ನವೆಂಬರ್: ಟಾಟಾ ಮಾರಾಟ ಶೇ. 41ರಷ್ಟು ಹೆಚ್ಚಳ

ನವೆಂಬರ್ 2011ರಲ್ಲಿ ಟಾಟಾ ಮೋಟರ್ಸ್ ಒಟ್ಟಾರೆಯಾಗಿ 76,737 ಯುನಿಟ್ ವಾಹನ ಮಾರಾಟ ಮಾಡಿದ್ದು ಕಳೆದ ವರ್ಷದ ಇದೇ ಅವಧಿಗಿಂತ ಶೇಕಡ 40.64ರಷ್ಟು ಹೆಚ್ಚಾಗಿದೆ. ಕಂಪನಿಯು ಕಳೆದ ವರ್ಷದ ನವೆಂಬರ್ ತಿಂಗಳಲ್ಲಿ ಒಟ್ಟಾರೆ 54,622 ಯೂನಿಟ್ ವಾಹನ ಮಾರಾಟ ಮಾಡಿತ್ತು.

ಕಳೆದ ತಿಂಗಳು ಕಂಪನಿಯು ದೇಶದಲ್ಲಿ 27,237 ಪ್ರಯಾಣಿಕ ಕಾರು ಮಾರಾಟ ಮಾಡಿದ್ದು, ಶೇಕಡ 80ರಷ್ಟು ಏರಿಕೆ ಕಂಡಿತ್ತು. ಕಳೆದ ವರ್ಷ ನವೆಂಬರ್ ನಲ್ಲಿ ಇದು 15,340 ಯುನಿಟ್ ಆಗಿತ್ತು ಎಂದು ಟಾಟಾ ಮೋಟರ್ಸ್ ಪ್ರಕಟಣೆಯಲ್ಲಿ ತಿಳಿಸಿದೆ.

ನ್ಯಾನೊ ಮಾರಾಟ: ಕಳೆದ ತಿಂಗಳು ಕಂಪನಿಯು 6,401 ಯೂನಿಟ್ ನ್ಯಾನೊ ಕಾರು ಮಾರಾಟ ಮಾಡಿದೆ. ಕಳೆದ ವರ್ಷದ ನವೆಂಬರ್ ತಿಂಗಳ 509 ನ್ಯಾನೊ ಮಾರಾಟಕ್ಕೆ ಹೋಲಿಸಿದರೆ ಹನ್ನೆರಡು ಪಟ್ಟಿಗಿಂತಲೂ ಹೆಚ್ಚಾಗಿದೆ.

ಟಾಟಾ ಕಂಪನಿಯು ಕಳೆದ ತಿಂಗಳು 10,926 ಯುನಿಟ್ ಇಂಡಿಕಾ ಕಾರು ಮಾರಾಟ ಮಾಡಿದೆ. ಇದೇ ಸಮಯದಲ್ಲಿ 6,213 ಇಂಡಿಗೊ ಕಾರು ಮಾರಾಟ ಮಾಡಲಾಗಿದೆ. ಸುಮೊ, ಸಫಾರಿ ಮತ್ತು ಆರಿಯಾ ಮಾರಾಟ 4,197 ಯುನಿಟ್ ಗೆ ತಲುಪಿದೆ.