗ ಶೂನ್ಯಕ್ಕೆ ಬಂದು ತಲುಪಿದೆ.

ಡಿಸ್ಕವರ್ ಶ್ರೇಣಿಯ ಬೈಕ್ ಗಳನ್ನೇ ಬಜಾಜ್ ಹಿಂಪಡೆಯುವುದರ ಬಗ್ಗೆಯೂ ಮಾಹಿತಿಗಳಿವೆ. ಆದರೆ ಸದ್ಯಕ್ಕೆ 150 ಸಿಸಿ ಮಾತ್ರ ಮಾರಾಟ ನಿಲುಗಡೆಗೊಳಿಸುವ ಸಾಧ್ಯತೆಗಳಿವೆ.

144.8 ಸಿಸಿ ಸಿಂಗಲ್ ಸಿಲಿಂಡರ್ 4 ವಾಲ್ವ್ ಡಿಟಿಎಸ್-ಐ ಜೊತೆಗೆ ಎಕ್ಸಾಸ್ಟ್ ಟೆಕ್ ಎಂಜಿನ್ ನಿಂದ ನಿಯಂತ್ರಿಸಲ್ಪಡುವ ಬಜಾಜ್ ಡಿಸ್ಕವರ್ 150 ಬೈಕ್ 12.75 ಎನ್ ಎಂ ತಿರುಗುಬಲದಲ್ಲಿ 14.5 ಅಶ್ವಶಕ್ತಿಯನ್ನು ಉತ್ಪಾದಿಸುತ್ತದೆ. ಹಾಗೆಯೇ ಐದು ಸ್ಪೀಡ್ ಗೇರ್ ಬಾಕ್ಸ್ ಇದರಲ್ಲಿದೆ.

ಐದು ಸ್ಪೀಡ್ ಗೇರ್ ಬಾಕ್ಸ್ ನೊಂದಿಗಿರುವ ಬಜಾಜ್ ಡಿಸ್ಕವರ್ 150 ಸಿಸಿ ಬೈಕ್ ಗಂಟೆಗೆ ಗರಿಷ್ಠ 110 ಕೀ.ಮೀ. ವೇಗದಲ್ಲಿ ಸಂಚರಿಸಬಲ್ಲದ್ದು.

ಡಿಸ್ಕವರ್ ಶ್ರೇಣಿಯ ಬೈಕ್ ಗಳು ದೇಶದಲ್ಲಿ ದೆಹಲಿ ಎಕ್ಸ್ ಶೋ ರೂಂ ಬೆಲೆಯ ಪ್ರಕಾರ 54,000 ರು.ಗಳಿಂದ 58,000 ರು.ಗಳ ವರೆಗೆ ದುಬಾರಿಯೆನಿಸುತ್ತದೆ.