ಬೆಂಗಳೂರಿಗೆ ಲಗ್ಗೆಯಿಟ್ಟ ಐಕಾನಿಕ್ ಎಂವಿ ಆಗಸ್ಟಾ ಸೂಪರ್ ಬೈಕ್!

ದಕ್ಷಿಣ ಭಾರತದಲ್ಲಿ ತೆರೆದುಕೊಂಡಿರುವ ಮೊದಲ ಡೀಲರ್ ಶಿಪ್ ಇದಾಗಿದೆ. ಪುಣೆ ಮತ್ತ ಅಹಮದಾಬಾದ್ ಬಳಿಕವೀಗ ಬೆಂಗಳೂರಿನಲ್ಲಿ ಮೂರನೇ ಶೋ ರೂಂ 'ಮೊಟೊರಾಯಲ್' ತೆರೆದುಕೊಂಡಿದೆ.

ಈ ಸಂದರ್ಭದಲ್ಲಿ ಇದೇ ಮೊದಲ ಬಾರಿಗೆ ಎಂವಿ ಆಗಸ್ಟಾದ ಅತಿ ದುಬಾರಿ ಎಫ್3 800 ಆರ್ ಸಿ ಎಎಂಟಿ ಕ್ರೀಡಾ ಬೈಕನ್ನು ಪ್ರದರ್ಶಿಸಲಾಯಿತು.

ಸೀಮಿತ ಆವೃತ್ತಿಯ ಎಫ್3 800 ಆರ್ ಸಿ ರಸ್ತೆ ಮಾನ್ಯತೆ ಪಡೆದ ಬೈಕ್ ಪುಣೆ ಎಕ್ಸ್ ಶೋ ರೂಂ ಬೆಲೆಯ ಪ್ರಕಾರ 19.73 ಲಕ್ಷ ರು.ಗಳಷ್ಟು ದುಬಾರಿಯೆನಿಸುತ್ತದೆ.

ಇದು ಸೂಪರ್ ಸ್ಪೋರ್ಟ್ ವರ್ಲ್ಡ್ ಚಾಂಪಿಯನ್ ಶಿಪ್ ನಲ್ಲಿ ಭಾಗವಹಿಸುತ್ತಿರುವ ರಿಪಾರ್ಟೊ ಕೋರ್ಸ್ ತಂಡ ಎಫ್800 ರೇಸ್ ಬೈಕ್ ನ ಸ್ಟ್ರೀಟ್ ಆವೃತ್ತಿಯಾಗಿದೆ.

ಕೇವಲ ಸೀಮಿತ ಒಂಬತ್ತು ಯುನಿಟ್ ಗಳಷ್ಟು ಮಾತ್ರ ಎಫ್ 800 ಆರ್ ಸಿ ಬೈಕ್ ಗಳು ದೇಶವನ್ನು ಪ್ರವೇಶಿಸುತ್ತಿದೆ.

798 ಸಿಸಿ ತ್ರಿ ಸಿಲಿಂಡರ್ ಎಂಜಿನ್ ನಿಂದ ನಿಯಂತ್ರಿಸಲ್ಪಡುವ ಎಫ್ 800 ಆರ್ ಸಿ ಎಎಂಜಿ, 88 ಎನ್ ಎಂ ತಿರುಗುಬಲದಲ್ಲಿ 148 ಅಶ್ವಶಕ್ತಿಯನ್ನು ಉತ್ಪಾದಿಸಲಿದೆ. ಹಾಗೆಯೇ ಆರು ಸ್ಪೀಡ್ ಗೇರ್ ಬಾಕ್ಸ್ ಇದರಲ್ಲಿರುತ್ತದೆ.

ವೇಗದಲ್ಲೂ ಯಾವುದೇ ರಾಜಿಗೂ ತಯಾರಿಲ್ಲದ ಎಂವಿ ಆಗಸ್ಟಾ 800 ಆರ್ ಸಿ ಎಎಂಜಿ ಬೈಕ್ ಪ್ರತಿ ಗಂಟೆಗೆ 269 ಕೀ.ಮೀ. ವೇಗದಲ್ಲಿ ಸಂಚರಿಸಲಿದೆ.

ಸ್ಟೀಲ್ ಟ್ಯೂಬುಲರ್ ಟ್ರೆಲ್ಲಿಸ್ ಫ್ರೇಮ್, ಸಿಂಗಲ್ ಸೈಡಡ್ ಅಲ್ಯೂಮಿನಿಯಂ ಸ್ವಿಂಗರ್ಮ್, ಮುಂಭಾಗದಲ್ಲಿ ಮಾರ್ಜೊಝಿ ಯುಎಸ್ ಡಿ ಫಾರ್ಕ್ ಮತ್ತು ಹಿಂಭಾಗದಲ್ಲಿ ಸಚ್ಚ್ ಮೊನೊಶಾಕ್ ಇರಲಿದೆ.

ಅಂತೆಯೇ ಮುಂಭಾಗದಲ್ಲಿ ಬ್ರೆಂಬೊ ಫೋರ್ ಪಿಸ್ತಾನ್ ಕ್ಯಾಲಿಪರ್ ಜೊತೆಗೆ 320 ಎಂಎಂ ಡಿಸ್ಕ್ ಬ್ರೇಕ್ ಮತ್ತು ಹಿಂದುಗಡೆ ಟು ಪಿಸ್ತಾನ್ ಬ್ರೇಕ್ ಕ್ಯಾಲಿಪರ್ ಜೊತೆಗೆ 220 ಎಂಎಂ ಡಿಸ್ಕ್ ಬ್ರೇಕ್ ಸೌಲಭ್ಯವಿರಲಿದೆ. ಇವೆಲ್ಲದರ ಜೊತೆಗೆ ನಿಖರ ಬ್ರೇಕಿಂಗ್ ಗಾಗಿ ಎಬಿಎಸ್ ಸಹ ಜೋಡಿಸಲಾಗಿದೆ.

ಎಂಟು ವಿಧಗಳ ಟ್ರಾಕ್ಷನ್ ಕಂಟ್ರೋಲ್ ಮತ್ತು ರಿಯರ್ ವೀಲ್ ಲಿಫ್ಟ್ ಅಪ್ ಮಿಟಿಗೇಷನ್ ಈ ರೇಸ್ ಬೈಕ್ ನ ಇತರ ಪ್ರಮುಖ ವೈಶಿಷ್ಟ್ಯಗಳಾಗಿವೆ.