Top 5 bikes: ಇವು ಭಾರತಕ್ಕೆ ಮರಳಿ ಎಂಟ್ರಿ ಕೊಟ್ರೆ ಇವುಗಳ ಅಬ್ಬರಕ್ಕೆ ಮಿತಿಯಿಲ್ಲ!

ಭಾರತದಲ್ಲಿ ಸಿನಿಮಾ, ಕ್ರೀಡಾಭಿಮಾನಿಗಳಂತೆಯೇ ಆಟೋ ಅಭಿಮಾನಿಗಳು ಕೂಡ ಇದ್ದಾರೆ. ಅದರಲ್ಲೂ ದ್ವಿಚಕ್ರ ವಾಹನಗಳೆಂದರೆ ಎಲ್ಲಿಲ್ಲದ ಪ್ರೀತಿ ತಮ್ಮ ವಾಹನಗಳನ್ನು ಮನೆಯ ವ್ಯಕ್ತಿಯಂತೆ ನೋಡಿಕೊಳ್ಳುವವರೂ ಇದ್ದಾರೆ. ಇವರಿಗೆ ಜಮಾನ ಕಾಲದ ಎಲ್ಲಾ ಮೋಟಾರ್‌ ಸೈಕಲ್‌ಗಳ ಬಗ್ಗೆ ಅರಿವಿರುತ್ತದೆ. ಆದರೆ ಇವರನ್ನೂ ಹೊರತುಪಡಿಸಿ ದೇಶದ ಬಹುತೇಕ ಎಲ್ಲರಿಗೂ ತಿಳಿದಿರುವ ಕೆಲ ವಾಹನಗಳಿವೆ.

ಅವು ನೋಡಲು ಹಳೆಯದಾದರೂ ಹೆಸರಿನಲ್ಲಿ ಎಂದಿಗೂ ಹಳೆಯದಾಗುವುದಿಲ್ಲ. ಏಕೆಂದರೆ ಅವುಗಳ ಬೆಲೆಗೂ ಮೀರಿ ಹೆಚ್ಚಿನದನ್ನು ಗ್ರಾಹಕರಿಗೆ ನೀಡಿ ಜನಪ್ರಿಯತೆ ಗಳಿಸಿವೆ. ಅಂತಹ ವಾಹನಗಳು ಸ್ಥಗಿತಗೊಂಡು ದಶಕಗಳೇ ಕಳೆದರೂ ಇಂದಿಗೂ ನಾವು ರಸ್ತೆಗಳಲ್ಲಿ ನೋಡಬಹುದು. ಅದೆಷ್ಟೋ ಬಾರಿ ನಾವು ನಮ್ಮ ಸ್ನೇಹಿತರೊಂದಿಗೆ ಈ ಬೈಕ್ ಗತ್ತು ಇನ್ಯಾವುದಕ್ಕೂ ಬರೋದಿಲ್ಲ ಬಿಡು ಎಂದು ಹೊಗಳಿರುತ್ತೇವೆ. ನಾವಷ್ಟೇ ಅಲ್ಲ ದೇಶದ ಬಹುತೇಕ ಯುವಜನತೆ ಮರಳಿ ಭಾರತಕ್ಕೆ ಬರಲು ಕಾಯುತ್ತಿರುವ Top 5 bikes ಇಲ್ಲಿವೆ.

ಯಮಹಾ RX100:
ಮೇಲೆ ಹೇಳಿದ ಹಾಗೆ RX100 ಹೆಸರಿನಲ್ಲೇ ಎನೋ ಗತ್ತಿದೆ, ಇನ್ನೊಂದು ಮೂವತ್ತು ವರ್ಷ ಕಳೆದ್ರೂ ಇದನ್ನು ನೆನಸಿಕೊಳ್ಳುತ್ತೇವೆ. ಇದರ ಸರಳವಾದ 98cc 2-ಸ್ಟ್ರೋಕ್ ಎಂಜಿನ್ ಹೊರಹಾಕುವ ಆ ಶಬ್ದಕ್ಕೆ ಕೋಟ್ಯಾಂತರ ಅಭಿಮಾನಿಗಳಿದ್ದಾರೆ. ಈ ಹಗುರವಾದ ಮತ್ತು ವೇಗವುಳ್ಳ ಬೈಕ್ ಆ ಕಾಲದಲ್ಲಿ ಅದರ ವಿಭಾಗದಲ್ಲಿ ಅತ್ಯಂತ ವೇಗದ ಬೈಕ್ ಆಗಿತ್ತು. ಒಮ್ಮೆ ಅದರಲ್ಲಿ ರೌಂಡ್ ಹೊಡೆದ್ರೆ ಎಲ್ಲಾ ತಲೆಗಳು ಅದರ ಕಡೆ ತಿರುಗುತ್ತಿದ್ದವು.

ಇಂದಿಗೂ ಕೂಡ ಈ ಬೈಕ್‌ನಲ್ಲಿ ಹೋದರೆ ಬೈಕ್‌ನತ್ತ ತಲೆಗಳು ತಿರುಗುತ್ತವೆ ಎಂದರೆ ಒಮ್ಮೆ ಇದರ ಜನಪ್ರಿಯತೆ ಹೇಗಿದೆ ನೋಡಿ. ಈ ಬೈಕ್ ಬಗ್ಗೆ ನಾನು ವಿವರಿಸಿರುವ ಈ ಸಾಲುಗಳನ್ನು ಓದುತ್ತಿದ್ದಾಗಲೇ ಹಲವರಿಗೆ ಮೈ ರೋಮಾಂಚನವಾಗಿರಬಹುದು ಅಲ್ಲವೇ?. ಇಂತಹ ಲೆಜೆಂಡರಿ ಬೈಕ್ ಕುರಿತು ಇದೀಗ ಒಳ್ಳೆಯ ಸುದ್ದಿ ಇದೆ. RX100 ಪುನರಾಗಮನ ಮಾಡುವ ಸಾಧ್ಯತೆ ಹೆಚ್ಚಾಗಿದೆ. ಆದರೆ ನೀವು ನಿರೀಕ್ಷಿಸಿದಂತೆ ಅಲ್ಲ. ಈಗಿನ BS6 ಮಾನದಂಡಗಳಿಗೆ ಒಳಪಟ್ಟಿರುತ್ತದೆ.

ಕರಿಜ್ಮಾ ಆರ್:
ಕರೀಜ್ಮಾ ಬಿಡುಗಡೆಯಾದ ಸಂದರ್ಭದಲ್ಲಿ ಭಾರತದಲ್ಲಿ ಹೊಸ ಅಲೆ ಎಬ್ಬಿಸಿತ್ತು. ಅದರ ವಿನ್ಯಾಸ, ಪವರ್ ಹಾಗೂ ಪರ್ಫಾಮೆನ್ಸ್ ಯುವಕರಿಗೆ ಒಂದೊಳ್ಳೆ ಅನಿಭವ ನೀಡಿತ್ತು. ಇದರ 17PS ಪವರ್ ಮತ್ತು 19Nm ಟಾರ್ಕ್ ಉತ್ಪಾದನೆಯು ಆ ಕಾಲಕ್ಕೆ ಬೆಲೆಗೆ ತಕ್ಕ ಪವರ್ ಔಟ್‌ಪುಟ್‌ ಆಗಿತ್ತು. ಈಗ ಹೊಸ ವಿನ್ಯಾಸ, ಲಿಕ್ವಿಡ್-ಕೂಲ್ಡ್ ಅವತಾರದಲ್ಲಿ ಕರಿಜ್ಮಾವನ್ನು ಹೀರೋ ಕಂಪನಿಯು ಮರಳಿ ತರಲು ಸಿದ್ಧವಾಗಿದೆ ಎಂದು ವರದಿಯಾಗಿದೆ.

ಯಮಹಾ R3
ಯಮಹಾ R3 ತೀರಾ ಹಳೆಯ ಮೋಟಾರ್‌ ಸೈಕಲ್ ಏನಲ್ಲ, ಆದರೆ ಇದಕ್ಕೆ ಪ್ರತ್ಯೇಕ ಅಭಿಮಾನಿಗಳಿದ್ದಾರೆ. ನೋಡಲು ಆಕರ್ಷಣೀಯವಾಗಿ ಕಾಣುವ ಈ ಬೈಕ್ ದೀರ್ಘಕಾಲ ಪ್ರಯಾಣಕ್ಕೆ ಸಾಕಷ್ಟು ಸೌಕರ್ಯವನ್ನು ನೀಡುತ್ತದೆ. ಈ ಬೈಕ್ ಬೆಲೆ ಅಗ್ಗವೇನಿರಲಿಲ್ಲ 2015 ರಲ್ಲೇ ರೂ 3.25 ಲಕ್ಷ (ಎಕ್ಸ್ ಶೋ ರೂಂ ದೆಹಲಿ) ಬೆಲೆ ಇತ್ತು. BS6 ಮಾನದಂಡಗಳನ್ನು ಅನುಸರಿಸಲು ವಿಫಲವಾದ್ದರಿಂದ ಇದನ್ನು 2020 ರಲ್ಲಿ ಭಾರತೀಯ ಮಾರುಕಟ್ಟೆಯಿಂದ ತೆಗೆದುಹಾಕಲಾಯಿತು. ಮತ್ತೊಮ್ಮೆ ಈ ಪಾಕೆಟ್ ರಾಕೆಟ್ ಅನ್ನು ನಮಗೆ ನೀಡುವ ಬಗ್ಗೆ ಊಹಾಪೋಹಗಳಿವೆ.

ಹೋಂಡಾ ನವಿ
ಹೋಂಡಾ ನವಿ ಸ್ಕೂಟರ್‌ನ ಚುರುಕುತನ ಮತ್ತು ಮೋಟಾರ್‌ಸೈಕಲ್‌ನಂತಹ ವಿನ್ಯಾಸದೊಂದಿಗೆ ನೋಡುಗರಿಗೆ ಹೊಸ ಅನುಭವ ನೀಡಿತ್ತು. ಇದರ ಪೆಪ್ಪಿ ಮೋಟಾರು, ವೇಗವುಳ್ಳ ನಿರ್ವಹಣೆ ಮತ್ತು ಮೃದುತ್ವವು ನವಿಯನ್ನು ಮೋಜಿನ ಬೈಕಾಗಿ ಜನಪ್ರಿಯಗೊಳಿಸಿದೆ. ಇದನ್ನು ಯುವಕರು ಮತ್ತು ಮುಕ್ತವಾಗಿರುವವಗಾಗಿ ಉದ್ದೇಶಿಸಿರಲಿಲ್ಲ. ಒಂದು ಪ್ರತ್ಯೇಕ ವಿಭಾಗದ ಜನರಿಗಾಗಿ ನಿರ್ಮಿಸಲಾಗಿತ್ತು. ಈ ಮಿನಿ ಬೈಕ್ ಅನ್ನು ಮತ್ತೆ ಸ್ವೀಕರಿಸಲು ಸಿದ್ಧರಿಲ್ಲದಿದ್ದರೂ, ಹೋಂಡಾ ಮರಳಿ ತರಲು ನಿರ್ಧರಿಸಿದೆ.

ಹೋಂಡಾ CBR150R
ಯಮಹಾ R15 ನೊಂದಿಗೆ ಜನಪ್ರಿಯವಾಗುತ್ತಿರುವಾಗ ಹೋಂಡಾ ಸಮರ್ಥ CBR150R ನೊಂದಿಗೆ ಸೇಡು ತೀರಿಸಿಕೊಂಡಿತು. ಇದು 149cc ಲಿಕ್ವಿಡ್-ಕೂಲ್ಡ್ ಹೃದಯವು 17.1PS ಪವರ್ ಮತ್ತು 14.4Nm ಟಾರ್ಕ್ ಉತ್ಪಾದಿಸುತ್ತದೆ. ಆದರೆ ಕಾಲಾನಂತರದಲ್ಲಿ ಹೋಂಡಾ ತನ್ನ ಆಕ್ಟಿವಾ ಮಾರಾಟದಲ್ಲಿ ನಿರತವಾದ ಕಾರಣ ಪ್ರಸಿದ್ಧ ಫೇರ್ಡ್ ಬೈಕ್ ಮೂಲೆ ಗುಂಪಾಯಿತು. ನಂತರ 2016 ರಲ್ಲಿ ಮೋಟಾರ್‌ ಸೈಕಲ್ ಸಂಪೂರ್ಣ ಹೊಸತನದೊಂದಿಗೆ ಬಂತಾದರೂ ಮತ್ತೆ ಸ್ಥಗಿತಗೊಂಡಿತು. ಇದೀಗ 2023 ರಲ್ಲಿ ಹಲವು ನವೀಕರಣಗಳೊಂದಿಗೆ ಬರುವ ಸಾಧ್ಯತೆಯಿದೆ.