ಮಳೆಗಾಲದಲ್ಲಿ ಡ್ರೈವಿಂಗ್ ಸಹವಾಸ ಬೇಡ ಅಂತೀರಾ? ಇಲ್ಲಿದೆ ಕೆಲವು ಸೂತ್ರಗಳು

By Nagaraja

Published: Wednesday, July 22, 2015, 15:14 [IST]

ಮಳೆಗಾಲ ಬಂತೆಂದರೆ ಮನೆಯಿಂದ ಹೊರಗೆ ಹೆಜ್ಜೆಯಿಡುವುದು ಏನೋ ಬೇಸರ. ಎಲ್ಲೋ ಗಾಳಿ, ಮಳೆಗೆ ಸಿಲುಕುವ ಭಯ. ಇನ್ನು ಡ್ರೈವಿಂಗ್ ಸಹವಾಸವಂತೂ ಸಾಕಪ್ಪ ಸಾಕು ಎಂಬಂತಾಗಿದೆ.

Also Read : ಮಳೆಗಾಲದಲ್ಲಿ ಘಾಟಿ ರಸ್ತೆ ಸಂಚಾರಕ್ಕೆ ಅಮೂಲ್ಯ ಟಿಪ್ಸ್

ಆದರೆ ಕೆಲವು ಮುನ್ನಚ್ಚರಿಕಾ ಕ್ರಮಗಳನ್ನು ಪಾಲಿಸಿದರೆ ಮಳೆಗಾಲದಲ್ಲಿ ಚಾಲನೆ ವೇಳೆ ಎದುರಾಗಬಹುದಾದ ಸಂಭವನೀಯ ತೊಂದರೆಗಳನ್ನು ತಪ್ಪಿಸಬಹುದಾಗಿದೆ. ಈ ಬಗೆಗಿನ ಸಮಗ್ರ ಮಾಹಿತಿಗಾಗಿ ಫೋಟೊ ಸ್ಲೈಡ್ ನತ್ತ ಮುಂದುವರಿಯಿರಿ.

01. ಮುಂಗಾರು ಮಳೆಗಿಂತ ಮೊದಲು ಚೆಕಪ್

ನಿಮ್ಮ ಕಾರಿನ ಕಂಡೀಷನ್ ಮೇಲೆ ಸ್ವಲ್ಪ ನಿಗಾವಹಿಸಿ. ಕಾರು ಎಂಜಿನ್, ಚಕ್ರ, ಬ್ರೇಕ್, ವೈಪರ್, ಹೆಡ್ ಲೈಟ್, ಇತ್ಯಾದಿಗಳು ಸರಿಯಾಗಿ ಕಾರ್ಯ ನಿರ್ವಹಿಸುತ್ತಿರುವುದೇ ಎಂಬುದನ್ನು ಪರಿಶೀಲಿಸಿರಿ.

02. ಬ್ರೇಕ್ ಒತ್ತಿದಾಗ ಜಾಗ್ರತೆ

ಮಳೆಗಾಲದಲ್ಲಿ ಬ್ರೇಕ್ ಸರಿಯಾಗಿ ಕೆಲಸ ಮಾಡುವುದಿಲ್ಲ. ಹಳೆಯ ಕಾರುಗಳಲ್ಲಿ ಇಂತಹ ತೊಂದರೆ ಜಾಸ್ತಿಯಾಗಿ ಕಾಡಬಹುದು. ಹಾಗೆ ಒಂದೇ ಸಮನೆ ಬ್ರೇಕ್ ಹಾಕುವ ಸಾಹಸಕ್ಕೆ ಹೋಗಬೇಡಿ. ಇದರ ಬದಲು ಬಿಟ್ಟು ಬಿಟ್ಟು ಬ್ರೇಕ್ ಅದುಮಿದರೆ ಉತ್ತಮ. ಸಾಧ್ಯವಾದಷ್ಟು ಎಕ್ಸಿಲೇಟರ್ ಹಾಗೂ ಗೇರ್ ಮೂಲಕವೇ ಕಾರಿನ ನಿಯಂತ್ರಣವನ್ನು ಪ್ರಯತ್ನಿಸಿ.

03. ನಿಧಾನವೇ ಪ್ರಧಾನ

ಅವಸರವೇ ಅಪಘಾತಕ್ಕೆ ಕಾರಣ. ಮಳೆಗಾಲದಲ್ಲಿ ಮೋಡ ಕವಿದ ವಾತಾವರಣ ಇರುವುದರಿಂದ ಗೋಚರತೆಯ ಅಭಾವ ಕಾಡುತ್ತದೆ. ಹಾಗಾಗಿ ಜಾಸ್ತಿ ಕತ್ತಲು ಆವರಿಸಿದ್ದಲ್ಲಿ ಹಗಲು ಸಮಯದಲ್ಲೂ ಹೆಡ್ ಲೈಟ್ ಆನ್ ಮಾಡಿರಿ.

04. ಟೈರ್ ಥ್ರೆಡ್ ಪರಿಶೀಲನೆ

ಮಳೆಗಾಲದಲ್ಲಿ ಗುಣಮಟ್ಟದ ಚಕ್ರಗಳ ಬಳಕೆ ಅತಿ ಅಗತ್ಯ. ಸವೆದ ಟಯರ್ ಬಳಕೆಯಿಂದ ಅಪಾಯ ಕಟ್ಟಿಟ್ಟ ಬುತ್ತಿ.

05. ವೈಪರ್

ವೈಪರ್ ಸಮರ್ಪಕವಾಗಿದೆಯೇ ಎಂಬುದನ್ನು ಪರಿಶೀಲಿಸಿರಿ. ಯಾಕೆಂದರೆ ಮಳೆಗಾಲದಲ್ಲಿ ವೈಪರ್ ಹೆಚ್ಚು ಉಪಯೋಗಕ್ಕೆ ಬರುತ್ತದೆ.

06. ಹೆಡ್ ಲೈಟ್

ಮಳೆಗಾಲದಲ್ಲಿ ಮೋಡ ಕವಿದ ವಾತಾವರಣ ಇರುವುದರಿಂದ ಸಮರ್ಪಕ ಬೆಳಕಿನ ಅವಶ್ಯಕತೆ ಅತಿ ಹೆಚ್ಚಿದೆ. ಅಲ್ಲದೆ ಇಂಡಿಕೇಟರ್, ಫಾಗ್ ಲ್ಯಾಂಪ್, ಬ್ರೇಕ್ ಲೈಟ್ ಗಳು ಸರಿಯಾಗಿದೇ ಎಂಬುದನ್ನು ಪರಿಶೀಲಿಸಿರಿ.

07. ಕೆಸರು ರಸ್ತೆ

ಜಲಾವೃತ ಹಾಗೂ ಕೆಸರು ರಸ್ತೆಗಳನ್ನು ಸಾಧ್ಯವಾದಷ್ಟು ತಪ್ಪಿಸಿರಿ. ರಸ್ತೆ ಗುಂಡಿಗಳಲ್ಲಿ ನೀರು ತುಂಬಿಕೊಂಡಿರುವ ಹಿನ್ನೆಲೆಯಲ್ಲಿ ಪರಿಚಯವಿಲ್ಲದ ರಸ್ತೆಗಳಲ್ಲಿ ನಿಮ್ಮ ಪಯಣ ಅಪಾಯಕಾರಿಯೆನಿಸುವ ಆತಂಕವಿದೆ.