ಫೋರ್ಸ್ ಇಂಡಿಯಾ ಹೆಸರನ್ನು ಬದಲಾಯಿಸುತ್ತೇವೆ : ವಿಜಯ್ ಮಲ್ಯ

ಪ್ರಾಯೋಜಕರನ್ನು ಸೆಳೆಯಲು ಈ ರೀತಿಯ ತೀರ್ಮಾನಕ್ಕೆ ಆಡಳಿತ ಮಂಡಳಿ ಬಂದಿದೆ ಎನ್ನಲಾಗಿದೆ. ತಂಡವು ತನ್ನ ಬ್ರಾಂಡ್ ಮೌಲ್ಯವನ್ನು ಹೆಚ್ಚಿಸಿಕೊಳ್ಳಬೇಕು ಎನ್ನುವ ಯೋಜನೆ ಇಟ್ಟುಕೊಂಡಿದ್ದು, ತಂಡದ ಹೆಸರನ್ನು ಬದಲಾವಣೆ ಮಾಡುವ ಮೂಲಕ ಈ ಕಾರ್ಯಕ್ಕೆ ಚಾಲನೆ ನೀಡಿದೆ.

ಸಿಲ್ವರ್‌ಸ್ಟೋನ್ ಮೂಲದ ಈ ತಂಡ ಜೋರ್ಡನ್, ಮಿಡ್‌ಲ್ಯಾಂಡ್ ಮತ್ತು ಸ್ಪೈಕರ್ ಎಂದು ಹೆಸರುಗಳಿಂದ ಖ್ಯಾತಿಗಳಿಸಿತ್ತು.

ಈ ತಂಡದ ಮೇಲೆ ಮೊದಲಿನಿಂದಲೂ ಕಣ್ಣು ಇಟ್ಟಿದ್ದ ಮಲ್ಯ ಅವರು 2008ರಲ್ಲಿ ಈ ತಂಡವನ್ನು ಖರೀದಿಸಿ ಅದನ್ನು 'ಫೋರ್ಸ್ ಇಂಡಿಯಾ' ಎಂದು ಹೆಸರಿಸಿದರು.

ಪ್ರತಿಯೊಂದು ವಿಚಾರದಲ್ಲೂ ಕೈಸುಟ್ಟುಕೊಂಡಿದ್ದ ವಿಜಯ್ ಮಲ್ಯ ಒಡೆತನದ ಕಂಪನಿಗಳ ಗುಂಪಿನಲ್ಲಿ ಹೆಚ್ಚು ಯಶಸ್ಸು ಗಳಿಸಿರುವುದು ಈ ಫೋರ್ಸ್ ಇಂಡಿಯಾ ಮಾತ್ರ. ಫೋರ್ಸ್ ಇಂಡಿಯಾ ತಂಡ 2016ಲ್ಲಿ ನೆಡೆದ ಚಾಂಪಿಯನ್‌ಶಿಪ್ ರೇಸ್‌ನಲ್ಲಿ ನಾಲ್ಕನೇ ಸ್ಥಾನ ಗಳಿಸಿಕೊಂಡಿತ್ತು.

ನಂತರ 2017 ಫಾರ್ಮುಲಾ ಒನ್ ಕ್ರೀಡಾಋತುವಿನಲ್ಲಿ ಸಹ ತಂಡವು ನಾಲ್ಕನೇ ಸ್ಥಾನವನ್ನು ಗಳಿಸುವ ಮೂಲಕ ಫೋರ್ಸ್ ಇಂಡಿಯಾ ಹೆಚ್ಚು ಪ್ರಖ್ಯಾತಿ ಪಡೆದುಕೊಂಡಿದೆ.

ಫೋರ್ಸ್ ಇಂಡಿಯಾ ಫಾರ್ಮುಲಾ ಒನ್ ತಂಡವು ವಿಶೇಷವಾಗಿ 2017ರಲ್ಲಿ ಹೆಚ್ಚು ರೂಪಾಂತರ ಹೊಂದಿದೆ ಮತ್ತು ಹೊಸ ಪ್ರಾಯೋಜಕರನ್ನು ಆಕರ್ಷಣೆ ಮಾಡಲು ಯಶ್ವಸಿಯಾಗಿದೆ.