ಸೆಲ್ಪ್ ಡ್ರೈವಿಂಗ್ ಕಾರುಗಳ ಅವಾಂತರ- ರಸ್ತೆ ದಾಟುತ್ತಿದ್ದ ಮಹಿಳೆ ದುರ್ಮರಣ

ಸೆಲ್ಪ್ ಡ್ರೈವಿಂಗ್(ಸ್ವಯಂ ಚಾಲಿತ) ಕಾರುಗಳ ಕಾರ್ಯಕ್ಷಮತೆ ಕುರಿತಾಗಿ ಟೆಸ್ಟಿಂಗ್ ನಡೆಸುತ್ತಿದ್ದಾಗ ರಸ್ತೆ ದಾಟುತ್ತಿದ್ದ 49 ವರ್ಷದ ಮಹಿಳೆಯೊಬ್ಬರ ಮೇಲೆ ಸ್ವಯಂ ಚಾಲಿತ ಕಾರು ಹರಿದ ಪರಿಣಾಮ ಮಹಿಳೆ ಸ್ಥಳದಲ್ಲೇ ಸಾವನ್ನಪ್ಪಿದ್ದು, ಸೆಲ್ಪ್ ಡ್ರೈವಿಂಗ್ ಕಾರುಗಳ ತಾಂತ್ರಿಕ ಅಂಶಗಳು ಬಗೆಗೆ ಹಲವು ಅನುಮಾನಗಳಿಗೆ ಎಡೆಮಾಡಿದೆ.

ಅಮೆರಿಕದ ಅರಿಜೋನಾದಲ್ಲಿ ಈ ದುರಂತ ನಡೆದಿದ್ದು, ಆಘಾತಕಾರಿ ಸಂಗತಿಯೆಂದರೇ ಸ್ವಯಂ ಚಾಲನಾ ಕಾರುಗಳು ಅಪಘಾತದ ಸಮಯದಲ್ಲಿ ತುರ್ತು ಬ್ಯಾಕಪ್ ಚಾಲಕವನ್ನು ಹೊಂದಿತ್ತು ಎಂಬುದು ಗಮನಿಸಬೇಕಾದ ಅಂಶವಾಗಿದೆ.

ಉಬರ್ ಸಂಸ್ಥೆಯ ವೊಲ್ಪೋ ಎಕ್ಸ್‌ಸಿ 90 ಎಸ್‌ಯುವಿ ಕಾರಿನ ಮೂಲಕ ಸೆಲ್ಪ್ ಡ್ರೈವ್ ತಾಂತ್ರಾಂಶ ಪರೀಕ್ಷಿಸುವ ವೇಳೆ ಈ ಅನಾಹುತ ನಡೆದಿದ್ದು, ಘಟನೆ ನಂತರ ಸ್ಯಾನ್ ಫ್ರಾನ್ಸಿಸ್ಕೊ, ಮತ್ತು ಟೊರೊಂಟೊದಲ್ಲೂ ಇದೇ ಮಾದರಿಯ ಸ್ವನಿಯಂತ್ರಿತ ಕಾರುಗಳ ಪರೀಕ್ಷೆಯನ್ನು ಸ್ಥಗಿತಗೊಳಿಸಲಾಗಿದೆ.

ಸಾಮಾನ್ಯವಾಗಿ ಸ್ವಯಂ ಚಾಲನಾ ಕಾರುಗಳನ್ನು ನಿಯಂತ್ರಿತ ಪರಿಸರದಲ್ಲಿ ಪರೀಕ್ಷೆ ನಡೆಸಬೇಕು. ಆದರೆ ಹೆಚ್ಚಿನ ಸಂಸ್ಥೆಗಳು ಜನರನ್ನು ಆಕರ್ಷಿಸಲು ಸಾರ್ವಜನಿಕ ರಸ್ತೆಗಳಲ್ಲಿ ಪರೀಕ್ಷೆ ನಡೆಸುತ್ತಿದ್ದು, ಇದೀಗ ಮಹಿಳೆಯ ಸಾವು ಸೆಲ್ಪ್ ಡ್ರೈವಿಂಗ್ ಕಾರುಗಳ ಕಾರ್ಯಕ್ಷಮತೆಗೆ ಬಗ್ಗೆ ಟೀಕೆಗಳು ಕೇಳಿಬರುತ್ತಿವೆ.

ಇನ್ನೊಂದು ಪ್ರಮುಖ ವಿಚಾರ ಅಂದ್ರೆ ಸೆಲ್ಪ್ ಡ್ರೈವಿಂಗ್ ಕಾರುಗಳು ಅಪಘಾತಗಳನ್ನು ತಡೆಯುವ ಎಲ್ಲಾ ರೀತಿ ಸುಧಾರಿತ ತಂತ್ರಜ್ಞಾನಗಳನ್ನು ಅಳವಡಿಕೆ ಹೊಂದಿದ್ದರು ಈ ರೀತಿ ಘಟನೆ ನಡೆದಿರುವುದು ಆಟೋ ಉತ್ಪಾದಕರಲ್ಲೇ ಹಲವು ಗೊಂದಲಗಳನ್ನು ಹುಟ್ಟುಹಾಕಿದೆ.

ಈ ಹಿನ್ನೆಲೆ ಸೆಲ್ಪ್ ಡ್ರೈವಿಂಗ್ ಕಾರುಗಳಲ್ಲಿ ಅಳವಡಿಸಲಾಗಿರುವ ತಂತ್ರಜ್ಞಾನಗಳ ಕುರಿತಾಗಿ ತನಿಖೆ ನಡೆಸಲಾಗುತ್ತಿದ್ದು, ಮಹಿಳೆ ಸಾವಿಗೆ ಸಂಬಂಧಪಟ್ಟಂತೆ ಉಬರ್ ವಿರುದ್ದ ಪ್ರಕರಣ ಕೂಡಾ ದಾಖಲಾಗಿದೆ.

ಉಬರ್ ಕಾರುಗಳಲ್ಲಿ ಪರೀಕ್ಷೆ ನಡೆಸಲಾಗುತ್ತಿರುವ ಸೆಲ್ಪ್ ಡ್ರೈವಿಂಗ್ ಟೆಕ್ನಾಲಜಿಯು ಗೂಗಲ್ ಸಂಸ್ಥೆಯ ವೇಮೊ(WAYM0)ಪ್ರೇರಣೆ ಹೊಂದಿದ್ದು, ಮುಂಬರುವ ದಿನಗಳಲ್ಲಿ ಬಿಡುಗಡೆಯಾಗಿ ಸಿದ್ದವಾಗುತ್ತಿರುವ ಬಹುತೇಕ ಸೆಲ್ಪ್ ಡ್ರೈವಿಂಗ್ ಕಾರುಗಳು ಇದೇ ಇದೇ ತಾಂತ್ರಾಂಶ ಹೊಂದಿವೆ ಎಂಬ ಮಾಹಿತಿ ಲಭ್ಯವಾಗಿದೆ.

ಹೀಗಾಗಿ ಭವಿಷ್ಯದಲ್ಲಿ ಮಾರುಕಟ್ಟೆಗೆ ಲಗ್ಗೆಯಿಡಲಿರುವ ಸುಧಾರಿತ ತಂತ್ರಜ್ಞಾನ ಪ್ರೇರಿತ ಸೆಲ್ಪ್ ಡ್ರೈವ್ ಕಾರುಗಳು ಸಹ ದುರಂತಗಳಿಗೆ ಹೊರತಾಗಿಲ್ಲ ಎನ್ನುವುದು ಸಾಬೀತಾಗಿದ್ದು, ಇಂತಹ ಘಟನೆಗಳು ಮರುಕಳಿಸದಂತೆ ಮತ್ತಷ್ಟು ಹೊಸ ಮಾರ್ಗಗಳನ್ನು ಕಂಡುಕೊಳ್ಳಲು ವೇಮೊಗೆ ಇದು ಸರಿಯಾದ ಸಮಯ ಎನ್ನಬಹುದು.