ಕಾರುಗಳಿಗೆ ಸೆಡ್ಡು: ರೇಡಾರ್, ಸೆನ್ಸಾರ್, ಡ್ಯಾಷ್ ಕ್ಯಾಮ್‌ನ ಹೈ-ಟೆಕ್ ಬೈಕ್ ಬಿಡುಗಡೆ: ಕರ್ನಾಟಕದ ತಾಕತ್ತು!

ಜಾಗತಿಕವಾಗಿ ಜನಪ್ರಿಯತೆ ಪಡೆದಿರುವ ನಮ್ಮ ಕರ್ನಾಟಕ ಮೂಲದ ಪ್ರಮುಖ ಎಲೆಕ್ಟ್ರಿಕ್ ವಾಹನ ತಯಾರಕ ಕಂಪನಿ 'ಅಲ್ಟ್ರಾವೈಲೆಟ್' (Ultraviolette), ಇಂದು ವಿಶ್ವದ ಮೊದಲ ರಾಡಾರ್ ಇಂಟಿಗ್ರೇಟೆಡ್ ಮೋಟಾರ್‌ಸೈಕಲ್ 'X-47 ಕ್ರಾಸ್‌ಓವರ್' ಅನ್ನು ಬಿಡುಗಡೆ ಮಾಡಿದೆ. ಈ ಹೊಸ ಮೋಟಾರ್‌ಸೈಕಲ್ ಅನ್ನು ದೈನಂದಿನ ಸವಾರರು, ಥ್ರಿಲ್-ಅನ್ವೇಷಕರು ಮತ್ತು ಉತ್ಸಾಹಿಗಳಿಗಾಗಿ ವಿನ್ಯಾಸಗೊಳಿಸಲಾಗಿದೆ. ಇದು ನೇರವಾದ ರೈಡಿಂಗ್ ಪೊಸಿಷನ್, ಆನ್‌ಬೋರ್ಡ್ ಚಾರ್ಜರ್, ಹೈ-ಟಾರ್ಕ್, ಉತ್ತಮ ನಿಯಂತ್ರಣ, ಅತ್ಯುತ್ತಮ ಪವರ್‌ನೊಂದಿಗೆ ವೈವಿಧ್ಯಮಯ ಭೂಪ್ರದೇಶಗಳಿಗೆ ಹೊಂದಿಕೊಳ್ಳುತ್ತದೆ ಎಂದು ಅಲ್ಟ್ರಾವೈಲೆಟ್ ಕಂಪನಿ ತಿಳಿಸಿದೆ.

UV ರಾಡಾರ್ ಇಂಟೆಲಿಜೆನ್ಸ್

ಅಲ್ಟ್ರಾವೈಲೆಟ್ X-47 ಅತ್ಯಾಧುನಿಕ 77 GHz ಲಾಂಗ್ ರೇಂಜ್ ಹಿಂಭಾಗದ ರಾಡಾರ್ ಅನ್ನು ಹೊಂದಿದೆ. ಇದು 200 ಮೀಟರ್‌ಗಳವರೆಗೆ ದೂರವನ್ನು ಮೇಲ್ವಿಚಾರಣೆ ಮಾಡುವ ಸಾಮರ್ಥ್ಯವನ್ನು ಹೊಂದಿದೆ. ದ್ವಿಚಕ್ರ ವಾಹನ ಡೈನಾಮಿಕ್ಸ್‌ಗಾಗಿ ನಿರ್ದಿಷ್ಟವಾಗಿ ವಿನ್ಯಾಸಗೊಳಿಸಲಾದ ರಾಡಾರ್ ವ್ಯವಸ್ಥೆಯು ಬುದ್ಧಿವಂತಿಕೆಯಿಂದ 20 ಡಿಗ್ರಿಗಳವರೆಗಿನ ಲೀನ್ ಆಂಗಲ್‌ಗಳಿಗೆ ಹೊಂದಿಕೊಳ್ಳುತ್ತದೆ.

ಈ ಮೂಲಕ ಅಲ್ಟ್ರಾವೈಲೆಟ್ UV ಹೈಪರ್‌ಸೆನ್ಸ್‌ನಿಂದ ಚಾಲಿತವಾದ ಅಡ್ವಾನ್ಸ್ಡ್ ರೈಡರ್ ಅಸಿಸ್ಟೆನ್ಸ್ ಸಿಸ್ಟಮ್ ಅನ್ನು ಪರಿಚಯಿಸಿದ ಮೊದಲ ತಯಾರಕರಾಗಿ ಅಲ್ಟ್ರಾವೈಲೆಟ್ ಕಂಪನಿ ಗುರ್ತಿಸಿಕೊಂಡಿದೆ. ಸವಾರರ ಅರಿವು ಮತ್ತು ಸುರಕ್ಷತೆಯನ್ನು ಹೆಚ್ಚಿಸಲು ವಿನ್ಯಾಸಗೊಳಿಸಲಾದ ಈ ವ್ಯವಸ್ಥೆಯು ನಾಲ್ಕು ಪ್ರಮುಖ ಕಾರ್ಯಗಳ ಮೂಲಕ ತನ್ನ ಸಾಮರ್ಥ್ಯಗಳನ್ನು ನೀಡುತ್ತದೆ. ಅವು ಈ ಕೆಳಗಿನಂತಿವೆ:

1 ಬ್ಲೈಂಡ್-ಸ್ಪಾಟ್ ಮಾನಿಟರಿಂಗ್: ಸವಾರರ ಬ್ಲೈಂಡ್ ಝೋನ್‌ಗಳನ್ನು ಸಕ್ರಿಯವಾಗಿ ಸ್ಕ್ಯಾನ್ ಮಾಡುತ್ತದೆ. ಪಕ್ಕದ ಲೇನ್‌ಗಳಲ್ಲಿ ವೇಗವಾಗಿ ಸಮೀಪಿಸುತ್ತಿರುವ ಅಥವಾ ಓವರ್‌ಟೇಕ್ ಮಾಡುವ ವಾಹನಗಳನ್ನು ಪತ್ತೆ ಮಾಡುತ್ತದೆ, ಸನ್ನಿವೇಶದ ಅರಿವನ್ನು ಹೆಚ್ಚಿಸಲು ಮತ್ತು ಸಂಭಾವ್ಯ ಡಿಕ್ಕಿಗಳನ್ನು ತಡೆಯಲು ಸಕಾಲಿಕ ಎಚ್ಚರಿಕೆಗಳನ್ನು ಒದಗಿಸುತ್ತದೆ.

2 & 3 ಲೇನ್ ಬದಲಾವಣೆ ಸಹಾಯ: ಲೇನ್ ಬದಲಾವಣೆಯನ್ನು ಪ್ರಾರಂಭಿಸುವಾಗ ಯಾವುದೇ ಸಂಭಾವ್ಯ ಡಿಕ್ಕಿ ಅಪಾಯಗಳ ಬಗ್ಗೆ ಸವಾರನಿಗೆ ಪೂರ್ವಭಾವಿಯಾಗಿ ಎಚ್ಚರಿಕೆ ನೀಡುತ್ತದೆ, ಅಸುರಕ್ಷಿತ ಕುಶಲತೆಯನ್ನು ತಡೆಯಲು ಸಹಾಯ ಮಾಡುತ್ತದೆ. ಒಟ್ಟಾರೆ ರಸ್ತೆ ಸುರಕ್ಷತೆಯನ್ನು ಹೆಚ್ಚಿಸುತ್ತದೆ. ಓವರ್‌ಟೇಕ್ ಎಚ್ಚರಿಕೆ: ಪಕ್ಕದ ಲೇನ್‌ಗಳಲ್ಲಿ ವಿಶೇಷವಾಗಿ ಬ್ಲೈಂಡ್ ಸ್ಪಾಟ್‌ಗಳಲ್ಲಿ ಓವರ್‌ಟೇಕ್ ಮಾಡಲು ಉದ್ದೇಶಿಸಿರುವ ವಾಹನಗಳನ್ನು ಹಿಂಭಾಗದಿಂದ ಮೇಲ್ವಿಚಾರಣೆ ಮಾಡಿ ಸವಾರನಿಗೆ ಸಕಾಲಿಕ ದೃಶ್ಯ ಸೂಚನೆಗಳನ್ನು ನೀಡುತ್ತದೆ.

4. ಹಿಂಭಾಗದ ಡಿಕ್ಕಿ ಎಚ್ಚರಿಕೆ: ಸಂಭಾವ್ಯ ಹಿಂಬದಿಯ ಡಿಕ್ಕಿಗಳನ್ನು ಪತ್ತೆ ಮಾಡುತ್ತದೆ. ಸಂಯೋಜಿತ UV ಹೈಪರ್‌ಸೆನ್ಸ್ ಕನ್ನಡಿಗಳ ಮೂಲಕ ಸವಾರನಿಗೆ ತಕ್ಷಣ ಎಚ್ಚರಿಕೆಗಳನ್ನು ನೀಡುತ್ತದೆ. ಅದೇ ಸಮಯದಲ್ಲಿ, ಸಮೀಪಿಸುತ್ತಿರುವ ವಾಹನಗಳನ್ನು ಎಚ್ಚರಿಸಲು ವ್ಯವಸ್ಥೆಯು ಅಪಾಯದ ದೀಪಗಳನ್ನು ಸಕ್ರಿಯಗೊಳಿಸುತ್ತದೆ, ನಿರ್ಣಾಯಕ ಕ್ಷಣಗಳಲ್ಲಿ ಸುರಕ್ಷತೆಯನ್ನು ಹೆಚ್ಚಿಸುತ್ತದೆ.

ಹೈಟೆಕ್ ಫೀಚರ್ಸ್

ಇಂಟಿಗ್ರೇಟೆಡ್ ಡ್ಯಾಶ್‌ಕ್ಯಾಮ್ ಪಡೆದಿರುವ ಅಲ್ಟ್ರಾವೈಲೆಟ್ X-47, ಸುರಕ್ಷತೆ, ಭದ್ರತೆ ಮತ್ತು ಸವಾರರ ವಿಶ್ವಾಸವನ್ನು ಹೆಚ್ಚಿಸಲು ವಿನ್ಯಾಸಗೊಳಿಸಲಾಗಿದೆ. ಹೆಚ್ಚಿನ ಸಾಮರ್ಥ್ಯದ 1080p, 30fps IMX307 HDR ವೈಡ್-ಆಂಗಲ್ ಕ್ಯಾಮೆರಾಗಳೊಂದಿಗೆ (120°) ಸಜ್ಜುಗೊಂಡಿದೆ. ಈ ಕ್ಯಾಮೆರಾಗಳು ಎಲ್ಲಾ ಪರಿಸ್ಥಿತಿಗಳಲ್ಲಿಯೂ ಅಸಾಧಾರಣ ಸ್ಪಷ್ಟತೆ ನೀಡುತ್ತವೆ.

ದ್ವಿತೀಯ 5-ಇಂಚಿನ ಟಚ್‌ಸ್ಕ್ರೀನ್ ಡಿಸ್ಪ್ಲೇ - ಏರೋಸ್ಪೇಸ್-ಗ್ರೇಡ್ ಅಲ್ಯೂಮಿನಿಯಂನಿಂದ ರಚಿಸಲಾಗಿದೆ. ಇದು 32GB ಆನ್‌ಬೋರ್ಡ್ ಸಂಗ್ರಹಣೆಯೊಂದಿಗೆ ಬರುತ್ತದೆ, ಇದನ್ನು 256GB ವರೆಗೆ ವಿಸ್ತರಿಸಬಹುದು. ಇಂಟೆಲಿಜೆಂಟ್ ರೆಕಾರ್ಡಿಂಗ್ ಸಾಮರ್ಥ್ಯಗಳೊಂದಿಗೆ ಸಿಸ್ಟಮ್‌ನ ನಿರಂತರ ಲೂಪ್ ರೆಕಾರ್ಡಿಂಗ್ ಕವರೇಜ್ ನೀಡುತ್ತದೆ. ವೈ-ಫೈ ಮತ್ತು ಬ್ಲೂಟೂತ್ ಸಂಪರ್ಕ, ಸಂಯೋಜಿತ ಮೈಕ್ರೊಫೋನ್, ಕಳ್ಳತನ-ವಿರೋಧಿ ಮೆಕ್ಯಾನಿಕಲ್ ಮೌಂಟ್ ನೀಡಲಾಗಿದೆ.

ಅಲ್ಟ್ರಾವೈಲೆಟ್ X-47 ಕ್ರಾಸ್‌ಒವರ್ ಮೋಟಾರ್‌ಸೈಕಲ್ 10.3 kWh ಬ್ಯಾಟರಿ ಪ್ಯಾಕ್‌ನಿಂದ ನಡೆಸಲ್ಪಡುತ್ತದೆ. ಇದು 40.2 hp (30 kW) ಪವರ್ ಮತ್ತು 100 Nm ಟಾರ್ಕ್ ಉತ್ಪಾದಿಸುತ್ತದೆ. ಕೇವಲ 2.7 ಸೆಕೆಂಡುಗಳಲ್ಲಿ 60 ಕಿ.ಮೀ ವೇಗ ಮತ್ತು 145 ಕಿ.ಮೀ ಟಾಪ್ ಸ್ಪೀಡ್ ತಲುಪಬಲ್ಲದು. ಸಿಂಗಲ್ ಚಾರ್ಜ್‌ನಲ್ಲಿ 323 ಕಿ.ಮೀ ವರೆಗಿನ IDC ರೇಂಜ್ ನೀಡುವುದಾಗಿ ಕಂಪನಿ ತಿಳಿಸಿದೆ.

ಅಲ್ಟ್ರಾವೈಲೆಟ್ X-47 ಕ್ರಾಸ್‌ಒವರ್ ಮೋಟಾರ್‌ಸೈಕಲ್ 3-ಸ್ಟೇಜ್ ಟ್ರಾಕ್ಷನ್ ಕಂಟ್ರೋಲ್‌ನೊಂದಿಗೆ ಜೋಡಿಸಲಾದ ಬದಲಾಯಿಸಬಹುದಾದ ಮೋಡ್‌ಗಳೊಂದಿಗೆ ಅತ್ಯಾಧುನಿಕ 10ನೇ ಜನರೇಷನ್ ಬಾಷ್ ಡ್ಯುಯಲ್-ಚಾನೆಲ್ ABS ಹೊಂದಿದೆ. ಬ್ರೆಂಬೊ ಬ್ರೇಕಿಂಗ್ ಸಿಸ್ಟಮ್ ನೀಡಲಾಗಿದ್ದು, 320 mm ಮುಂಭಾಗದ ಡಿಸ್ಕ್ ಫಿಕ್ಸಡ್ 4 ಪಿಸ್ಟನ್ ಕ್ಯಾಲಿಪರ್ ಮತ್ತು ಸಿಂಟರ್ಡ್ ಪ್ಯಾಡ್‌ಗಳನ್ನು ಹೊಂದಿದೆ. ಪ್ಲೋಟಿಂಗ್ ಪಿಸ್ಟನ್ ಕ್ಯಾಲಿಪರ್‌ನೊಂದಿಗೆ 230 mm ಹಿಂಭಾಗದ ಡಿಸ್ಕ್‌ ನೀಡಲಾಗಿದೆ.

ಅಲ್ಟ್ರಾವೈಲೆಟ್ X-47 ಕ್ರಾಸ್‌ಒವರ್ 41 mm ಯುಎಸ್‌ಡಿ ಮುಂಭಾಗದ ಫೋರ್ಕ್‌ಗಳು ಮತ್ತು ಹಿಂಭಾಗದಲ್ಲಿ ಮೊನೊ-ಶಾಕ್ ಹೊಂದಿದೆ, ಎರಡೂ ಪ್ರೀ ಲೋಡ್ ಅಡ್ಜಸ್ಟಬಲ್‌ನೊಂದಿಗೆ ಬರುತ್ತವೆ. ಈ ಸೆಟಪ್ ಸವಾರ ರಸ್ತೆಗೆ ಹೊಂದಿಕೊಳ್ಳುವಂತೆ ಸೂಕ್ಷ್ಮವಾಗಿ ಟ್ಯೂನ್ ಮಾಡಲಾದ, ಸ್ಪಂದಿಸುವ ಮತ್ತು ಕಸ್ಟಮೈಸ್ ಮಾಡಬಹುದಾದ ಸವಾರಿ ಅನುಭವವನ್ನು ಖಚಿತಪಡಿಸುತ್ತದೆ ಎಂದು ಕಂಪನಿ ತಿಳಿಸಿದೆ.

ಅಲ್ಟ್ರಾವೈಲೆಟ್ X-47 ಕ್ರಾಸ್‌ಒವರ್ 5-ಇಂಚಿನ ಮಲ್ಟಿ-ಫಂಕ್ಷನ್ TFT ಡಿಸ್ಪ್ಲೇಯನ್ನು ಹೊಂದಿದ್ದು, ಇದು ಟಚ್ ಇನ್‌ಪುಟ್ ಸ್ವಿಚ್ ಕನ್ಸೋಲ್‌ನೊಂದಿಗೆ ಜೋಡಿಯಾಗಿದೆ. ವಿಶಾಲವಾದ ವೀಲ್‌ಬೇಸ್ ಮತ್ತು ಉತ್ತಮ ಸ್ಥಿರತೆಗಾಗಿ ದೀರ್ಘ ಪ್ರಯಾಣದ ಸಸ್ಪೆನ್ಷನ್‌ನೊಂದಿಗೆ ವಿನ್ಯಾಸಗೊಳಿಸಲಾದ X-47 ಉದ್ಯಮ-ಮೊದಲ ರೇಡಿಯಲ್ ಆಲ್-ಟೆರೈನ್ ಟೈರ್‌ಗಳನ್ನು ಪಡೆದುಕೊಂಡಿದೆ.

ಈ ಎಲ್ಲಾ ವಿಶೇಷತೆಗಳೊಂದಿಗೆ ಮೋಟಾರ್‌ಸೈಕಲ್ ಭಾರತದಾದ್ಯಂತ ರೂ. 2,49,000 ದಿಂದ ಪ್ರಾರಂಭವಾಗುವ ಪರಿಚಯಾತ್ಮಕ ಬೆಲೆಯಲ್ಲಿ ಮಾರಾಟಕ್ಕೆ ಲಭ್ಯವಿದೆ. ಇದು ಮೊದಲ 1000 ಗ್ರಾಹಕರಿಗೆ ಅನ್ವಯಿಸುತ್ತದೆ. X-47 ಕ್ರಾಸ್‌ಓವರ್‌ನ ವಿತರಣೆಗಳು ಅಕ್ಟೋಬರ್ 2025 ರಲ್ಲಿ ಪ್ರಾರಂಭವಾಗುತ್ತವೆ ಎಂದು ಕಂಪನಿ ತಿಳಿಸಿದೆ.