ಭಾರತದಲ್ಲಿ ಎರಡು ಪವರ್‌ಫುಲ್ ಬೈಕ್‌ಗಳನ್ನು ಬಿಡುಗಡೆ ಮಾಡಿದ ಹೋಂಡಾ

ಹೋಂಡಾ ಮೋಟಾರ್‌ಸೈಕಲ್ ಮತ್ತು ಸ್ಕೂಟರ್ ಇಂಡಿಯಾ (HMSI) ಇಂದು ತನ್ನ ಪ್ರೀಮಿಯಂ ಪೋರ್ಟ್‌ಫೋಲಿಯೊಗೆ ಎರಡು ಹೊಸ ಪವರ್‌ಫುಲ್‌ ಬೈಕ್‌ಗಳನ್ನು ಸೇರ್ಪಡೆ ಮಾಡುವುದಾಗಿ ಘೋಷಿಸಿದೆ. ಹೌದು CB750 ಹಾರ್ನೆಟ್ ಮತ್ತು CB1000 ಹಾರ್ನೆಟ್ SP ಎಂಬ ಎರಡೂ ಮೋಟಾರ್‌ಸೈಕಲ್‌ಗಳ ಬುಕಿಂಗ್‌ಗಳನ್ನು ಪ್ರಾರಂಭಿಸಿದೆ, ಇವುಗಳ ವಿತರಣೆಗಳು ಜೂನ್ 2025 ರಿಂದ ಪ್ರಾರಂಭವಾಗಲಿವೆ. ಹೊಚ್ಚ ಹೊಸ ಹೋಂಡಾ CB750 ಹಾರ್ನೆಟ್ ಬೆಲೆ ರೂ. 8,59,500 ಮತ್ತು CB1000 ಹಾರ್ನೆಟ್ SP ಬೆಲೆ ರೂ. 12,35,900 ಆಗಿದೆ ( ಎರಡೂ ಎಕ್ಸ್-ಶೋರೂಂ).

CB750 ಹಾರ್ನೆಟ್ ಎಲ್ಲಾ ಬಿಗ್‌ವಿಂಗ್ ಟಾಪ್‌ಲೈನ್ ಮತ್ತು ಬಿಗ್‌ವಿಂಗ್ ಡೀಲರ್‌ಶಿಪ್‌ಗಳಲ್ಲಿ ಲಭ್ಯವಿರುತ್ತದೆ. ಹಾಗೆಯೇ CB1000 ಹಾರ್ನೆಟ್ SP ಭಾರತದಲ್ಲಿನ ಬಿಗ್‌ವಿಂಗ್ ಟಾಪ್‌ಲೈನ್ ಡೀಲರ್‌ಶಿಪ್‌ಗಳ ಮೂಲಕ ಪ್ರತ್ಯೇಕವಾಗಿ ಮಾರಾಟವಾಗುತ್ತದೆ. 'ಆಕ್ರಮಣಕಾರಿ X ಪ್ಯೂರ್' ಡಿಸೈನ್ ಪರಿಕಲ್ಪನೆಯಡಿಯಲ್ಲಿ, CB750 ಹಾರ್ನೆಟ್ ಮತ್ತು CB1000 ಹಾರ್ನೆಟ್ SP ಎರಡೂ ಮಸ್ಕುಲರ್ ಸ್ಟ್ರೀಟ್‌ಫೈಟರ್ ವಿನ್ಯಾಸವನ್ನು ಹೊಂದಿವೆ.

ಅವುಗಳು ತಮ್ಮ ಕಮಾಂಡಿಂಗ್ ರೋಡ್ ಪ್ರಸೆನ್ಸ್ ಹೆಚ್ಚಿಸುವ ಗಮನಾರ್ಹ ಹೆಡ್‌ಲ್ಯಾಂಪ್‌ನೊಂದಿಗೆ ಸಂಪೂರ್ಣ-LED ಲೈಟ್ ಸಿಸ್ಟಮ್ ಹೊಂದಿವೆ. CB750 ಹಾರ್ನೆಟ್ ಮ್ಯಾಟ್ ಪರ್ಲ್ ಗ್ಲೇರ್ ವೈಟ್ ಮತ್ತು ಮ್ಯಾಟ್ ಬ್ಯಾಲಿಸ್ಟಿಕ್ ಬ್ಲ್ಯಾಕ್ ಮೆಟಾಲಿಕ್ ಎಂಬ ಎರಡು ಬಣ್ಣಗಳಲ್ಲಿ ಲಭ್ಯವಿರುತ್ತದೆ. ಪ್ರಮುಖ ನೇಕೆಡ್ ಸ್ಟ್ರೀಟ್‌ಫೈಟರ್, CB1000 ಹಾರ್ನೆಟ್ SP, ಒಂದೇ ಮ್ಯಾಟ್ ಬ್ಯಾಲಿಸ್ಟಿಕ್ ಬ್ಲ್ಯಾಕ್ ಮೆಟಾಲಿಕ್ ಬಣ್ಣದಲ್ಲಿ ಲಭ್ಯವಿರುತ್ತದೆ.

ಹೈಟೆಕ್ ಫೀಚರ್ಸ್: ಹೈ ಪರ್ಫಾಮೆನ್ಸ್‌ಗಾಗಿ ವಿನ್ಯಾಸಗೊಳಿಸಲಾದ ಈ ಎರಡೂ ಸ್ಟ್ರೀಟ್ ನೇಕೆಡ್ ಮೋಟಾರ್‌ಸೈಕಲ್‌ಗಳು, ಉನ್ನತ ಶ್ರೇಣಿಯ ಹಾರ್ಡ್‌ವೇರ್ ಘಟಕಗಳನ್ನು ಒಳಗೊಂಡಿವೆ. CB750 ಹಾರ್ನೆಟ್ ಮುಂಭಾಗದಲ್ಲಿ SHOWA SFF-BPTM ತಲೆಕೆಳಗಾದ ಫೋರ್ಕ್ ಮತ್ತು ಹಿಂಭಾಗದಲ್ಲಿ ಪ್ರೊ-ಲಿಂಕ್ ಸ್ವಿಂಗಾರ್ಮ್‌ನೊಂದಿಗೆ ಮೊನೊಶಾಕ್ ಡ್ಯಾಂಪರ್ ಅನ್ನು ಹೊಂದಿದೆ. CB1000 ಹಾರ್ನೆಟ್ ಮುಂಭಾಗದಲ್ಲಿ SHOWA SFF-BP ತಲೆಕೆಳಗಾದ ಫೋರ್ಕ್ ಮತ್ತು ಹಿಂಭಾಗದಲ್ಲಿ ಹೊಸ ÖHLINS TTX36 ಅನ್ನು ಒಳಗೊಂಡಿದೆ.

CB1000 ಹಾರ್ನೆಟ್ SP ಗಾಗಿ 310mm ಬ್ರೆಂಬೊ ರೇಡಿಯಲ್-ಮೌಂಟ್ ಕ್ಯಾಲಿಪರ್‌ಗಳೊಂದಿಗೆ ಡ್ಯುಯಲ್ ಫ್ರಂಟ್ ಡಿಸ್ಕ್ ಬ್ರೇಕ್‌ಗಳನ್ನು ನೀಡಲಾಗಿದೆ. ಹಿಂಭಾಗದಲ್ಲಿ ಇದು 240mm ಡಿಸ್ಕ್ ಅನ್ನು ಪಡೆಯುತ್ತದೆ. CB750 ಹಾರ್ನೆಟ್ 296mm ಡ್ಯುಯಲ್ ಫ್ರಂಟ್ ಡಿಸ್ಕ್ ಬ್ರೇಕ್‌ಗಳು ಮತ್ತು ಹಿಂಭಾಗದಲ್ಲಿ 240mm ಡಿಸ್ಕ್ ಅನ್ನು ಹೊಂದಿದೆ. ಹೆಚ್ಚುವರಿ ಸುರಕ್ಷತೆಗಾಗಿ ಎರಡೂ ಮಾದರಿಗಳು ಡ್ಯುಯಲ್-ಚಾನೆಲ್ ABS ಅನ್ನು ಹೊಂದಿವೆ.

ಈ ನೇಕೆಡ್ ಸ್ಟ್ರೀಟ್‌ಫೈಟರ್‌ಗಳು ಹೋಂಡಾದ ರೋಡ್‌ಸಿಂಕ್ ಅಪ್ಲಿಕೇಶನ್ ಸಂಪರ್ಕದೊಂದಿಗೆ 5.0-ಇಂಚಿನ ಫುಲ್ಲಿ-ಕಲರ್ TFT ಡಿಸ್ಪ್ಲೇ ಹೊಂದಿವೆ. ನ್ಯಾವಿಗೇಷನ್, ಕರೆ ಎಚ್ಚರಿಕೆಗಳು ಮತ್ತು ಬ್ಲೂಟೂತ್ ಮೂಲಕ ಸಂಗೀತ ನಿಯಂತ್ರಣಕ್ಕಾಗಿ ಸ್ಮಾರ್ಟ್‌ಫೋನ್ ಸಂಪರ್ಕವನ್ನು ಅನುಮತಿಸುತ್ತದೆ. ಹ್ಯಾಂಡಲ್‌ಬಾರ್‌ನ ಎಡಭಾಗದಲ್ಲಿ ಬಹು-ಕ್ರಿಯಾತ್ಮಕ ಸ್ವಿಚ್ ಅನ್ನು ಸಹ ನೀಡಲಾಗಿದೆ.

ಎಂಜಿನ್: ಹೋಂಡಾ CB750 ಹಾರ್ನೆಟ್ ಇನ್‌ಲೈನ್ 2-ಸಿಲಿಂಡರ್, 755cc, 4 ಸ್ಟ್ರೋಕ್, 8 ವಾಲ್ವ್, ಲಿಕ್ವಿಡ್ ಕೂಲ್ಡ್ ಎಂಜಿನ್ ಹೊಂದಿದೆ. ಇದು 9,500 RPM ನಲ್ಲಿ 67.5 kW ಪವರ್ ಮತ್ತು 7,250 RPM ನಲ್ಲಿ 75 Nm ಪೀಕ್ ಟಾರ್ಕ್ ಅನ್ನು ಹೊರಹಾಕುತ್ತದೆ. ಸ್ಪೋರ್ಟ್, ಸ್ಟ್ಯಾಂಡರ್ಡ್, ರೈನ್ ಮತ್ತು ಯೂಸರ್ ಎಂಬ ನಾಲ್ಕು ರೈಡಿಂಗ್ ಮೋಡ್‌ಗಳನ್ನು CB750 ಹಾರ್ನೆಟ್ ಹೊಂದಿದೆ.

ಮತ್ತೊಂದೆಡೆ CB1000 ಹಾರ್ನೆಟ್ SP 999cc, ಲಿಕ್ವಿಡ್ ಕೂಲ್ಡ್, 4 ಸ್ಟ್ರೋಕ್, 16 ವಾಲ್ವ್, ಇನ್‌ಲೈನ್ ಫೋರ್ DOHC ಎಂಜಿನ್‌ ಹೊಂದಿದೆ. ಇದು 11,000 RPM ನಲ್ಲಿ 115.6 kW ಪವರ್ ಮತ್ತು 9,000 RPM ನಲ್ಲಿ 107 Nm ಟಾರ್ಕ್ ಅನ್ನು ಹೊರಹಾಕುತ್ತದೆ. ಎರಡೂ ಬೈಕ್‌ಗಳು 6-ಸ್ಪೀಡ್ ಗೇರ್‌ಬಾಕ್ಸ್‌ ಜೊತೆಗೆ ಅಸಿಸ್ಟ್ ಮತ್ತು ಸ್ಲಿಪ್ಪರ್ ಕ್ಲಚ್ ಅನ್ನು ಹೊಂದಿವೆ.