ಮಾರುತಿಯಿಂದ ಮೂರುವರೆ ಲಕ್ಷ ಜನರಿಗೆ ಸುರಕ್ಷತೆಯ ಪಾಠ

ಸುರಕ್ಷತೆಯ ಚಾಲನೆ ಮತ್ತು ರಸ್ತೆ ಸುರಕ್ಷತೆ ಕುರಿತು ಕಂಪನಿಯು 2000ನೇ ಇಸವಿಯಲ್ಲಿ ರಾಷ್ಟ್ರೀಯ ರಸ್ತೆ ಸುರಕ್ಷತಾ ಸಪ್ತಾಹ ಆರಂಭಿಸಿತ್ತು. ಈ ಕಾರ್ಯಕ್ರಮವು ಸುಮಾರು 5 ಲಕ್ಷ ಜನರಿಗೆ ತರಬೇತಿ ನೀಡುವ ಗುರಿಯನ್ನು ಹೊಂದಿದೆ. "ಈ ಯೋಜನೆಯ ಮೂಲಕ ನಾವು ಈಗಾಗಲೇ ಸುಮಾರು 3.58 ಲಕ್ಷ ಜನರಿಗೆ ತರಬೇತಿ ನೀಡಿಯಾಗಿದೆ. ವಾಹನ ಚಾಲನೆಯನ್ನು ವೃತ್ತಿಯಾಗಿ ತೆಗೆದುಕೊಳ್ಳಬಯಸುವ ಸುಮಾರು 98 ಸಾವಿರ ಯುವಕರಿಗೂ ನಾವು ತರಬೇತಿ ನೀಡಿದ್ದೇವೆ" ಎಂದು ಕಂಪನಿ ತಿಳಿಸಿದೆ.

ಸುರಕ್ಷತೆಯ ಸವಾರಿಗೆ ಸಲಹೆಗಳು

ನಿಮ್ಮ ಗಮನ ಪೂರ್ತಿ ಡ್ರೈವಿಂಗ್ ಮೇಲಿರಲಿ: ಮನಸು ಚಂಚಲ ಹೌದು. ಆದರೆ ರಸ್ತೆಯ ಮೇಲೆ ಗಮನ ಹರಿಸದೇ ಡ್ರೈವಿಂಗ್ ಮಾಡಿದರೆ ಅಪಘಾತ ಗ್ಯಾರಂಟಿ. ಫೋನ್ ನಲ್ಲಿ ಮಾತನಾಡುತ್ತ, ಐಪ್ಯಾಡ್ ಸಂಗೀತ ಕೇಳುತ್ತ, ತಿಂಡಿತಿನಿಸು ತಿನ್ನುತ್ತ, ಆಗಾಗ ಸ್ಟೀರಿಯೋದಲ್ಲಿ ಹಾಡು ಬದಲಾಯಿಸುತ್ತ ಚಂಚಲ ಚಿತ್ತರಾಗಿ ಡ್ರೈವ್ ಮಾಡಬೇಡಿ. ಸದಾ ನಿಮ್ಮ ಗಮನ ರಸ್ತೆಯ ಮೇಲಿರಲಿ.

ಟ್ರಾಫಿಕ್ ನಿಯಮಗಳಿಗೆ ಬದ್ಧರಾಗಿರಿ: ಕೆಲವರಿಗೆ ಸಂಚಾರಿ ನಿಯಮಗಳನ್ನು ಉಲ್ಲಂಘಿಸಿ ಡ್ರೈವ್ ಮಾಡುವ ಹುಚ್ಚು. ಸಿಗ್ನಲ್ ಬಿದ್ದರೂ ಗಾಡಿ ಚಲಾಯಿಸುವುದು, ಪಾದಚಾರಿಗಳ ಮಾರ್ಗದಲ್ಲಿ ಗಾಡಿ ನಿಲ್ಲಿಸುವುದು, ಅತ್ಯಧಿಕ ವೇಗದಲ್ಲಿ ಹೋಗುವುದು ಇವೆಲ್ಲ ಕೆಲವು ಉದಾಹರಣೆಗಳು. ಟ್ರಾಫಿಕ್ ನಿಯಮಗಳನ್ನು ಪಾಲಿಸಬೇಕಾದ್ದು ಪ್ರತಿಯೊಬ್ಬ ಚಾಲಕನ ಆದ್ಯ ಕರ್ತವ್ಯ.

ವೇಗದ ಮಿತಿ: ಮಿತಿ ಮೀರಿದ ವೇಗ ಸಾವಿಗೆ, ಅಪಾಯಕ್ಕೆ ಅಹ್ವಾನ ಎಂಬುದು ಗೊತ್ತಿದ್ದರೂ ಇರುವಷ್ಟು ಆಕ್ಸಿಲೇಟರ್ ಅದುಮಿ ಡ್ರೈವ್ ಮಾಡುವ ಹುಚ್ಚು ಕೆಲವರಿಗೆ. ಅತ್ಯಧಿಕ ವೇಗವಾಗಿ ಸಾಗುವುದು ಕೇವಲ ನಿಮಗೆ ಮಾತ್ರವಲ್ಲ, ದಾರಿಯಲ್ಲಿ ಸಾಗುವ ಅಮಾಯಕರ ಪ್ರಾಣಕ್ಕೂರಿಗೂ ಅಪಾಯ. ಹೀಗಾಗಿ ಕಣ್ಣು ನೋಟಕ್ಕೆ ಎಷ್ಟು ಕಾಣುತ್ತದೆಯೋ ಅಷ್ಟು ಗುರಿ ಇಟ್ಟುಕೊಂಡು ಅದಕ್ಕೆ ಪೂರಕವಾದ ವೇಗದಲ್ಲಿ ವಾಹನ ಚಲಾಯಿಸಿ.

ರಾತ್ರಿ ಪ್ರಯಾಣ ಜೋಪಾನ: ರಾತ್ರಿ ನಾವು ಬರೀ ನಮ್ಮ ಹೆಡ್ ಲೈಟ್ ನಡಿಯಲ್ಲಿ ಪ್ರಯಾಣಿಸಬೇಕಾಗುತ್ತದೆ. ಹೀಗಾಗಿ ಇಲ್ಲಿ ಅತೀವೇಗದ ಪ್ರಯಾಣ ಅಪಾಯಕಾರಿ. ಹೆಡ್ ಲೈಟ್ ಡಿಮ್ ಡಿಪ್ ಮಾಡುವುದು, ಲೋ ಬೀಮ್ ಲೈಟ್ ಬಳಸುವುದು ಇತ್ಯಾದಿ ನಿಯಮಗಳನ್ನು ಪಾಲಿಸಿ.

ಮಳೆಗಾಲದಲ್ಲಿ: ಮಳೆಗಾಲದ ಡ್ರೈವಿಂಗ್ ನಲ್ಲಿ ಸಾಕಷ್ಟು ಎಚ್ಚರಿಕೆ ವಹಿಸಬೇಕಾಗುತ್ತದೆ. ಮೊದಲ ಮಳೆ ಬಿದ್ದಾಕ್ಷಣ ರಸ್ತೆಗೆ ಗಾಡಿ ಇಳಿಸುವುದು ಅಪಾಯಕಾರಿ. ಬೈಕ್ ಇತ್ಯಾದಿ ದ್ವಿಚಕ್ರ ವಾಹನಗಳು ಈ ಸಮಯದಲ್ಲಿ ಸ್ಕಿಡ್ ಆಗಿ ಬೀಳುತ್ತವೆ.

ತಾಂತ್ರಿಕ ದೋಷ ಇರದಿರಲಿ: ನಿಮ್ಮ ವಾಹನದಲ್ಲಿ ಯಾವುದಾದರೂ ತಾಂತ್ರಿಕ ಸಮಸ್ಯೆಗಳು ಇಲ್ಲವೆಂಬುದನ್ನು ಪ್ರಯಾಣಕ್ಕೆ ಮುಂಚೆ ಖಚಿತ ಪಡಿಸಿಕೊಳ್ಳಿ. ಅಂದರೆ ಟೈರ್ ಸವೆತ, ಮಳೆಗಾಲದಲ್ಲಿ ವೈಪರ್ ಸರಿಯಾಗಿ ಕೆಲಸ ಮಾಡದಿರುವುದು , ಹೆಡ್ ಲೈಟ್ ಸಮಸ್ಯೆ ಇತ್ಯಾದಿ ಸಣ್ಣ ಪುಟ್ಟ ವಿಷಯಗಳಿಗೂ ಗಮನ ನೀಡಿ. ಟ್ಯಾಂಕ್ ನಲ್ಲಿ ಸಾಕಷ್ಟು ಇಂಧನ ಇರುವುದೇ ಖಚಿತ ಪಡಿಸಿಕೊಳ್ಳಿ.

ಓವರ್ ಟೆಕ್ ಎಚ್ಚರಿಕೆ ಅಗತ್ಯ: ಅಡ್ಡರಸ್ತೆಗಳು ಮತ್ತು ಉಬ್ಬುತಗ್ಗು ರಸ್ತೆ ಇರುವಲ್ಲಿಯಂತೂ ಓವರ್ ಟೆಕ್ ಮಾಡಲೇಬೇಡಿ.

ಕಾರ್ ನಲ್ಲಿ ದೊಡ್ಡದಾಗಿ ಮ್ಯೂಸಿಕ್ ಹಾಕಬೇಡಿ: ಇದರಿಂದಾಗಿ ಹೊರಗಿನ ಸದ್ದು, ಹಾರ್ನ್ ಕೇಳದೆ ಅಪಘಾತವಾಗುವ ಸಾಧ್ಯತೆ ಇದೆ.

ಇಂಡಿಕೇಟರ್ ಉಪಯೋಗಿಸಿರಿ: ಯಾವುದೇ ಕಡೆಗೆ ಗಾಡಿ ತಿರುಗಿಸಿದಾಗ ಇಂಡಿಕೇಟರ್ ಹಾಕಲು ಮರೆಯಬೇಡಿ.

ಓವರ್ ಲೋಡ್ ಮಾಡಬೇಡಿ: ನಿಮ್ಮ ವಾಹನದಲ್ಲಿ ನಿಗದಿತ ಮಿತಿಗಿಂತ ಹೆಚ್ಚು ಜನರನ್ನು ಅಥವಾ ಸರಕುಗಳನ್ನು ತುಂಬಿಸಿಕೊಳ್ಳಬೇಡಿ.

ಡೋಂಟ್ ಡ್ರಿಂಕ್ ಆಂಡ್ ಡ್ರೈವ್: ಎಲ್ಲಕ್ಕಿಂತ ಮುಖ್ಯವಾಗಿ ಕುಡಿದು ಡ್ರೈವ್ ಮಾಡಬೇಡಿ. ಹೆಚ್ಚಿನ ರಸ್ತೆ ಅಪಘಾತಗಳಿಗೆ ಕಾರಣವಾಗಿರುವುದು ಕುಡಿತ.

ಎಲ್ಲರೂ ಒಳ್ಳೆಯ ಚಾಲಕರಾದರೆ ಇಡೀ ವಿಶ್ವಕ್ಕೆ ನಾವು ಮಾದರಿಯಾಗಬಹುದು. ರಸ್ತೆಯಲ್ಲಿ ಹರಿಯುವ ರಕ್ತ ಕಡಿಮೆಯಾಗಬಹುದು. ನಾವು ಸುರಕ್ಷಿತವಾಗಿ ಮನೆ ಸೇರಬಹುದು. ಟೇಕ್ ಕೇರ್...