ಮಾರುತಿ ಸುಜುಕಿ ಕಿಝಾಷಿಗೆ 3.12 ಲಕ್ಷ ರು. ಡಿಸ್ಕೌಂಟ್

ಪ್ರೀಮಿಯಂ ಕಾರು ಕಿಝಾಷಿಗೆ ಮಾರುತಿ ಸುಜುಕಿ ಬಂಪರ್ ಆಫರ್ ಪ್ರಕಟಿಸಿದೆ. ಈಗ ನೀವು ಮಾರುತಿ ಸುಜುಕಿ ಕಿಝಾಷಿ ಖರೀದಿಸಿದರೆ ಸುಮಾರು 3.12 ಲಕ್ಷ ರುಪಾಯಿ ಡಿಸ್ಕೌಂಟ್ ಪಡೆಯಬಹುದು.

ಮಾರುತಿ ಸುಜುಕಿ ಕಿಝಾಷಿ ಕಾರು ಕಂಪನಿಯ ನಿರೀಕ್ಷೆಯಂತೆ ಬೇಡಿಕೆ ಪಡೆದುಕೊಂಡಿಲ್ಲ. ಕಿಝಾಷಿ ಆರಂಭಿಕ ದರ 17.12 ಲಕ್ಷ ರು. ಇದೆ. ಇಷ್ಟು ದುಬಾರಿ ದರಕ್ಕೆ ಇದರ ಪ್ರತಿಸ್ಪರ್ಧಿ ಕಂಪನಿಗಳ ಕಾರು ಗ್ರಾಹಕರನ್ನು ಸೆಳೆಯುತ್ತಿದೆ.

ಚಿತ್ರಲೋಕ

ಮಾರುತಿ ಸುಜುಕಿ ಕಿಝಾಷಿ ಕಾರನ್ನು ಕಂಪನಿಯು ಪೂರ್ಣ ಪ್ರಮಾಣದಲ್ಲಿ ಆಮದು ಮಾಡಿಕೊಳ್ಳುತ್ತದೆ. ಕಿಝಾಷಿ ಡಿಸ್ಕೌಂಟ್ ಆಫರನ್ನು ಪ್ರಚಾರ ಪಡಿಸಲು ಕಂಪನಿಯು ಕೊಟಕ್ ಮಹೀಂದ್ರದೊಂದಿಗೆ ಮೈತ್ರಿ ಮಾಡಿಕೊಂಡಿದೆ.

ಕೊಟಕ್ ಮಹೀಂದ್ರ ಕಂಪನಿಯು ತನ್ನ ಗ್ರಾಹಕರಿಗೆ ಕಿಝಾಷಿ ಡಿಸ್ಕೌಂಟ್ ಆಫರನ್ನು ನೀಡುತ್ತಿದೆ. ಡಿಸ್ಕೌಂಟ್ ನಂತರ ಮಾರುತಿ ಕಿಝಾಷಿ ಮ್ಯಾನುಯಲ್ ಗೇರ್ ಕಾರು ದರ ಸುಮಾರು 14 ಲಕ್ಷ ರು. ಆಗಲಿದೆ. ಆಟೋಮ್ಯಾಟಿಕ್ ಕಿಝಾಷಿ ದರ ಸುಮಾರು 15 ಲಕ್ಷ ರು. ಇರಲಿದೆ.

ಡಿಸ್ಕೌಂಟ್ ನಂತರದ ಕಿಝಾಷಿ ದರವು ಅದರ ಪ್ರತಿಸ್ಪರ್ಧಿ ಕಂಪನಿಗಳ ಕಾರುಗಳಿಗಿಂತ ಕಡಿಮೆಯಾಗಿದೆ. ನಿಸ್ಸಾನ್ ಟೀನಾ, ಸ್ಕೋಡಾ ಸೂಪರ್ಬ್, ಹೋಂಡಾ ಅಕಾರ್ಡ್ ಮತ್ತು ಹ್ಯುಂಡೈ ಸೊನಾಟ ಕಾರುಗಳಿಗಿಂತ ಕಿಝಾಷಿ ದರ ಕಡಿಮೆಯಾಗಿದೆ.