ದೇಶಕ್ಕೆ ಮಗದೊಂದು ಪ್ರೀಮಿಯಂ ಸ್ಕೂಟರ್ - ವೆಸ್ಪಾ ಎಸ್

ಈ ವೆಸ್ಪಾ ಎಸ್ ಸ್ಕೂಟರ್ ಈಗಾಗಲೇ ವಿಶ್ಲೇಷಕರ ಪ್ರಶಂಸೆಗೆ ಪಾತ್ರವಾಗಿದೆ. ಕಳೆದ ವರ್ಷವೇ ಘೋಷಣೆಯಾದಂತೆಯೇ ವೆಸ್ಪಾ ಎಸ್ ಮಾದರಿ ಪ್ರದರ್ಶನಗೊಂಡಿದೆ. ಇದೀಗ ದೆಹಲಿ ಆಟೋ ಎಕ್ಸ್ ಪೋದಲ್ಲಿ ಪ್ರದರ್ಶನೆಗೊಂಡಿರುವ ವೆಸ್ಪಾ ಎಸ್ ಪ್ರಸಕ್ತ ಸಾಲಿನಲ್ಲೇ ದೇಶದ ಮಾರುಕಟ್ಟೆಗೂ ತಲುಪಲಿದೆ.

ತಯಾರಕರ ಪ್ರಕಾರ ವೆಸ್ಪಾ ಎಸ್ ಮಾದರಿಯಲ್ಲಿ ಕ್ಲಾಸಿಕ್ ವಿನ್ಯಾಸ ಜತೆ ಸ್ಪೋರ್ಟಿ ವಿನ್ಯಾಸಕ್ಕೆ ಒತ್ತು ಕೊಡಲಾಗಿದೆ. ಇದು ಇದೀಗಲೇ ಮಾರಾಟದಲ್ಲಿರುವ ಎಲ್‌ಎಕ್ಸ್ ಮತ್ತು ವಿಎಕ್ಸ್ 125 ಮಾದರಿಗಳಿಗೆ ಸಮಾನವಾದ ವಿನ್ಯಾಸ ಪಡೆದುಕೊಂಡಿದೆ.

ಆಯತಕಾರದ ಹೆಡ್ ಲ್ಯಾಂಪ್ ಮತ್ತು ರಿಯರ್ ವ್ಯೂ ಮಿರರ್ ಇದರ ಪ್ರಮುಖ ವೈಶಿಷ್ಟ್ಯವಾಗಿರಲಿದೆ. ಹಾಗೆಯೇ ದೊಡ್ಡದಾದ ಸಿಗ್ನಲ್ ಲ್ಯಾಂಪ್ ಮತ್ತು ಅಲಾಯ್ ವೀಲ್ ಪಡೆದುಕೊಂಡಿದೆ. ಇನ್ನೊಂದು ಮಹತ್ವದ ಫೀಚರ್ ಏನೆಂದರೆ ರೆಟ್ರೊ ಶೈಲಿಯ (ಹಳೆಯ) ಇನ್ಸ್ಟ್ರುಮೆಂಟ್ ಕ್ಲಸ್ಟರ್ ಮತ್ತು ಅನಾಲಾಗ್ ಪಡೆದುಕೊಂಡಿದೆ.

ಜಾಗತಿಕ ಮಾರುಕಟ್ಟೆಯಲ್ಲಿ ವೆಸ್ಪಾ ಎಸ್ 125 ಸಿಸಿ ಮತ್ತು 150 ಸಿಸಿಗಳಲ್ಲಿ ಲಭ್ಯವಿರುತ್ತದೆ. ಆದರೆ ಭಾರತದಲ್ಲಿ ಸದ್ಯಕ್ಕೆ 125 ಸಿಸಿ ಮಾತ್ರ ಪರಿಚಯವಾಗಲಿದೆ. ಇನ್ನು ಕ್ಲಾಸಿಕ್ ಸಿಂಗಲ್ ಸೈಡಡ್ ಹೈಡ್ರಾಲಿಕ್ ಫ್ರಂಟ್ ಸಸ್ಫೆಷನ್, ಮೆಟಾಲ್ ಮೊನೊಕಾಕ್ ಚಾಸೀಸ್ ಮತ್ತು ಕ್ರೋಮ್ ಫಿನಿಶ್ ಸ್ಟಾಂಡರ್ಡ್ ಆಗಿ ದೊರಕಲಿದೆ.

ವರದಿಗಳ ಪ್ರಕಾರ ಪ್ರಸಕ್ತ ಸಾಲಿನ ಮಧ್ಯಂತರ ಅವಧಿಯಲ್ಲಿ ವೆಸ್ಪಾ ಎಸ್ ಬಿಡುಗಡೆಯಾಗಲಿದೆ. ಇದು ಎಲ್‌ಎಕ್ಸ್ ಮತ್ತು ವಿಎಕ್ಸ್ ಮಾದರಿಗಳ ರೇಂಜ್‌ನಲ್ಲಿ ದರ ನಿಗದಿಗೊಳ್ಳಲಿದೆ. ಇನ್ನು ಪಿಯಾಜಿಯೊದ ಪುಣೆ ಘಟಕದಲ್ಲಿ ಸ್ಕೂಟರ್ ನಿರ್ಮಾಣವಾಗಲಿದೆ.