ಹೊಸ ಸುಜುಕಿ ಜಿಕ್ಸರ್ 150 ಸಿಸಿ ಬೈಕ್ ಭರ್ಜರಿ ಎಂಟ್ರಿ

By Nagaraja

Published: Tuesday, September 9, 2014, 14:05 [IST]

ದೇಶದ ದ್ವಿಚಕ್ರ ವಾಹನ ಪ್ರೇಮಿಗಳು ಕಾತರದಿಂದ ಕಾದು ಕುಳಿತಿದ್ದ ಸುಜುಕಿ ಜಿಕ್ಸರ್ 150 ಸಿಸಿ ಬೈಕ್ ದೇಶದ ಮಾರುಕಟ್ಟೆಗೆ ಭರ್ಜರಿ ಎಂಟ್ರಿ ಪಡೆದುಕೊಂಡಿದೆ. ಈ ಸಂಬಂಧ ಹಮ್ಮಿಕೊಂಡಿದ್ದ ಕಾರ್ಯಕ್ರಮದಲ್ಲಿ ಹೇಳಿಕೆ ಕೊಟ್ಟಿರುವ ಸುಜುಕಿ ಮೋಟಾರುಸೈಕಲ್ ಇಂಡಿಯಾ ಸಂಸ್ಥೆಯು, ಹೊಸ ಜಿಕ್ಸರ್ ಬೈಕ್ ದೆಹಲಿ ಎಕ್ಸ್ ಶೋ ರೂಂ ಬೆಲೆ 72,199 ರು.ಗಳಾಗಿರಲಿದೆ ಎಂದಿದೆ.

ಹೊಸ ಸುಜುಕಿಯಲ್ಲಿ ಆಳವಡಿಸಲಾಗಿರುವ ಸುಜುಕಿ ಇಕೊ ನಿರ್ವಹಣೆ (ಎಸ್‌ಇಪಿ) ತಂತ್ರಜ್ಞಾನವು ಇತರ ಸ್ಪರ್ಧಿಗಳಿಂದ ಜಪಾನ್ ಮೂಲದ ಈ ಬೈಕನ್ನು ವಿಭಿನ್ನವಾಗಿಸಲಿದೆ. ಇದರ 155ಸಿಸಿ ಏರ್ ಕೂಲ್ಡ್ ಸಿಂಗಲ್ ಸಿಂಗಲ್ ಕಾರ್ಬ್ಯುರೇಟರ್ ಎಂಜಿನ್‌ 14.8 ಪಿಎಸ್ ಪವರ್ (14 ಎನ್‌ಎಂ ಟಾರ್ಕ್) ಉತ್ಪಾದಿಸುವ ಸಾಮರ್ಥ್ಯ ಹೊಂದಿರಲಿದೆ. ಇದರಲ್ಲಿ ಫೈವ್ ಸ್ಪೀಡ್ ಗೇರ್ ಬಾಕ್ಸ್ ಸಹ ಇರಲಿದೆ.

ಸಂಸ್ಥೆಯ ಪ್ರಕಾರ ಹೊಸ ಜಿಕ್ಸರ್ ಪ್ರತಿ ಲೀಟರ್‌ಗೆ 63.2 ಕೀ.ಮೀ. ಮೈಲೇಜ್ ನೀಡಲು ಸಕ್ಷಮವಾಗಿರಲಿದೆ. ಅಲ್ಲದೆ 12 ಲೀಟರ್ ಇಂಧನ ಸಾಮರ್ಥ್ಯ ಹೊಂದಿರುವ ಜಿಕ್ಸರ್ 135 ಕೆ.ಜಿ ತೂಕವನ್ನು ಹೊಂದಿರಲಿದೆ.

ಮುಂದುಗಡೆ ಸಿಂಗಲ್ ಡಿಸ್ಕ್ ಯುನಿಟ್ ಮತ್ತು ಹಿಂದುಗಡೆ ಡ್ರಮ್ ಬ್ರೇಕ್ ವ್ಯವಸ್ಥೆ ಜೋಡಣೆ ಮಾಡಲಾಗಿದೆ. ಹಾಗೆಯೇ ಎರಡು ರಂಧ್ರಗಳ ವೃತ್ತಾಕಾರದ ಎಕ್ಸಾಸ್ಟ್ ಸಿಸ್ಟಂ ಬೈಕ್‌ಗೆ ಇನ್ನಷ್ಟು ಕ್ರೀಡಾತ್ಮಕ ಲುಕ್ ಪ್ರದಾನ ಮಾಡುತ್ತಿದೆ. ಇನ್ನು ಡಿಜಿಟಲ್ ಕ್ಲಸ್ಟರ್ ಬಗ್ಗೆ ಮಾತನಾಡುವುದಾದ್ದಲ್ಲಿ ಇದು ನೇರ ನಿಖರ ಮಾಹಿತಿಯನ್ನು ಸವಾರರಿಗೆ ಒದಗಿಸಲಿದೆ.

ಅಂದ ಹಾಗೆ ಹೊಸ ಜಿಕ್ಸರ್ ಐದು ಬಣ್ಣಗಳ ಆಯ್ಕೆಗಳನ್ನು ಗ್ರಾಹಕರಿಗೆ ನೀಡಲಿದೆ. ಮೆಟ್ಯಾಲಿಕ್ ಓರ್ಟ್ ಗ್ರೇ, ಕ್ಯಾಂಡಿ ಆಂಟರೆಸ್ ರೆಡ್, ಗ್ಲಾಸ್ ಸ್ಪಾರ್ಕಲ್ ಬ್ಲ್ಯಾಕ್, ಮೆಟ್ಯಾಲಿಕ್ ಟ್ರೈಟಾನ್ ಬ್ಲೂ ಮತ್ತು ಪಿಯರ್ಲ್ ಮೈರೇಜ್ ವೈಟ್.

ಇನ್ನು ವಿಶೇಷವೆಂದರೆ ಸುಜುಕಿ ಮೊಟೊ ಜಿಪಿ ಸೂಪರ್ ಬೈಕ್ ಪ್ರೋಗ್ರೋನಲ್ಲಿ ಕೆಲಸ ಮಾಡುತ್ತಿರುವ ಎಂಜಿನಿಯರ್‌ಗಳೇ ಹೊಸ ಜಿಕ್ಸರ್ ಬೈಕನ್ನು ಅಭಿವೃದ್ಧಿಪಡಿಸಿದ್ದಾರೆ. ಅಂದರೆ ನಿರ್ಹಹಣೆ ಹಾಗೂ ಕ್ರೀಡಾತ್ಮಕ ನೋಟದಲ್ಲಿ ಯಾವುದೇ ರಾಜಿಗೂ ತಯಾರಾಗಿಲ್ಲ.