4-6 ಲಕ್ಷ ರು.ನ ಡೀಸಲ್ ಬೀಟ್ ಸವಾರಿಗೆ ರೆಡಿಯಾಗಿ

ತನ್ನ ಕಡಿಮೆ ದರದಿಂದಾಗಿ ಷೆವರ್ಲೆ ಬೀಟ್ ಹೆಚ್ಚು ಜನಪ್ರಿಯತೆಗಳಿಸಿದೆ. ಆದರೆ ಪೆಟ್ರೊಲ್ ದರದಿಂದಾಗಿ ಜನರು ಡೀಸಲ್ ಕಾರುಗಳತ್ತ ಮುಖ ಮಾಡುತ್ತಿದ್ದಾರೆ. ಜಾಸ್ತಿ ಮೈಲೇಜ್ ನೀಡುವ ಕಾರುಗಳು ಭಾರತೀಯರ ಮೆಚ್ಚಿನ ಆಯ್ಕೆಯಾಗಿದೆ. ಈಗಾಗಲೇ ಷೆವರ್ಲೆ ಬೀಟ್ ತನ್ನ ಅತ್ಯಧಿಕ ಮೈಲೇಜಿನಿಂದಾಗಿ ಸುದ್ದಿ ಮಾಡಿದೆ.

ಆಟೋಮೊಟಿವ್ ರಿಸರ್ಚ್ ಅಸೋಸಿಯೇಷನ್(ಎಆರ್ಎಐ) ಪ್ರಕಾರ ನೂತನ ಷೆವರ್ಲೆ ಬೀಟ್ ಪ್ರತಿಲೀಟ್ ಗೆ 24 ಕಿ.ಮೀ. ಮೈಲೇಜ್ ನೀಡುತ್ತಿದೆ. ಇದು ಫಿಯೆಟ್ ನ 1.3 ಮಲ್ಟಿಜೆಟ್ ಡೀಸಲ್ ಎಂಜಿನ್ ಹೊಂದಿದೆ. ಇವೇ ಎಂಜಿನ್ ಹೊಂದಿರುವ ಕಾರುಗಳು ಫಿಯೆಟ್, ಟಾಟಾ ಮತ್ತು ಸುಜುಕಿ ಕಂಪನಿಗಳೂ ಹೊಂದಿವೆ ಎಂಬುದನ್ನು ಮರೆಯುವಂತ್ತಿಲ್ಲ. ಆದರೆ ಆ ಕಾರುಗಳೆಲ್ಲ ಈ ಬೀಟ್ ದರಕ್ಕೆ ದೊರಕದು ಎಂಬುದು ಕಟು ಸತ್ಯ.

ಇಷ್ಟು ಮೈಲೇಜ್ ನೀಡುವ ಬೀಟ್ ಹಿಂದಿನ ರಹಸ್ಯವಾದರೂ ಏನು? ಈ ಕಾರಿನ ಪಿಸ್ಟನ್, ಅಲ್ಯುಮಿನಿಯಂ ಬಾಡಿ, ಪ್ಲಾಸ್ಟಿಕ್ ಭಾಗಗಳೇ ಈ ಕಾರನ್ನು ಹಗುರವಾಗಿಸಿದೆ. ಕಾರು ಹಗುರವಾಗಿರುವುದರಿಂದ ಸಹಜವಾಗಿಯೇ ಮೈಲೇಜ್ ಹೆಚ್ಚಿದೆ. ಒಂದು ಅಂದಾಜಿನ ಪ್ರಕಾರ ಈ ಕಾರಿನ ದರ ಸುಮಾರು 4.25 ಲಕ್ಷ ರು.ನಿಂದ 6 ಲಕ್ಷ ರು.ವರೆಗಿರಲಿದೆ.