ಇದ್ಯಾವ ಹೊಸ ಟೊಯೊಟಾ ಕಾರು - ಬಲ್ಲೀರಾ ?

By Nagaraja

Updated: Tuesday, June 28, 2016, 18:04 [IST]

ಜಪಾನ್ ಮೂಲದ ಪ್ರತಿಷ್ಠಿತ ವಾಹನ ಸಂಸ್ಥೆ ಟೊಯೊಟಾ, 2016 ಗುಡ್ ವುಡ್ ಫೆಸ್ಟಿವಲ್ ಆಫ್ ಸ್ಪೀಡ್‌ನಲ್ಲಿ ಅತಿ ನೂತನ ಸಿ-ಎಚ್‌ಆರ್ ಹೈಬ್ರಿಡ್ ಕ್ರಾಸೋವರ್ ಕಾರನ್ನು ಅನಾವರಣಗೊಳಿಸಿದೆ. ಇದನ್ನು ಮೊದಲ ಬಾರಿಗೆ 2016 ಜಿನೆವಾ ಮೋಟಾರು ಶೋದಲ್ಲಿ ಅನಾವರಣಗೊಳಿಸಲಾಗಿತ್ತು.

ಟೊಯೊಟಾ ನ್ಯೂ ಗ್ಲೋಬಲ್ ಆರ್ಕಿಟೆಕ್ಚರ್ (ಟಿಎನ್‌ಜಿಎ) ಮೊಡ್ಯುಲರ್ ತಳಹದಿಯಲ್ಲಿ ನಿರ್ಮಾಣವಾಗುತ್ತಿರುವ ಎರಡನೇ ಕಾರು ಇದಾಗಿದೆ. ಇದಕ್ಕೂ ಮೊದಲು ನಾಲ್ಕನೇ ತಲೆಮಾರಿನ ಟೊಯೊಟಾ ಪ್ರಯಾಸ್ ನಿರ್ಮಾಣಗೊಂಡಿತ್ತು.

ಜಾಗತಿಕ ಮಾರುಕಟ್ಟೆಗೆ ಟೊಯೊಟಾ ಸಿ-ಎಚ್‌ಆರ್ ಹೈಬ್ರಿಡ್ ಕ್ರಾಸೋವರ್

ನೂತನ ಟೊಯೊಟಾ ಸಿ-ಎಚ್ ಆರ್ ಆರಂಭದಲ್ಲಿ ಪೆಟ್ರೋಲ್ ಜೊತೆ ಎಲೆಕ್ಟ್ರಿಕ್ ಮೋಟಾರು ಆಯ್ಕೆಯಲ್ಲಿ ಲಭ್ಯವಾಗಲಿದೆ. ಈ ಮೂಲಕ ಹೆಚ್ಚು ಪರಿಸರ ಸ್ನೇಹಿ ಎನಿಸಿಕೊಳ್ಳಲಿದೆ.

ನೂತನ ಕಾರಿನಲ್ಲಿ 8ಎನ್ ಆರ್-ಎಫ್‌ಟಿಎಸ್ 1.2 ಲೀಟರ್ ಟರ್ಬೊಚಾರ್ಜ್ಡ್ ಫೋರ್ ಸಿಲಿಂಡರ್ ಎಂಜಿನ್ ಆಳವಡಿಸಲಾಗುವುದು. ಇದು 185 ಎನ್ ಎಂ ತಿರುಗುಬಲದಲ್ಲಿ 113.94 ಅಶ್ವಶಕ್ತಿಯನ್ನು ಉತ್ಪಾದಿಸಲಿದೆ. ಹಾಗೆಯೇ ಆರು ಸ್ಪೀಡ್ ಸಿವಿಟಿ ಗೇರ್ ಬಾಕ್ಸ್ ಇರುತ್ತದೆ.

ಇದರ ಹೈಬ್ರಿಡ್ ಆವೃತ್ತಿಯು 1.9 ಲೀಟರ್ ಪೆಟ್ರೋಲ್ ಎಂಜಿನ್ (142 ಎನ್ ಎಂ ತಿರುಗುಬಲ, 96.51 ಅಶ್ವಶಕ್ತಿ) ಜೊತೆಗೆ ಎಲೆಕ್ಟ್ರಿಕ್ ಮೋಟಾರು ಪಡೆಯಲಿದೆ. ಇದರ ಎಲೆಕ್ಟ್ರಿಕ್ ಮೋಟಾರು 163 ಎನ್ ಎಂ ತಿರುಗುಬಲದಲ್ಲಿ 71.05 ಅಶ್ವಶಕ್ತಿ ಉತ್ಪಾದಿಸಲಿದೆ.

ಇನ್ನು ಕೆಲವು ಮಾರುಕಟ್ಟೆಗಳಲ್ಲಿ 2.0 ಲೀಟರ್ ಫೋರ್ ಸಿಲಿಂಡರ್ ಪೆಟ್ರೋಲ್ ಎಂಜಿನ್ ಆಯ್ಕೆಯೂ ನೀಡಲಾಗುವುದು. ಇದು 193 ಎನ್ ಎಂ ತಿರುಗುಬಲದಲ್ಲಿ 110 ಅಶ್ವಶಕ್ತಿ ಉತ್ಪಾದಿಸಲಿದ್ದು, ಸಿವಿಟಿ ಗೇರ್ ಬಾಕ್ಸ್ ಕಂಡುಬರಲಿದೆ.