ಮೇ ತಿಂಗಳಲ್ಲಿ 2014 ಟೊಯೊಟಾ ಕರೊಲ್ಲಾ ಆಲ್ಟೀಸ್ ಲಾಂಚ್

2014 ಟೊಯೊಟಾ ಕರೊಲ್ಲಾ ಆಲ್ಟೀಸ್ ದೊಡ್ಡದಾದ ಹೆಚ್ಚು ಅಗಲವಾದ ಗ್ರಿಲ್ ಪಡೆದುಕೊಂಡಿದ್ದು, ಹೆಡ್‌ಲ್ಯಾಂಪ್ ಸ್ವಲ್ಪ ಹಿಂಬದಿಯ ವರೆಗೂ ವಿಶಾಲವಾಗಿ ಚಾಚಿಕೊಂಡಿದೆ. ಇದಕ್ಕೆ ಎಲ್‌ಇಡಿ ಲೈಟ್ ಸೇರಿಕೊಂಡಾಗ ಫ್ರಂಟ್ ಬಂಪರ್‌ಗೆ ಒಟ್ಟಾರೆಯಾಗಿ ತೀಕ್ಷ್ಮವಾದ ಲುಕ್ ಪ್ರದಾನ ಮಾಡುತ್ತದೆ.

ಇನ್ನು ಸೌಲಭ್ಯಗಳ ಬಗ್ಗೆ ಮಾತನಾಡುವುದಾದ್ದಲ್ಲಿಯೂ ನೂತನ ಆಲ್ಟೀಸ್ ತುಂಬಾನೇ ಹೊಸ ವೈಶಿಷ್ಟ್ಯಗಳನ್ನು ಹೊಂದಿದೆ. ಇದರಲ್ಲಿ ಸ್ಯಾಟಲೈಟ್ ನೇವಿಗೇಷನ್ ಹಾಗೂ ರಿವರ್ಸ್ ಪಾರ್ಕಿಂಗ್‌ಗಾಗಿ ದೊಡ್ಡದಾದ 7 ಇಂಚಿನ ಎಲ್‌ಸಿಡಿ ಟಚ್‌ಸ್ಕ್ರೀನ್ ಪರದೆ, ಆಟೋಮ್ಯಾಟಿಕ್ ಕ್ಲೈಮೇಟ್ ಕಂಟ್ರೋಲ್, ಲೆಥರ್ ಸೀಟು, ಕೀಲೆಸ್ ಎಂಟ್ರಿ, ರೈನ್ ಸೆನ್ಸಾರ್ ವೈಪರ್, ಆಟೋಮ್ಯಾಟಿಕ್ ವೆರಿಯಂಟ್‌ನಲ್ಲಿ ಪ್ಯಾಡಲ್ ಶಿಫ್ಟರ್ ಮತ್ತು ಫುಶ್ ಬಟನ್ ಸ್ಟಾರ್ಟ್ ಸೇರಿದಂತೆ ಹಲವಾರು ವಿಶಿಷ್ಟತೆಗಳನ್ನು ಹೊಂದಿದೆ.

ಲಾಸ್ಟ್ ಬಟ್ ನಾಟ್ ಲೀಸ್ಟ್ ಎಂಬಂತೆ, ಈ ಸೆಡಾನ್ ಕಾರು ಹೆಚ್ಚುವರಿ 100 ಎಂಎಂ ಉದ್ದ ಹೊಂದಿರಲಿದ್ದು, ಅಂದರೆ 2700 ಎಂಎಂ ಆಗಿರಲಿದೆ. ಇದು ಕಾರಿಗೆ ಹೆಚ್ಚು ಲೆಗ್ ರೂಂ ನೀಡುತ್ತದೆ. ಇದನ್ನು ಖಂಡಿತವಾಗಿಯೂ ಕರೊಲ್ಲಾ ಮಾಲಿಕರು ಇಷ್ಟಪಡಲಿದ್ದಾರೆ.

ನೂತನ ಕರೊಲ್ಲಾ ಆಲ್ಟೀಸ್ 1.8 ಲೀಟರ್ ಪೆಟ್ರೋಲ್ ಎಂಜಿನ್‌ನಿಂದ ನಿಯಂತ್ರಿಸ್ಪಡಲಿದ್ದು, 140 ಪಿಎಸ್ ಪವರ್ ಉತ್ಪಾದಿಸಲಿದೆ. ಅಲ್ಲದೆ 6 ಸ್ಪೀಡ್ ಮ್ಯಾನುವಲ್ ಟ್ರಾನ್ಸ್‌ಮಿಷನ್ ಅಥವಾ ಐಚ್ಛಿಕ 7 ಸ್ಪೀಡ್ ಸಿವಿಟಿ ಗೇರ್ ಬಾಕ್ಸ್ ಪಡೆದುಕೊಂಡಿರಲಿದೆ. ಇದರ ಜತೆಗೆ 1.4 ಲೀಟರ್ ಡೀಸೆಲ್ ಎಂಜಿನ್ 88 ಪಿಎಸ್ ಪವರ್ ಉತ್ಪಾದಿಸಲಿದೆ. ಇದು ಆರು ಸ್ಪೀಡ್ ಮ್ಯಾನುವಲ್ ಟ್ರಾನ್ಸ್‌ಮಿಷನ್ ಹೊಂದಿದೆ.

ಅಂದ ಹಾಗೆ 2014 ಟೊಯೊಟಾ ಕರೊಲ್ಲಾ ಆಲ್ಟೀಸ್ ಮೇ 27ರಂದು ಲಾಂಚ್ ಆಗಲಿದ್ದು, ಜೂನ್ ವೇಳೆಯಿಂದ ವಿತರಣೆ ಕಾರ್ಯ ಆರಂಭವಾಗಲಿದೆ. ನಿಮ್ಮ ಮಾಹಿತಿಗಾಗಿ, ಬುಕ್ಕಿಂಗ್ ಪ್ರಕ್ರಿಯೆ ಈಗಾಗಲೇ ಆರಂಭಗೊಂಡಿದ್ದು, ರು. 50000 ಪಾವತಿಸಿ ನಿಮ್ಮ ಕಾರನ್ನು ಮುಂಗಡವಾಗಿ ಕಾಯ್ದಿರಿಸಿಕೊಳ್ಳಬಹುದಾಗಿದೆ.

ಈ ಹಿಂದೆ 2003ನೇ ಇಸವಿಯಲ್ಲಿ ಲಾಂಚ್ ಕಂಡಿದ್ದ ಆಲ್ಟೀಸ್, ಸಿ ಸೆಡಾನ್ ವಿಭಾಗದಲ್ಲಿ ಅತ್ಯಂತ ಹೆಚ್ಚು ಮಾರಾಟ ಗಿಟ್ಟಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿತ್ತು. ಅಲ್ಲದೆ 10 ದಶಲಕ್ಷದಷ್ಟು ಸಂತುಷ್ಟ ಗ್ರಾಹಕರನ್ನು ಪಡೆದಿತ್ತು.

ಪ್ರಸ್ತುತ 11ನೇ ಜನಾಂಗದ ಕರೊಲ್ಲಾ ಆಲ್ಟೀಸ್, ತನ್ನ ನಿಕಟ ಪ್ರತಿಸ್ಪರ್ಧಿಗಳಾದ ಹ್ಯುಂಡೈ ಎಲಾಂಟ್ರಾ, ಸ್ಕೋಡಾ ಒಕ್ಟಾವಿಯಾ ಮತ್ತು ಫೋಕ್ಸ್‌ವ್ಯಾಗನ್ ಜೆಟ್ಟಾ ಆವೃತ್ತಿಗೆ ಪೈಪೋಟಿ ಒಡ್ಡಲಿದೆ.