ಅವನು ಯಾವ ಧೋನಿ, ಕೊಹ್ಲಿಯೂ ಅಲ್ಲ; ಆದರೂ ದೌಡಾಯಿಸಿತು ಅಭಿಮಾನಿಗಳ ದಂಡು!

ವಿಮಾನದಿಂದ ಇಳಿದು ಫ್ಲ್ಯಾಟ್‌ಫಾರ್ಮ್‌ನತ್ತ ಆಗಮಿಸಿದ ಸಂತೋಷ್ ಸುತ್ತುವರಿದ ಅಭಿಮಾನಿ ಹಾಗೂ ಆಪ್ತ ವರ್ಗದವರು ಸಂತೋಷ್ ಸಾಧನೆಗೆ ಜೈಕಾರ ಕೂಗಿದರು. ಈ ಸಂದರ್ಭದಲ್ಲಿ ತಮ್ಮನ್ನು ಬೆಂಬಲಿಸಿದ ಎಲ್ಲರಿಗೂ ಧನ್ಯವಾದ ಹೇಳಲು ಈ ಬೆಂಗ್ಳೂರ್ ಬೈಕರ್ ಮರೆಯಲಿಲ್ಲ.

ದಕ್ಷಿಣ ಅಮೆರಿಕ ರಾಷ್ಟ್ರಗಳಾದ ಅರ್ಜೇಂಟೀನಾ, ಚಿಲಿ ಹಾಗೂ ಬೊಲಿವಿಯಾದಲ್ಲಿ ಜನವರಿ 05ರಿಂದ 17ರ ವರೆಗೆ ಆಯೋಜನೆಯಾಗಿದ್ದ ಅತ್ಯಂತ ಕಠಿಣ 2015 ಡಕಾರ್ ರಾಲಿಯಲ್ಲಿ ಕೆಟಿಎಂ 450 ರಾಲಿ ಬೈಕ್‌ನಲ್ಲಿ ಭಾಗವಹಿಸಿದ್ದ ಸಂತೋಷ್, 13 ಹಂತಗಳ ವರೆಗೆ ಮುಂದುವರಿದ ಈ ಅಪಾಯಕಾರಿ ರೇಸ್‌ನಲ್ಲಿ 36ನೇಯವರಾಗಿ ಗುರಿ ಮುಟ್ಟಿದ್ದರಲ್ಲದೆ 9,295 ಕೀ.ಮೀ. ದೂರವನ್ನು ಯಶಸ್ವಿಯಾಗಿ ಕ್ರಮಿಸಿದ್ದರು.

ಈಗಾಗಲೇ ದೇಶ ಹಾಗೂ ವಿದೇಶಗಳಲ್ಲಿ ಹಲವಾರು ಕ್ರಾಸ್ ಕಂಟ್ರಿ ಹಾಗೂ ಸೂಪರ್ ಕ್ರಾಸ್ ರಾಲಿಯಲ್ಲಿ ವಿಜೇತ ಪತಾಕೆ ಹಾರಿಸಿರುವ ಸಂತೋಷ್ ಅವರ ಪಾಲಿಗೆ ಡಕಾರ್ ರಾಲಿ ಅವಿಸ್ಮರಣೀಯ ಅನುಭವವಾಗಿತ್ತು. ಈ ಮೂಲಕ ಭಾರತವೆಂದರೆ ಕ್ರಿಕೆಟ್ ಮಾತ್ರ ಎಲ್ಲವೂ ಅಲ್ಲ ಎಂಬುದನ್ನು ಸಾಬೀತುಪಡಿಸಿದ್ದರು.

ಮುಂಬರುವ ವರ್ಷಗಳಲ್ಲಿ ಮತ್ತಷ್ಟು ದೇಶದ ರೇಸರ್‌ಗಳು ಡಕಾರ್ ರಾಲಿಯಲ್ಲಿ ಭಾಗವಹಿಸುವಂತಾಗಲಿ ಎಂಬುದೇ ಸಂತೋಷ್ ಕಡೆಯ ಬಯಕೆಯಾಗಿದೆ. ಅಲ್ಲದೆ ಮುಂದಿನ ವರ್ಷದಲ್ಲೂ ಇನ್ನಷ್ಟು ಉತ್ತಮ ಪ್ರದರ್ಶನ ನೀಡುವುದನ್ನು ಎದುರು ನೋಡುತ್ತಿದ್ದಾರೆ.

ಚಿತ್ರದಲ್ಲಿ: ಬೆಂಗಳೂರು ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಸಿಎಸ್ ಸಂತೋಷ್ ಬರಮಾಡಿಕೊಳ್ಳುತ್ತಿರುವ ಡ್ರೈವ್ ಸ್ಪಾರ್ಕ್ ಪ್ರಧಾನ ಸಂಪಾದಕ ಜೊಬೊ ಕುರುವಿಲಾ (ಬಲ ಬದಿಯಲ್ಲಿ) ಹಾಗೂ ಉಪ ಸಂಪಾದಕ ರಾಜ್ ಕಮಲ್ (ಎಡಬದಿಯಲ್ಲಿ).

ಈಗ ಬೆಂಗಳೂರಿಗರೂ ಆಗಿರುವ ಕನ್ನಡಿಗ ಸಂತೋಷ್ ಮಾಡಿರುವ ಸಾಧನೆಗೆ ನೀವು ನಿಮ್ಮ ಅಮೂಲ್ಯ ಕಾಮೆಂಟ್ಸ್ ಮೂಲಕ ಶುಭ ಹಾರೈಸಲು ಮರೆಯದಿರಿ!