Honda Shine: ಅಬ್ಬಬ್ಬಾ... ಏನ್ ಬೇಡಿಕೆ! ಹೋಂಡಾ ಶೈನ್ ಹೊಸ ದಾಖಲೆ, 30 ಲಕ್ಷ ಬೈಕ್‌ಗಳ ಮಾರಾಟ

ಭಾರತದಲ್ಲಿ ಒಂದು ಬೈಕ್ ಖರೀದಿಸುವ ಮುನ್ನ ಮಧ್ಯಮ ವರ್ಗದ ಜನರು ಅದರ ಬೆಲೆ, ಮೈಲೇಜ್, ಡಿಸೈನ್ ನೋಡುತ್ತಾರೆ. ಇಂತಹ ಗ್ರಾಹಕರಿಗಾಗಿಯೇ ಭಾರತದಲ್ಲಿನ ಹಲವು ಮೋಟಾರ್‌ಸೈಕಲ್‌ಗಳನ್ನು ಕಂಪನಿಗಳು ಪರಿಚಯಿಸಿವೆ. ಆದ್ರೆ ಈ ವಿಷಯದಲ್ಲಿ ಉತ್ತುಂಗವನ್ನು ಸಾಧಿಸಿರುವುದು ಹೋಂಡಾ ಶೈನ್ (Honda Shine). ಅದರ ಡಿಸೈನ್, ಮೈಲೇಜ್, ಕೈಗೆಟುಕುವ ಬೆಲೆಯಿಂದ ಜನಪ್ರಿಯತೆ ಪಡೆದಿದೆ.

ಭಾರತದಲ್ಲಿ Honda Shine ಬೈಕ್‌ಗಿಂತ ಉತ್ತಮ ಮೈಲೇಜ್ ನೀಡುವ ಬೈಕ್‌ಗಳು ಇವೆಯಾದ್ರೂ 125cc ಮೋಟಾರ್‌ಸೈಕಲ್ ವಿಭಾಗದಲ್ಲಿ ಸ್ಟೈಲಿಷ್ ಡಿಸೈನ್ ಜೊತೆಗೆ ಉತ್ತಮ ಪರ್ಫಾನ್ಸ್ ಹಾಗೂ ಮೈಲೇಜ್ ವಿಷಯದಲ್ಲಿ ಇನ್ಯಾವುದೇ ಬೈಕ್, ಶೈನ್ ಮುಂದೆ ನಿಲ್ಲುವುದಿಲ್ಲ. ಇದಕ್ಕೆ ಉತ್ತಮ ಉದಾಹರಣೆಯೆಂಬಂತೆ ಇಲ್ಲಿಯವರೆಗೆ ಹೋಂಡಾ ಶೈನ್ ಬರೋಬ್ಬರಿ 30 ಲಕ್ಷ ಬೈಕ್‌ಗಳು ಮಾರಾಟವಾಗಿವೆ.

ಹೋಂಡಾ ಶೈನ್ ಪ್ರಸ್ತುತ ದೇಶದಲ್ಲಿ ಹೆಚ್ಚು ಮಾರಾಟವಾಗುವ 125cc ಮೋಟಾರ್‌ಸೈಕಲ್ ಎಂದು ಖ್ಯಾತಿ ಪಡೆದಿದೆ. ಹೋಂಡಾ ಮೋಟಾರ್‌ಸೈಕಲ್ ಮತ್ತು ಸ್ಕೂಟರ್ ಇಂಡಿಯಾ (HMSI) ಭಾರತದಲ್ಲಿ 3 ಮಿಲಿಯನ್‌ಗಿಂತಲೂ ಹೆಚ್ಚು ಶೈನ್ ಮೋಟಾರ್‌ಸೈಕಲ್‌ಗಳನ್ನು ಮಾರಾಟ ಮಾಡಲಾಗಿದೆ ಎಂದು ಘೋಷಿಸಿದೆ. ಆದರೆ, ಈ ಸಾಧನೆ ರಾತ್ರೋರಾತ್ರಿ ಮಾಡಿದ್ದಲ್ಲ. ವಾಸ್ತವವಾಗಿ, ಈ ಗಮನಾರ್ಹ ಸಾಧನೆಯನ್ನು ಸಾಧಿಸಲು 17.5 ವರ್ಷಗಳಿಗಿಂತ ಹೆಚ್ಚು ಸಮಯ ತೆಗೆದುಕೊಂಡಿದೆ.

ಹೋಂಡಾ ಮೊದಲ ಬಾರಿಗೆ ಹೋಂಡಾ ಶೈನ್ ಮೋಟಾರ್‌ಸೈಕಲ್ ಅನ್ನು ಭಾರತದಲ್ಲಿ ಬಿಡುಗಡೆ ಮಾಡಿದಾಗ, 125 ಸಿಸಿ ಮೋಟಾರ್‌ಸೈಕಲ್ ವಿಭಾಗವು ಬಜಾಜ್ ಡಿಸ್ಕವರ್, ಹೀರೋ ಹೋಂಡಾ ಗ್ಲಾಮರ್, ಹೀರೋ ಹೋಂಡಾ ಸೂಪರ್ ಸ್ಪ್ಲೆಂಡರ್, ಯಮಹಾ ಗ್ಲಾಡಿಯೇಟರ್ ಮತ್ತು ಇನ್ನೂ ಕೆಲವು ಮೋಟಾರ್‌ಸೈಕಲ್‌ಗಳೊಂದಿಗೆ ಸಾಕಷ್ಟು ಪೈಪೋಟಿ ತುಂಬಿತ್ತು. ಈ ಎಲ್ಲಾ ವಾಹನಗಳನ್ನು ದಾಟಿ ಪ್ರಥಮ ಸ್ಥಾನಕ್ಕೇರುವುದು ದೊಡ್ಡ ಸವಾಲಾಗಿತ್ತು.

ಆದರೂ, ಹೋಂಡಾ ಶೈನ್ ಮಾರಾಟದ ಅಂಕಿಅಂಶಗಳು ವರ್ಷಗಳಲ್ಲಿ ಕ್ರಮೇಣ ಹೆಚ್ಚಾಗಲು ಪ್ರಾರಂಭಿಸಿ ಹೊಸ ಗ್ರಾಹಕರಿಗೆ ಸರಿಹೊಂದುವಂತೆ ನಿಯತಕಾಲಿಕವಾಗಿ ಶೈನ್ ಅನ್ನು ನವೀಕರಿಸಲಾಗಿದೆ. ಅನೇಕ ಹೋಂಡಾ ಶೈನ್ ಗ್ರಾಹಕರು ಹೋಂಡಾ ಶೈನ್ ಮೋಟಾರ್‌ಸೈಕಲ್ ನೀಡುವ ಗುಣಮಟ್ಟ ಮತ್ತು ವಿಶ್ವಾಸಾರ್ಹತೆಯಿಂದ ಪ್ರಭಾವಿತರಾದರು. ವರ್ಷಗಳು ಕಳೆದಂತೆ ಶೈನ್ ಮೋಟಾರ್‌ಸೈಕಲ್‌ಗಳ ಮಾರಾಟ ಮತ್ತಷ್ಟು ಹೆಚ್ಚಾಯಿತು.

11 ವರ್ಷಗಳಲ್ಲಿ, ಹೋಂಡಾ ಭಾರತದಲ್ಲಿ 15 ಲಕ್ಷ ಯೂನಿಟ್ ಹೋಂಡಾ ಶೈನ್ ಮೋಟಾರ್‌ಸೈಕಲ್‌ಗಳನ್ನು ಮಾರಾಟ ಮಾಡಿದೆ. ಉಳಿದ 6.5 ವರ್ಷಗಳಲ್ಲಿ, ಹೋಂಡಾ ಅದೇ ಮಾರಾಟದ ಅಂಕಿಅಂಶಗಳನ್ನು ಮುಂದುವರೆಸಿದ್ದು ಒಟ್ಟಾರೆ ಈಗ 17.5 ವರ್ಷಗಳಲ್ಲಿ ಒಟ್ಟು 3 ಮಿಲಿಯನ್ (ಮೂವತ್ತು ಲಕ್ಷ) ಯುನಿಟ್ ಬೈಕ್‌ಗಳು ಮಾರಾಟವಾಗಿವೆ.

ಹೋಂಡಾ ಶೈನ್ ಬಗ್ಗೆ ಹೇಳುವುದಾದರೆ, ಮೋಟಾರ್‌ಸೈಕಲ್ 124 ಸಿಸಿ, ಸಿಂಗಲ್ ಸಿಲಿಂಡರ್, ಏರ್ ಕೂಲ್ಡ್ ಎಂಜಿನ್ ಹೊಂದಿದೆ. ಈ ಎಂಜಿನ್ ಮೊದಲು ಮೂಲತಃ 4-ಸ್ಪೀಡ್ ಗೇರ್‌ಬಾಕ್ಸ್‌ನೊಂದಿಗೆ ಬಂದಿತು. ಉತ್ತಮ ದಕ್ಷತೆಗಾಗಿ ಇದನ್ನು ನಂತರ 5-ಸ್ಪೀಡ್ ಘಟಕಕ್ಕೆ ನವೀಕರಿಸಲಾಯಿತು. ಆ ಬಳಿಕ ಬೇಡಿಕೆ ಇನ್ನೂ ಹೇಚ್ಚಾಯಿತು.

ಪ್ರಸ್ತುತ, ಹೋಂಡಾ ಈ ಹಬ್ಬದ ಸೀಸನ್‌ನಲ್ಲಿ ಹೆಚ್ಚಿನ ಗ್ರಾಹಕರನ್ನು ಆಕರ್ಷಿಸಲು ಮತ್ತು ಅದರ ಒಟ್ಟಾರೆ ಮಾರಾಟದ ಅಂಕಿಅಂಶಗಳನ್ನು ಹೆಚ್ಚಿಸಲು ಹೋಂಡಾ SP125 ಮೋಟಾರ್‌ಸೈಕಲ್‌ನ ಸ್ಪೋರ್ಟ್ಸ್ ಆವೃತ್ತಿಯನ್ನು ಭಾರತದಲ್ಲಿ ಬಿಡುಗಡೆ ಮಾಡಿದೆ. ಹೆಚ್ಚಿನ ವಿಶೇಷ ಆವೃತ್ತಿಯ ಮೋಟಾರ್‌ಸೈಕಲ್‌ಗಳಂತೆ, ಹೋಂಡಾ SP125 ಸ್ಪೋರ್ಟ್ಸ್ ಆವೃತ್ತಿಯು ಪ್ರಮಾಣಿತ ಮಾದರಿಯ ಮೇಲೆ ಕೆಲ ಡಿಸೈನ್ ಬದಲಾವಣೆಗಳನ್ನು ಹೊಂದಿದೆ.

ಹೋಂಡಾ ಶೈನ್ SP125 ಸ್ಪೋರ್ಟ್ಸ್ ಆವೃತ್ತಿಯಲ್ಲಿನ ಕೆಲವು ಗಮನಾರ್ಹ ಬದಲಾವಣೆಗಳು ಪ್ರಮಾಣಿತ ಮಾದರಿಯಲ್ಲಿ ಮ್ಯಾಟ್ ಮಫ್ಲರ್ ಕವರ್ ಮತ್ತು ನವೀಕರಿಸಿದ ಗ್ರಾಫಿಕ್ಸ್ ಅನ್ನು ಒಳಗೊಂಡಿವೆ. ಈ ಮಾದರಿಯು ಎರಡು ಬಣ್ಣಗಳಲ್ಲಿ ಲಭ್ಯವಿದೆ. ಡಿಸೆಂಟ್ ಬ್ಲೂ ಮೆಟಾಲಿಕ್ ಮತ್ತು ಹೆವಿ ಗ್ರೇ ಮೆಟಾಲಿಕ್ ಬಣ್ಣಗಳೊಂದಿಗೆ ಈಗ ಮಾರುಕಟ್ಟೆಯಲ್ಲಿ ಉತ್ತಮ ಮಾರಾಟ ಗಳಿಸುತ್ತಿದೆ.