ವರ್ಷಗಳುರುಳಿದರೂ ಕಾರು ಲಕಲಕ ಅಂತಿರಬೇಕು

ಕಾರ್ ಶಾಂಪೂ

ರಸ್ತೆರಸ್ತೆಗಳಲ್ಲಿ ನಿಮ್ಮನ್ನು ಸುತ್ತಿಸುತ್ತ ಕಾರು ಅದೆಷ್ಟು ಧೂಳನ್ನು ತನ್ನ ಮೈಮೇಲೆ ಎಳೆದುಕೊಂಡಿರುತ್ತದೋ! ಇನ್ನು ಕೆಳಗೆ ಯಾರಿದ್ದಾರೆ ಎಂಬುದನ್ನು ಲೆಕ್ಕಿಸದೆ ಹಕ್ಕಿಗಳು ಹಾಕುವ ಹಿಕ್ಕೆಗಳು ಕಾರನ್ನು ಮತ್ತಷ್ಟು ಹೊಲಸು ಮಾಡುತ್ತವೆ. ಇಂಥ ಹೊಸಲುಗಳನ್ನು ತಿಂಗಳಾನುಗಟ್ಟಲೆ ಕಾರಿನ ಮೇಲೆಯೇ ಇಟ್ಟರೆ, ಅವು ಗಟ್ಟಿಯಾಗಿ ಸ್ವಚ್ಛ ಮಾಡುವಾಗ ಕಾರಿನ ಮೇಲೆ ಗೀರು ಬೀಳಲೂಬಹುದು. ಇಂಥ ಸಮಯದಲ್ಲಿ ಕಾರ್ ಶಾಂಪೂ ಬಳಸಿ ತೊಳೆದರು ಮತ್ತೆ ಮತ್ತೆ ನೋಡಬೇಕೆನ್ನುವಷ್ಟು ಅಂದವಾಗುತ್ತದೆ. ಕಾರನ್ನು ಕ್ಲೀನ್ ಮಾಡಲು ಮನೆಯಲ್ಲಿ ಬಳಸುವ ಆಸಿಡ್‌ಗಳನ್ನು ಬಳಸುವುದು ಸೂಕ್ತವಲ್ಲ

ಕ್ರೀಮ್ ಪಾಲಿಶ್

ಕಾರನ್ನು ಶಾಂಪೂ ಹಾಕಿ ತೊಳೆದ ಮೇಲೆ ಸ್ವಚ್ಛವಾಗಿ ಕಾಣಬಹುದು, ಆದರೆ ಮೊದಲಿದ್ದಂತಹ ಹೊಳಪು ಪಡೆಯುವುದಿಲ್ಲ. ಆದ್ದರಿಂದ ಅತ್ಯುತ್ತಮ ಬ್ರಾಂಡ್ ಕ್ರೀಮ್ ಪಾಲಿಶ್ ಬಳಸಿ ಕಾರನ್ನು ಚೆನ್ನಾಗಿ ಉಜ್ಜಿರಿ. ಈ ಕ್ರೀಮ್ ಪಾಲಿಶ್ ಕಾರನ್ನು ಲಕಲಕ ಅನ್ನುವಂತೆ ಮಾತ್ರ ಮಾಡುವುದಿಲ್ಲ, ಕಾರಿನ ಮೇಲೆ ಧೂಳು ಬೀಳದಂತೆ ಮತ್ತು ಸಣ್ಣಪುಟ್ಟ ಗೀರಾಗದಂತೆ ತಡೆಯುತ್ತದೆ. ಮನೆಯಿಂದ ಹೊರಗಡೆ ಹೋಗುವಾಗ ಮುಖಕ್ಕೆ ಕ್ರೀಮ್ ಹಚ್ಚಿಕೊಂಡು ಹೋಗುತ್ತೀರಿ ತಾನೆ?

ಡ್ಯಾಶ್‌ಬೋರ್ಡ್ ಪಾಲಿಶ್

ಕಾರ್ ಹೊರಗಿನ ಆವರಣವನ್ನು ಕಾರ್ ಕ್ರೀಮ್ ಪಾಲಿಶ್ ಇಡುವಂತೆ ಡ್ಯಾಶ್‌ಬೋರ್ಡ್ ಪಾಲಿಶ್ ಡ್ಯಾಶ್‌ಬೋರ್ಡನ್ನು ಸ್ವಚ್ಛವಾಗಿ ಮತ್ತು ಹೊಳೆಯುವಂತೆ ಮಾಡುತ್ತದೆ. ಅಯ್ಯೋ, ಇದಕ್ಕೆಲ್ಲ ಯಾರು ಪಾಲಿಶ್ ಮಾಡುತ್ತಾರೆ, ಜಸ್ಟ್ ಬಟ್ಟೆ ತೆಗೆದುಕೊಂಡು ಡಸ್ಟ್ ಒರೆಸುತ್ತಿದ್ದರೆ ಸಾಕು ಎಂಬು ಉದಾಸೀನ ಬೇಡವೇ ಬೇಡ.

ಸೀಟ್ ಮತ್ತು ಕಾರ್ಪೆಟ್ ಕ್ಲೀನರ್

ಎಲ್ಲೆಲ್ಲೋ ಅಡ್ಡಾಡಿಕೊಂಡು ಬಂದಿರುತ್ತೀರಿ, ಪಾದರಕ್ಷೆಯನ್ನು ಸ್ವಚ್ಛ ಮಾಡಿಕೊಳ್ಳದೆ ಹಾಗೆಯೇ ಕಾರು ಹತ್ತಿರುತ್ತೀರಿ. ಮಕ್ಕಳು ಕಾರಲ್ಲೇ ಅದೂಇದೂ ತಿನ್ನುತ್ತ ಕಂಡಲ್ಲೆಲ್ಲ ಗಲೀಜು ಮಾಡಿರುತ್ತವೆ. ಇನ್ನು ನಿಮ್ಮ ಅಂದವಾದ ಕಾರನ್ನು ಕಂಡರಾಗದವರು ಬೇಕಂತಲೇ ಕೊಳೆ ಮಾಡುವ ಸಾಧ್ಯತೆಯೂ ಇರುತ್ತದೆ. ಹೀಗಿದ್ರೆ ಹೇಗೆ ಹೇಳಿ? ಈ ಹೊಸಲುಗಳು ಕ್ರಮೇಣ ಕೆಟ್ಟ ವಾಸನೆ ಬೀರಲು ಪ್ರಾರಂಭಿಸುತ್ತವೆ. ಇನ್ನು ಕಾರಿನ ಎಲ್ಲ ಕಿಟಕಿಗಳನ್ನು ಮುಚ್ಚಿದರಂತೂ ಗೋವಿಂದ ಗೋವಿಂದ. ಕಾರ್ಪೆಟ್ ಮತ್ತು ಸೀಟನ್ನು ಶುದ್ಧವಾಗಿಟ್ಟುಕೊಳ್ಳುವುದು ಕೂಡ ನಿಮ್ಮ ಕರ್ತವ್ಯ. ಇದರ ಜೊತೆಗೆ ಕೆಲ ಸುಗಂಧ ದ್ರವ್ಯಗಳನ್ನು ಇಟ್ಟುಕೊಳ್ಳಲು ಮರೆಯಬೇಡಿ.

ಇಂಜಿನ್ ಫ್ಲಶ್

ಇಂಜಿನ್ ಎಣ್ಣೆಯನ್ನು ಬದಲಾಯಿಸುವಾಗ ಇಂಜಿನ್ ಫ್ಲಶ್ ಬಳಸುವುದನ್ನು ಮರೆಯಬೇಡಿ. ಈ ಇಂಜಿನ್ ಫ್ಲಶ್ ಇಂಜಿನ್‌ನಲ್ಲಿ ಶೇಖರಣೆಯಾಗಿರುವ ಧೂಳಿನ ಕಣಗಳು, ಹಳೆಯ ಕೊಳಕಾದ ಎಣ್ಣೆಯನ್ನು ತೊಲಗಿಸಲು ಸಹಾಯ ಮಾಡುತ್ತದೆ. ಇಷ್ಟು ಮಾಡಿ. ಇಂಜಿನ್ ಆಯ್ಲ್ ಬದಲಿಸುವ ಮುನ್ನ ಇಂಜಿನ್ ಫ್ಲಶ್ ಹಾಕಿ ಸ್ವಲ್ಪ ಹೊತ್ತು ಹಾಗೆಯೇ ಬಿಡಿ. ಅದರಲ್ಲಿರುವ ರಾಸಾಯನಿಕ ವಸ್ತು ತನ್ನ ಕೆಲಸವನ್ನು ಚೊಕ್ಕದಾಗಿ ಮಾಡಿರುತ್ತದೆ.