ಇಂಧನ ಬೆಲೆ ಏರಿಕೆ ಟೆನ್ಷನ್ ಕಡಿಮೆ ಮಾಡಲು ಬರುತ್ತಿದೆ ಹೆಚ್ಚಿನ ಮೈಲೇಜ್ ನೀಡುವ ಹೊಸ ಹೈಬ್ರಿಡ್ ಕಾರುಗಳು

ಹೋಂಡಾ ಕಂಪನಿಯು ತನ್ನ ಸಿಟಿ ಇ:ಎಚ್‌ಇವಿಯನ್ನು ಬಿಡುಗಡೆ ಮಾಡಿದರೆ, ಮಾರುತಿ ಸುಜುಕಿ ಮತ್ತು ಟೊಯೊಟಾ ನಮ್ಮ ಮಾರುಕಟ್ಟೆಯಲ್ಲಿ ಗ್ರ್ಯಾಂಡ್ ವಿಟಾರಾ ಮತ್ತು ಹೈರೈಡರ್ ಹೈಬ್ರಿಡ್ ಎಸ್‌ಯುವಿಗಳನ್ನು ಪರಿಚಯಿಸಿತು. ಈ ಹೈಬ್ರಿಡ್ ಕಾರುಗಳು ಖರೀದಿದಾರರಿಂದ ಸಕಾರಾತ್ಮಕ ಪ್ರತಿಕ್ರಿಯೆಯನ್ನು ಪಡೆದಿವೆ, ಹೈಬ್ರಿಡ್ ಕಾರುಗಳು ಅಧಿಕ ಮೈಲೇಜ್ ಹೊಂದಿರುವುದರಿಂದ ಹೆಚ್ಚಿನ ಗ್ರಾಹರನ್ನು ಆಕರ್ಷಿಸುತ್ತದೆ. ಇನ್ನು ಭಾರತೀಯ ಮಾರುಕಟ್ಟೆಯಲ್ಲಿ ಬಿಡುಗಡೆಯಾಗಲಿರುವ ಹೊಸಹೈಬ್ರಿಡ್ ಕಾರುಗಳ ಬಗ್ಗೆ ಹೆಚ್ಚಿನ ಮಾಹಿತಿ ಇಲ್ಲಿದೆ.

ಇನೋವಾ ಹೈಕ್ರಾಸ್

ಜಪಾನ್‌ನ ವಾಹನ ತಯಾರಕ ಕಂಪನಿಯಾದ ಟೊಯೊಟಾ ಮುಂದಿನ ವರ್ಷದ ಆರಂಭದಲ್ಲಿ ಹೊಸ ಇನ್ನೋವಾ ಹೈಕ್ರಾಸ್ ಅನ್ನು ಭಾರತೀಯ ಮಾರುಕಟ್ಟೆಯಲ್ಲಿ ಬಿಡುಗಡೆ ಮಾಡಲಿದೆ. 2022ರ ನವೆಂಬರ್ ತಿಂಗಳಿನಲ್ಲಿ ಇಂಡೋನೇಷ್ಯಾದಲ್ಲಿ ಜಾಗತಿಕವಾಗಿ ಪಾದಾರ್ಪಣೆ ಮಾಡಲು ಯೋಜಿಸಲಾಗಿದೆ

ಈ ಹೊಸ ಎಂಪಿವಿ ಎರಡು ಎಂಜಿನ್ ಆಯ್ಕೆಗಳೊಂದಿಗೆ ನೀಡಲಾಗುವುದು. ಇದು 2.0 ಲೀಟರ್ ಪೆಟ್ರೋಲ್ ಮತ್ತು ಸ್ಟ್ರಾಂಗ್ ಹೈಬ್ರಿಡ್ ಆಗಿದೆ. ಹೊಸ ಮಾದರಿಯು ಇನ್ನೋವಾ ಕ್ರಿಸ್ಟಾ ಜೊತೆಗೆ ಮಾರಾಟವಾಗಲಿದೆ, ಇದು ಫ್ಲೀಟ್ ಆಪರೇಟರ್‌ಗಳಲ್ಲಿ ಹೆಚ್ಚು ಜನಪ್ರಿಯವಾಗಿದೆ.

ಇನೋವಾ ಹೈಕ್ರಾಸ್ ಫ್ರಂಟ್-ವೀಲ್-ಡ್ರೈವ್ TNGA-C ಪ್ಲಾಟ್‌ಫಾರ್ಮ್ ಅನ್ನು ಆಧರಿಸಿದೆ ಮತ್ತು ಇನ್ನೋವಾ ಕ್ರಿಸ್ಟಾಗೆ ಹೋಲಿಸಿದರೆ ದೊಡ್ಡ ಆಯಾಮಗಳನ್ನು ಹೊಂದಿರುತ್ತದೆ. ವಾಹನವು THS II (ಟೊಯೋಟಾ ಹೈಬ್ರಿಡ್ ಸಿಸ್ಟಮ್) ನ ಹೆಚ್ಚು ಸ್ಥಳೀಯ ಆವೃತ್ತಿಯನ್ನು ಪಡೆಯಬಹುದು, ಇದು ಅವಳಿ-ಮೋಟಾರು ವಿನ್ಯಾಸವನ್ನು ಹೊಂದಿದೆ ಅದು ಅದರ ಹೆಚ್ಚಿನ 'ಸ್ಟೆಪ್-ಆಫ್' ಟಾರ್ಕ್ ಮತ್ತು ಇಂಧನ ದಕ್ಷತೆಯನ್ನು ಹೆಚ್ಚಿಸುತ್ತದೆ.

ಮಾರುತಿ ಎಂಪಿವಿ

ಮಾರುತಿ ಸುಜುಕಿ ಹೊಸ ಸಿ-ಸೆಗ್ಮೆಂಟ್ ಎಂಪಿವಿಯನ್ನು ಸಹ ಬಿಡುಗಡೆ ಮಾಡಲಿದೆ, ಇದು ಹೊಸ ಇನ್ನೋವಾ ಹೈಕ್ರಾಸ್ ಅನ್ನು ಆಧರಿಸಿದೆ. ಹೊಸ ಮಾದರಿಯು 2023 ರ ಮಧ್ಯದಲ್ಲಿ ಬಿಡುಗಡೆಯಾಗುವ ನಿರೀಕ್ಷೆಯಿದೆ. ಇದನ್ನು NEXA ಪ್ರೀಮಿಯಂ ಡೀಲರ್‌ಶಿಪ್ ನೆಟ್‌ವರ್ಕ್ ಮೂಲಕ ಪ್ರತ್ಯೇಕವಾಗಿ ಮಾರಾಟ ಮಾಡಲಾಗುತ್ತದೆ.

ಈ ಹೊಸ ಸಿ-ಸೆಗ್ಮೆಂಟ್ ಎಂಪಿವಿ ಇಂಡೋ-ಜಪಾನೀಸ್ ವಾಹನ ತಯಾರಕರಿಂದ ಅತ್ಯಂತ ದುಬಾರಿ ಮಾದರಿಯಾಗಿದೆ. ಫ್ರಂಟ್-ವೀಲ್-ಡ್ರೈವ್ ಮಾಡೆಲ್ ಅನ್ನು ಟೊಯೋಟಾದ ಬಿಡದಿ ಆಧಾರಿತ ಸ್ಥಾವರದಲ್ಲಿ ಉತ್ಪಾದಿಸಲಾಗುತ್ತದೆ. ಇದು ಇನ್ನೋವಾ ಹೈಕ್ರಾಸ್ ನೊಂದಿಗೆ ಎಂಜಿನ್ ಆಯ್ಕೆಗಳನ್ನು ಹಂಚಿಕೊಳ್ಳುತ್ತದೆ, ಇದು 2.0 ಲೀಟರ್ ಪೆಟ್ರೋಲ್ ಮತ್ತು 2.0 ಲೀಟರ್ ಪೆಟ್ರೋಲ್ ಅನ್ನು ಸ್ಟ್ರಾಂಗ್ ಹೈಬ್ರಿಡ್ ತಂತ್ರಜ್ಞಾನದೊಂದಿಗೆ ಒಳಗೊಂಡಿರುತ್ತದೆ.

ನಿಸ್ಸಾನ್ ಎಕ್ಸ್-ಟ್ರಯಲ್

ನಿಸ್ಸಾನ್ ಎಕ್ಸ್-ಟ್ರಯಲ್ ರೆನಾಲ್ಟ್-ನಿಸ್ಸಾನ್ ಮಿತ್ಸುಬಿಷಿ ಅಲೈಯನ್ಸ್‌ನ CMF-C ಕ್ರಾಸ್ಒವರ್ ಪ್ಲಾಟ್‌ಫಾರ್ಮ್‌ನ ಅತೀವವಾಗಿ ನವೀಕರಿಸಿದ ಆವೃತ್ತಿ, ಕಶ್ಕೈ ಎಸ್‍ಯುವಿಯನ್ನು ಸಹ ಅದೇ ಪ್ಲಾಟ್‌ಫಾರ್ಮ್‌ನಲ್ಲಿ ವಿನ್ಯಾಸಗೊಳಿಸಲಾಗಿದೆ. ನಿಸ್ಸಾನ್ ಎಕ್ಸ್-ಟ್ರಯಲ್ 1.5 ಲೀಟರ್ ಟರ್ಬೊ ಪೆಟ್ರೋಲ್ ಮತ್ತು 1.5 ಲೀಟರ್ ಟರ್ಬೊ ಪೆಟ್ರೋಲ್ ಜೊತೆಗೆ ಎರಡನೇ ತಲೆಮಾರಿನ ಇ-ಪವರ್ ಸರಣಿಯ ಹೈಬ್ರಿಡ್ ಟೆಕ್ ಪವರ್‌ಟ್ರೇನ್ ಆಯ್ಕೆಗಳೊಂದಿಗೆ ಬರುತ್ತದೆ

ಕುತೂಹಲಕಾರಿಯಾಗಿ, ನಿಸ್ಸಾನ್‌ನ ಇ-ಪವರ್ ಸಿಸ್ಟಂ ಬ್ಯಾಟರಿಯನ್ನು ಚಾರ್ಜ್ ಮಾಡಲು ಪೆಟ್ರೋಲ್ ಮೋಟರ್ ಬಳಸುತ್ತದೆ ಅದು ಮುಂಭಾಗದ ಆಕ್ಸಲ್‌ಗೆ ಸಂಪರ್ಕಗೊಂಡಿರುವ ಎಲೆಕ್ಟ್ರಿಕ್ ಮೋಟರ್‌ಗೆ ಶಕ್ತಿಯನ್ನು ನೀಡುತ್ತದೆ.

ಈ ಎಸ್‍ಯುವಿಯ ಹೈಬ್ರಿಡ್ ಆವೃತ್ತಿಯು 4WD (ಫೋರ್-ವೀಲ್ ಡ್ರೈವ್) ನೊಂದಿಗೆ ಬಂದಿದ್ದರೆ, ಹೈಬ್ರಿಡ್ ಅಲ್ಲದ ಮಾದರಿಯು FWD (ಫ್ರಂಟ್-ವೀಲ್ ಡ್ರೈವ್) ಸಿಸ್ಟಂ ಹೊಂದಿದೆ. ಎಕ್ಸ್-ಟ್ರಯಲ್ ಅನ್ನು ಸಿವಿಟಿ ಆಟೋಮ್ಯಾಟಿಕ್ ಗೇರ್‌ಬಾಕ್ಸ್‌ನೊಂದಿಗೆ ಹೊಂದಬಹುದು. ಇದು ಮೂರು ಡ್ರೈವ್ ಮೋಡ್‌ಗಳನ್ನು ನೀಡುತ್ತದೆ, ಅವುಗಳೆಂದರೆ, ಮಡ್, ಸ್ನೋ ಮತ್ತು ಜಲ್ಲಿ ಆಗಿದೆ.

ಈ ಎಸ್‍ಯುವಿ ಕೆಲವು ಪ್ರಮುಖ ವಿನ್ಯಾಸದ ಅಂಶಗಳು ಎಲ್ಇಡಿ ಡಿಆರ್ಎಲ್ ಗಳೊಂದಿಗೆ ಎಲ್ಇಡಿ ಹೆಡ್ ಲ್ಯಾಂಪ್ ಗಳಿಂದ ಫ್ಲೇಕ್ಡ್ ಗ್ರಿಲ್, ಫ್ಲೇರ್ಡ್ ರಿಯರ್ ವೀಲ್ ಆರ್ಚರ್ ಗಳು ಮತು ಸ್ಲಿಮ್ ವ್ರ್ಯಾಪರೌಂಡ್ ಟೈಲ್ ಲ್ಯಾಂಪ್ ಗಳನ್ನು ಒಳಗೊಂಡಿವೆ.

ಹೋಂಡಾ ಎಸ್‍ಯುವಿ

ಹೊಸ ಸಿಟಿ ಹೈಬ್ರಿಡ್ ಅನ್ನು ಬಿಡುಗಡೆ ಮಾಡಿದ ನಂತರ, ಹೋಂಡಾ ನಮ್ಮ ಮಾರುಕಟ್ಟೆಯಲ್ಲಿ 2 ಹೊಸ ಎಸ್‍ಯುವಿಗಳನ್ನು ಬಿಡುಗಡೆ ಮಾಡಲು ಯೋಜಿಸುತ್ತಿದೆ. ಈ ಎರಡು ಎಸ್‍ಯುವಿಗಳನ್ನು ಪೆಟ್ರೋಲ್ ಮತ್ತು ಪೆಟ್ರೋಲ್ ಸ್ಟ್ರಾಂಗ್ ಹೈಬ್ರಿಡ್ ತಂತ್ರಜ್ಞಾನದೊಂದಿಗೆ ನೀಡುವ ಸಾಧ್ಯತೆಯಿದೆ.

ಕಂಪನಿಯು ಮೊದಲು ಹೊಸ ಸಬ್ -4 ಮೀಟರ್ ಎಸ್‌ಯುವಿಯನ್ನು ಬಿಡುಗಡೆ ಮಾಡಲಿದೆ, ಇದು ಮುಂದಿನ ವರ್ಷದ ಆರಂಭದಲ್ಲಿ ಬಿಡುಗಡೆಯಾಗುವ ನಿರೀಕ್ಷೆಯಿದೆ. ಇದು ಹ್ಯುಂಡೈ ವೆನ್ಯೂ, ಕಿಯಾ ಸೋನೆಟ್, ಟಾಟಾ ನೆಕ್ಸಾನ್, ಮಾರುತಿ ಬ್ರೆಝಾ ಮತ್ತು ಇತರರ ವಿರುದ್ಧ ಸ್ಥಾನ ಪಡೆಯಲಿದೆ.

ಹೊಸ ಮಾದರಿಯು ಅಮೇಜ್‌ನ ಪ್ಲಾಟ್‌ಫಾರ್ಮ್ ಅನ್ನು ಆಧರಿಸಿದೆ ಮತ್ತು ಸಿಟಿ ಸೆಡಾನ್‌ನೊಂದಿಗೆ ಎಂಜಿನ್ ಆಯ್ಕೆಗಳನ್ನು ಹಂಚಿಕೊಳ್ಳುವ ನಿರೀಕ್ಷೆಯಿದೆ. ಇದು 1.5-ಲೀಟರ್ i-VTEC ಪೆಟ್ರೋಲ್ ಎಂಜಿನ್ ಮತ್ತು 1.5L ಅಟ್ಕಿನ್ಸನ್ ಸೈಕಲ್ ಎಂಜಿನ್ ಜೊತೆಗೆ ಪ್ರಬಲ ಹೈಬ್ರಿಡ್ ತಂತ್ರಜ್ಞಾನದೊಂದಿಗೆ ನೀಡಲಾಗುತ್ತದೆ.

ಮಾರುತಿ ಬಲೆನೊ ಕ್ರಾಸ್

ಮಾರುತಿ ಸುಜುಕಿ ಬಲೆನೊ ಕ್ರಾಸ್ ಅಥವಾ YTB ಮುಂದಿನ ತಿಂಗಳುಗಳಲ್ಲಿ ಮಾರಾಟವಾಗುವ ಮೊದಲು ಜನವರಿಯಲ್ಲಿ 2023 ಆಟೋ ಎಕ್ಸ್‌ಪೋದಲ್ಲಿ ತನ್ನ ಚೊಚ್ಚಲ ಪ್ರದರ್ಶನವನ್ನು ಮಾಡುತ್ತದೆ ಎಂದು ಹೇಳಲಾಗುತ್ತಿದೆ. ಇದು ಕೂಪ್ ತರಹದ ರೂಫ್‌ಲೈನ್ ಅನ್ನು ಹೊಂದಿರುತ್ತದೆ

ಈ ಮಾರುತಿ ಬಲೆನೊ ಕ್ರಾಸ್ ಕಾರಿನಲ್ಲಿ 1.0-ಲೀಟರ್ ಮೂರು-ಸಿಲಿಂಡರ್ ಬೂಸ್ಟರ್‌ಜೆಟ್ ಪೆಟ್ರೋಲ್ ಎಂಜಿನ್‌ ಅನ್ನು ಹೊಂದಿರುತ್ತದೆ. ಈ ಎಂಜಿನ್ 100 ಬಿಹೆ‍ಪಿ ಪವರ್ ಮತ್ತು 150 ಎನ್ಎಂ ಟಾರ್ಕ್ ಅನ್ನು ಉತ್ಪಾದಿಸುತ್ತದೆ. ಇನ್ನು 1.5-ಲೀಟರ್ ಮೈಲ್ಡ್-ಹೈಬ್ರಿಡ್ K15C ಪೆಟ್ರೋಲ್ ಎಂಜಿನ್ ಅನ್ನು ಹೊಂದಿರಲಿದೆ.