ಪ್ಲಾನ್ ವರ್ಕೌಟ್ ಆಗ್ತಿಲ್ಲ; ಬದಲಾಯ್ತು ಷೆವರ್ಲೆ ನೀತಿ, ಬರುತ್ತಿದೆ ಹೊಸ ಕಾರು

ಹೌದು, ಸಣ್ಣ ಕಾರು ಮಾರುಕಟ್ಟೆಯಲ್ಲಿ ಬೀಟ್‌ಗಳಂತಹ ಆಕರ್ಷಕ ಮಾದರಿಗಳನ್ನು ಪರಿಚಯಿಸಿರುವುದರ ಹೊರತಾಗಿಯೂ ಅಮೆರಿಕ ಮೂಲದ ವಾಹನ ತಯಾರಕ ಸಂಸ್ಥೆಯಾಗಿರುವ ಜನರಲ್ ಮೋಟಾರ್ಸ್, ಶೈಲಿಯ ವಿಚಾರದಲ್ಲಿ ಮೇಲುಗೈ ಸಾಧಿಸಿರುವುದನ್ನು ಹೊರತುಪಡಿಸಿದರೆ ಮಾರಾಟದಲ್ಲಿ ದೊಪ್ಪನೆ ಕಳಕ್ಕೆ ಸರಿದಿತ್ತು.

ಇದರಿಂದ ಎಚ್ಚೆತ್ತುಕೊಂಡಿರುವ ಷೆವರ್ಲೆ ತನ್ನ ನೀತಿಯಲ್ಲಿ ವ್ಯಾಪಕ ಬದಲಾವಣೆಗೆ ಮುಂದಾಗುತ್ತಿದೆ. ಅಷ್ಟೇ ಯಾಕೆ ಫೋರ್ಡ್ ಹಾಗೂ ಫೋಕ್ಸ್‌ವ್ಯಾಗನ್ ಅದೇ ನೀತಿ ಅನುಸರಿಸಲು ಮುಂದಾಗುತ್ತಿರುವ ಷೆವರ್ಲೆ, ಕಾಂಪಾಕ್ಟ್ ಸೆಡಾನ್ ವಿಭಾಗದಲ್ಲಿ ಹೊಸ ಕಾರು ಬಿಡುಗಡೆ ಮಾಡಲು ತಯಾರಾಗುತ್ತಿದೆ.

ಕೇವಲ ಕಾಂಪಾಕ್ಟ್ ಸೆಡಾನ್ ಮಾತ್ರವಲ್ಲದೆ ಹೊಸ ಹ್ಯಾಚ್‌ಬ್ಯಾಕ್ ಕಾರನ್ನು ಲಾಂಚ್ ಮಾಡುವ ಇರಾದೆಯನ್ನು ಷೆವರ್ಲೆ ಹೊಂದಿದೆ. ಇವೆರಡು 'ಎಂ300' ತಳಹದಿಯಲ್ಲಿ ನಿರ್ಮಾಣವಾಗಲಿದೆ. ಆದರೆ ಸ್ವಲ್ಪ ತಡವಾಗಿ 2017ರ ವೇಳೆಯಷ್ಟೇ ಮಾರುಕಟ್ಟೆ ಪ್ರವೇಶಿಸಲಿದೆ.

ಏತನ್ಮಧ್ಯೆ ಆಂತಕಕಾರಿ ಬೆಳವಣಿಗೆಯಲ್ಲಿ ವರ್ಷದಿಂದ ವರ್ಷಕ್ಕೆ ಶೇರು ನಷ್ಟಕ್ಕೊಳಗಾಗುತ್ತಿರುವ ಷೆವರ್ಲೆ ಸಂಸ್ಥೆಯು 2014ನೇ ಆರ್ಥಿಕ ಸಾಲಿನಲ್ಲಿ ಅಂದಾಜು 6,552 ಕೋಟಿ ರು.ಗಳ ನಷ್ಟ ಅನುಭವಿಸುತ್ತಿದೆ ಎಂದು ಬಲ್ಲ ಮೂಲಗಳು ತಿಳಿಸಿವೆ.